الورقي
طالب كلية التجارة يكشف تفاصيل اللحظات الأخيرة فى حياة صيدلى حلوان
ننشر فى السطور التالية نص أقوال ناقل صيدلى حلوان بعد سقوطه من مسكن الزوجية الكائن بشارع رايل، إلى مستشفى النصر لإسعافه، وهو طالب بكلية تجارة جامعة حلوان، المدعو مصطفي رمضان منجود، والمقيم عمارات صقر قريش التابعة لدائرة قسم شرطة حلوان، والذى كان شاهد للحظات الاخيرة فى حياة صيدلى حلوان.
أقوال طالب كلية التجارة الذي نقل الصيدلى للمستشفى
س: ما صلتك بالواقعة محل التحقيق ؟
ج: أنا اللى وديت صيدلى حلوان الدكتور ولاء المستشفي.
س: وما هى صلتك بالمتوفي إلى رحمة مولاه؟
ج: انا مليش أى صلة بيه انا بس كنت واقف تحت البيت عنده.
س: وما سبب تواجدك أسفل مسكن المتوفي إلى رحمة مولاه؟
ج: انا كنت مستنى واحد صاحبي علشان نروح التمرين.
بلكونة صيدلى حلوان
س: واين كنت تنتظر تحديدًا ؟
ج: انا كنت واقف بعربيتى قبل بلكونة الدكتور ولاء ب 15 متر.
س: وما هى بادرة اتصال علمك بالواقعة؟
ج: أنا كنت واقف تحت العمارة وفجأة لقيت دكتور ولاء مرمى علي الأرض تحت البلكونة.
مدخل الجراچ
س: وما هو موضعه تحديدة بالنسبة للشرفة ؟
ج: هو كان واقع يمين البلكونة عند مدخل الجراچ.
س: وما التصرف الذي بدر منك حال سقوطه؟
ج:انا كنت فى حالة ذهول حوالى 15 أو 20 ثانية وبعد كده الناس اتلمت عليه.
س: وما هو وضع المتوفي إلى رحمة مولاه حال سقوطه تحديدًا؟
ج: هو وقع علي ظهره أو جمبه ووشه كان لفوق.
سقوط صيدلى حلوان
س: وما هى الحالة التى كان عليها عقب سقوطه؟
ج:انا شفته قام اتعدل نص قاعدة بعد كده فقد الوعى خالص.
س: وهل لاحظت وجود أحد بالشرفة التى سقط منها انذاك ؟
ج: انا مبصتش فوق خالص.
س: وهل استمعت من صوت استغاثة من مكان مسقطه ؟
ج: لأ.
س: وما التصرف الذي بدر منك عقب سقوط المتوفي إلى رحمة مولاه؟
ج: نزلت من العربية ورحت ناحيته.
س: وما هو التصرف الذي بدر منك حال وصولك لمكان المتوفي إلى رحمة مولاه ؟
ج:انا قولت للناس شيلوه معايا علشان نحطه فى العربية ونوديه المستشفي.
س: وهل إنصاعوا لك فى ذلك ؟
ج: ايوة اللي إسمه جمعه البواب وشهرته رجب وكان معانا واحد تانى تقريبًا شغال فى المختار بتاع الكشرى وشلوه حطوه فى العربية.
مستشفى النصر
س: وإلى أين توجهتهم؟
ج: احنا توجهنا لأقرب مستشفي.
س: وما هو أسم تلك المستشفي تحديدًا ؟
ج: هى مستشفي النصر بحلوان.
س: وهل دار ثمة حديث بينك وبين المجنى عليه انذاك ؟
ج:لا ما اتكلمتش معاه عشان كنت مركز فى السواقة.
س: ومع من تقابلت فى المستشفي؟
ج: أنا دخلت علي الطوارئ علي طول عشان نلحقه.
س: ومن القائم بفحص حالته ؟
ج:انا معرفش مين اللى فحص حالته لأن انا ماشوفتش.
س: وما هى فترة انتظارك فى المشفي؟
ج: انا فضلت حوالى نص ساعة لحد الشرطة ماجت وسألونى.
مشاكل مع نسايبه
س: وبما سألتك الشرطة تحديدًا ؟
ج: هما سألونى إيه اللى حصل فقولتلهم هو وقع قدامى فى الشارع وقلتلهم أن أنا سمعت من البواب أن هو عنده مشاكل مع نسايبه.
س: وما هى ماركة السيارة التى أقلته بها ؟
ج: هى عربية ماركة كيا سيراتو موديل 2010 برونزية اللون تحمل رقم أ ج س 2542
س: وإلى أين توجهت عقب تواجدك فى المشفي؟
ج: أنا رحت علي مكان الواقعة وبعدين رحت علي القسم.
س: ما قولك فيما قرره المدعو جمعة بتحقيقات النيابة العامة بأنه أقله للمشفي بإستخدام دراجة بخارية ذات الثلاث عجلات توك توك؟
ج: معرفش أنا اللى وديته بعربيتى ومعرفش بيقول كده ليه.
س: وما تعليقك لما ذكره سالف الذكر؟
ج: انا معرفش هو بيقول كده ليه.
س: وهل قامت المستشفي بتسجيل رقم سيارتك ؟
ج:ايوه هما سجلوا رقم العربية لأن انا اللى نقلته.
س: واين تم تسجيل ذلك ؟
ج: فى الأمن بتاع المستشفي.
س: ما صلتك بالشخص المدعو جمعه ؟
ج:هو ده جمعه اللى نقل معايا الدكتور ولاء وكان قاعد جمبي.
س: وهل توجد ثمة علاقة أو خلافات بينك وبين المجنى عليه ؟
ج: لأ.
س: وهل توجد ثمة علاقة أو خلافات بينك وبين أطراف الواقعة؟
ج: لا معرفش حد فيهم.
س: هل لديك اقوال اخرى ؟
ج:لا. تمت اقواله وتوقع منه / مصطفي رمضان.
