الورقي
زوجة صيدلى حلوان الثانية تكشف أسباب إجباره على تطليقها قبل سقوطه بدقائق
ننشر في السطور التالية أقوال زوجة صيدلى حلوان الثانية، التي تكشف تفاصيل رسائل الاستغاثات بها والمكالمات الهاتفية من زوجها، وسر طلاقه لها قبل سقوطه من مسكن الزوجية ووفاته بدقائق، وبعد تلقيها مكالمة هاتفية من والد الزوجة الأولى، وإليكم التفاصيل..
أقوال زوجة صيدلى حلوان الثانية
اسمي ريم سعيد محمد العسلي 32 سنة زوجة المرحوم الثانية - المقيمة بمركز الشهداء بمحافظة المنوفية.
س / ما سبب حضورك لسراى النيابة؟
زوجة صيدلى حلوان الثانية، امبارح لقيت ولاء جوزى بعتلي رسالة على الوتس آب الساعة 12.15 تقريبًا، بيقولي شوفى حد من أخواتك يعرف حد فى قسم حلوان ضرورى لأن حد جايبله بلطجية وبعد كده هو اتصل بيا، وقالى أنه هيطلقنى وهيبعتلى قسيمة الطلاق وأنا حاسة أنه بيتكلم تحت ضغط وبعد كده قفل وكلمنى تانى ونادى على مراته رماء وقالها تكلمنى عشان تتأكد أن أنا ريم وبعدها لقيت رقم غريب بيكلمنى ظهرلي على التروكولر أنه رقم حمدى رشوان وبيقولي أنتي مين وبيتأكد إنى ريم وسألنى اتجوزتى ولاء أمتى وقولتله ولاء عندك أسأله فقالي أنا بجيب حق بنتى وقفل السكة وبعد كده ولاء اتصل بيا تانى وكأنه مضغوط وقالى أنتي طالق وقفل السكة وكلمت والدته لقيتها رايحاله فى الطريق والمغرب عرفت أن جوزى ولاء وقع من البلكونة، ومعرفش إذا كان هو وقع ولا حد وقعه لكن أنا بتهمهم أنهم السبب فى أن جوزى وقع من البلكونة وده كل اللى أنا أعرفه.
عقد القران
س / متى تم عقد القران على زوجك صيدلى حلوان ولاء سعيد مصطفي؟
زوجة صيدلى حلوان الثانية، أنا اتجوزته يوم 20/9/2022 فى مركز الشهداء بمحافظة المنوفية واتوثق عقد الزواج فى 22/9/2022.
قسيمة الزواج
س / ومنذ متى وأنت على علاقة بالمدعو/ ولاء سعيد مصطفي؟
زوجة صيدلى حلوان الثانية / أنا أعرفه من شهر 6 تقريبًا واتخطبتله واتجوزنا فى شهر 20/9/2022.
ملحوظة: قدمت لنا الحاضرة أصل قسيمة الزواج.
س / وهل كنتى على علم أنه متزوج من قبل؟
زوجة صيدلى حلوان الثانية / أيوة.
س / وما صلتك بالمدعوة / رماء حمدى عبدالعاطى؟
زوجة صيدلى حلوان الثانية / أنا أعرف أنها مرات زوجى الأولى.
س / وهل يوجد ثمة خلافات سابقة فيما بينكما؟
زوجة صيدلى حلوان الثانية / لأ أنا أول مرة أشوفها انهاردة.
إشهار عقد زواج
س / وهل زوجك مقيم رفقتك بمحل سكنه؟
زوجة صيدلى حلوان الثانية / هو ملحقش احنا عملنا عقد زواج إشهار فقط لكن لم نقيم معًا فى مسكن واحد.
تطبيق الواتس آب
س / وما سبب مراسلة زوجك عبر تطبيق الواتس أب كما قررتى بالتحقيق ؟
زوجة صيدلى حلوان الثانية / أنا امبارح مرة واحدة لقيته بيستغيث بيا.
ملحوظة / حيث قمنا بالإطلاع علي تطبيق الواتس اب الخاص بالماثلة وتبين أن رقم هاتف زوجها مسجل باسم walaa zayed ومرسل بتاريخ 26/9/2022 الساعة 12.18 رسالة من حسابه إلى الماثلة " ريم شوفي حد من أخواتك يعرف حد فى قسم حلوان "ضرورى بسرعة بس" جايبالي بلطجية فى البيت"، وقام بإرسال اللوكيشن الخاص بمسكنه حال استفسار الماثلة عن مكان تواجده.
قسيمة الطلاق
س / ومتى تم التواصل فيما بينكما هاتفيًا؟
زوجة صيدلى حلوان الثانية / هو كلمنى امبارح 26/9/2022 الساعة 12.40 مساءًا وقالي إنه هيطلقنى وقولتله فى أيه وبعد كده قالي إنهم عاوزين أنه يمضي على أملاكه لزوجته الأولى وبعد كده قفل وكلمنى بعدها تانى الساعة 12.47 مساءًا، وقالى إنه هيطلقنى وهيبعتلي قسيمة الطلاق وبعدها هو نادلها عشان تكلمنى عشان تتأكد إنى ريم وبعدها كلمنى تانى الساعة 12.57م، كلمنى وقالي أنتي طالق وقفل السكة وبعد كده فى رقم غريب كلمنى متسجل على التروكولر باسم والد زوجته رماء ويدعى حمدى رشوان وقالي إنه بيجيب حق بنته وطلب منى يعرف اتجوزنا امتى، وأنا مقولتلهوش حاجة قولتله اسأل جوزى عندك وقفل السكة بعد كده وقالي أنه هيجيب حق بنته قالهالي مرتين.
ملحوظة: قمنا بالإطلاع على سجل المكالمات الوارده والمرسلة بين الماثلة وزوجها وتبين أنها راسلته من هاتفها والمكالمة الأولى يوم 26/9/2022 الساعة 12:40م مدتها 6 دقائق و4 ثوانى والمكالمة الثانية فى 12:47 م ومدتها 57 ثانية والمكالمة الأخيرة فى 12:57م لمدة 10 ثوانى كذلك، والمكالمة الواردة الساعة 12:52م ومدة المكالمة دقيقتان وثانية واحدة.
مضغوط وقلقان
س / وما هى الحالة التى كان عليها زوجك ولاء سعيد مصطفي حال محادثته لك؟
زوجة صيدلى حلوان الثانية / هو صوته كأنه مضغوط وقلقان ومش طبيعى.
حالة رعب
س / وكيف استبان لك ذلك تحديدًا؟
زوجة صيدلى حلوان الثانية / من طريقة صوته كأنه مش عارف يتكلم براحته وفى حالة رعب.
س / وهل أيقنتى سبب تلك الحالة التى كان عليها زوجك آنذاك؟
زوجة صيدلى حلوان الثانية / من الناس اللى حواليه اللي مضغوط منهم واتاكدت لما والد مراته الأولى كلمنى، وأن مراته كلمتنى برضوا وأنا بكلم جوزى عشان تتأكد إنى مراته فعلًا.
إستغاثة
س / هل من ثمة استغاثة من قبل زوجك حال محادثتك له ؟
زوجة صيدلى حلوان الثانية / لأ هو بس لما بعتلي علي الواتس أب لما استغاث بيا.
س / وما الذي بدر منك أنذاك حال إستغاثته بك عبر تطبيق الواتس آب؟
زوجة صيدلى حلوان الثانية / كلمت والدته / آمال العيسوي وقولتلها وقالتلى إنها ريحاله فى الطريق وقتها.
س / ومن كان رفقت زوجك آنذاك تحديدًا ؟
زوجة صيدلى حلوان الثانية / رماء زوجته الأولى ووالدها ومعرفش مين تانى كان معاه وقتها.
س / وهل نمى إلى علمك الأفعال المادية التى أتاها أى شخص قبل زوجك آنذاك؟
زوجة صيدلى حلوان الثانية / معرفش أى حاجة عن اللى حصل معاه.
الطفل يونس ولاء سعيد
س / وما قولك فيما جاء في أقوال الطفل يونس ولاء سعيد بتحقيقات النيابة العامة تلوناه عليها تفصيلًا؟
زوجة صيدلى حلوان الثانية / أنا معرفش جوزى وقع إزاى.
تحريات المباحث
س / وما قولك فيما جاء بتحريات المباحث المؤرخه فى 27/9/2022 الساعة 2.30 مساءًا بمعرفة المقدم محمد المعداوى تلوناه عليها تفصيلًا ؟
زوجة صيدلى حلوان الثانية / اللي اعرفه أنا قولت عليه.
س / وهل تشتبهى جنائيًا فى حدوث وفاة زوجك المتوفى إلى رحمة الله تعالى؟
زوجة صيدلى حلوان الثانية / أيوة أنا بتهمهم بأنهم قتلوا جوزى.
س / ومن تتهمى تحديدًا فى ارتكاب الواقعة؟
زوجة صيدلى حلوان الثانية / مراته رماء وأبوها واللي كانوا معاها.
س / وما هى الأفعال المادية التى قام بها سالفى الذكر تجاه المتوفي إلى رحمة الله؟
زوجة صيدلى حلوان الثانية / أنا معرفش لكن واضح من صوته أنه كان فيه حاجة وأنه مجبر يطلقنى.
س / هل سبق أن قام المتوفي إلى رحمة الله بسرده خلافات فيما بينه وبين زوجته رماء حمدى عبدالعاطى؟
ج / مكنش بيحكيلي حاجة عن مراته الأولى.
س / هل لديك أقوال أخرى ؟
ج / لأ...... تمت أقوالها.
