رئيس التحرير
خالد مهران
count
count

حارس عقار يكشف تفاصيل جديدة فى واقعة صيدلى حلوان

صيدلى حلوان
صيدلى حلوان

كشف حارس برج نجمة رايل، عن تفاصيل جديدة فى واقعة صيدلى حلوان، ومدى علاقة الدكتور ولاء زايد بجيرانه، ويوضح ما حدث صباح يوم الواقعة ودوره فى نقله إلى المستشفى لنجدته، ومكان تواجد حماه وقت السقوط، وإليكم نص التحقيقات.

أقوال حارس عقار صيدلى حلوان

اسمى/ جمعة معوض أحمد حارس العقار 35 سنة 
س / ما هي تفصيلات شهادتك؟ 
حارس عقار صيدلى حلوان.. اللي حصل أنى بشتغل في برج نجمة رايل اللي هو رقم 5 شارع رايل بحلوان وانا شغال فى العمارة حارس من حوالى عشر سنين أو أكتر وانا مقيم فى غرفة فى نفس العمارة جنب الأسانسير وجنب السلم، وأنا اعرف الدكتور ولاء المقيم فى العمارة من أول متجوز مراته دكتورة رماء من حوالى خمس سنين تقريبًا هما أول ماتجوزوا سكنوا عندنا فى العمارة وانا اعرف برضوا والدة دكتور ولاء، وكمان أخته كانت بتيجي تقعد عندهم فى الشقة، لأنهم أصلًا من المنوفية، وهى كانت بتدرس هنا فى القاهرة، ودكتور ولاء أول لما اتجوز قعد كام شهر وبعدها سافر هو ومراته برة يشتغلوا فى السعودية وكانت الشقة مقفولة، وبعد حوالى سنتين رجعوا وبعدين قعدوا فى الشقة وبعدها بحوالى شهر أو شهرين هو سافر على السعودية تانى لوحده ومراته فضلت قاعدة هنا وكانت خلفت عيل أسمه يونس ابنهم، وهى لما كانت هنا كنت بسمع من أم دكتور ولاء بإنه ومراته حصلت بينهم مشاكل واتطلقوا بس رجعها تانى، ومن حوالى أربع أيام دكتور ولاء رجع من السفر وكان يوم 22/9/2022 وفى الفترة دي مكنش فيه حد مقيم معاهم غيره هو ومراته وابنهم الصغير، وانهاردة اتفاجئت حوالى الساعة 9.30 الصبح بحماة الدكتور حمدى ابو دكتورة رماء ومعاه ولاد اتنين جوم وطلبوا منى اسجلهم شفرة الأسانسير عشان يطلعوا ليهم، لانهم ساكنين فى الرابع والاسانسير بشفرة وبعدها بحوالى نص ساعة، لقيت ولاد اتنين شباب جوم وقالو لي أنهم طالعين لدكتور حمدى وسجلت ليهم شفرة الأسانسير، وبعدها بشوية لقيت واحد خامس جه وطلع ع السلم ولما سألته رايح فين قال طالع للدكتور حمدى وطلع ع السلم وبعدين علي الساعة واحدة الظهر لقيت أم دكتور ولاء بتتصل عليا وبتقولي الحق الدكتور ولاء عنده بلطجية فى الشقة وقتها كان جارهم فى الرابع أسمه مصطفي صديق كان نازل وطلبت منه يطلع معايا نطمن علي دكتور ولاء وبالفعل طلعنا وخبطنا علي الباب وفتح لينا دكتور حمدى اللي هو حما دكتور ولاء وسألنا عايزين ايه وقتها قولناله هو فى حاجة، قالنا فيه مشاكل عائلية، وبس وقتها نزلنا من البيت لأننا مشوفناش أى حاجة غريبة، ولما سألت كابتن مصطفي صديق اللي هو جارهم فى نفس الدور هو فيه  صوت ولا زعيق قاللي لأ انا مسمعتش أى حاجة فإطمنت وبعدها برضوا لقيت أم دكتور ولاء بتتصل عليا وانا قولتلها لو فيه حاجة أتصلي عالبوليس وبعدها انا كنت قاعد مع عيالي ولقيت علي الساعة 2.30 راجل بتاع دليفرى جيه وجايب أكل قاللي أنه جايب اكل عند دكتور حمدى وسجلتله الاسانسير، وبعدها بحوالى نص ساعة اتفاجئت بصوت حاجة اترزعت عالأرض قدام العمارة ولما خرجت اشوف فيه أيه لقيت دكتور ولاء واقع علي ظهره قدام العمارة وبعدها حاولت انجده وواحد ب "توك توك" معدى فى الشارع شاله معايا ونقلناه علي مستشفي النصر فى حلوان، لأنها أقرب حاجة وهناك طلبوا منى البطاقة ورجعت عالعمارة عشان اجبها اتفاجئت بالحكومة موجودة واخدونى معاهم وطلبوا منى ادلهم علي بيت دكتور حمدى اللي هو حماه وبالفعل وصلتهم لبيته لأنه ساكن في الشارع اللي ورانا ولما روحنا اخدونا كلنا عالقسم وفالقسم طلبوا منى اجى عالنيابة احكى اللي حصل.

س / متى وأين حدث ذلك ؟
 الكلام ده حصل انهاردة 26/9/2022 من الساعة 9.30 صباحًا ودكتور ولاء وقع عالساعة 3.00 العصر قدام العمارة 5 شارع رايل فى حلوان.

س / ما سبب ومناسبة تواجدك بالمكان والزمان سالفي الذكر؟
حارس عقار صيدلى حلوان / أنا بشتغل حارس العمارة بقالي أكتر من عشر سنين.

س/ ما هى طبيعة عملك تحديدًا؟
حارس عقار صيدلى حلوان/ أنا بشتغل حارس للعمارة وساكن ومقيم فى أوضة جنب الأسانسير وجنب السلم ومعايا مراتى وعيالي.

س/ ما علاقتك بالمتوفى/ ولاء سعيد مصطفى؟
حارس عقار صيدلى حلوان/ هو ساكن فى العمارة وعنده شقة فالدور الرابع.

س/ منذ متى بدأت معرفتك بالمتوفى لرحمة مولاه؟
حارس عقار صيدلى حلوان/ أنا فى البداية اتعرفت على أبو دكتور ولاء وانا أعرف أنه دكتور صيدلي من أيام، لما كان أبوه بيشطب الشقة لأبنه، وهو كان راجل محترم وكبير فالسن ومن حوالي خمس سنين دكتور ولاء جه سكن فى العمارة واتجوز من مراته الدكتورة الصيدلانية رماء، وانا أعرف أن أبوه متوفي من أيام كورونا.


س/ هل كان المتوفى لرحمة مولاه يقيم بصورة مستقرة ومنتظمة بالعقار محل عملك؟
حارس عقار صيدلى حلوان/ لأ هما أول لما سكنوا قعدوا حوالي أربع شهور وبعدها سافروا وعرفت انهم سافروا يشتغلوا فى السعودية هما الأتنين ومرجعوش غير بعد حوالي سنتين ولما رجعوا قعدوا هنا فى الشقة وبعدها بحوالي شهر أو شهرين هو سافر على السعودية تانى لوحده ومراته فضلت قاعدة هنا، وكانت خلفت عيل اسمه يونس ابنهم وهي لما كانت هنا كنت بسمع من أم دكتور ولاء بأنه ومراته دكتوره رماء حصلت بينهم مشاكل واتطلقوا بس رجعها تاني.

س/ هل كان يقطن رفقة زوجة المتوفى المدعوة رماء ثمة احد؟
حارس عقار صيدلى حلوان/ هو دكتور  ولاء لما كان يبقى مسافر كان أحيانا اخته بتيجى تقعد مع مراته لأنى اعرف إنه ا بتدرس هنا فى القاهرة وهما اصلا من المنوفية.

س/ هل تظاهر لك حدوث ثمة خلافات بين ولاء رحمه مولاه وبين زوجته المدعوة رماء؟
حارس عقار صيدلى حلوان/ لأ هو الواحد مكنش بيسمع ليهما صوت، ولا بيشوف ليهم أي مشاكل

س/ هل كان المتوفى ولاء سعيد مصطفى  سىء السلوك؟
حارس عقار صيدلى حلوان/ هو كان محترم ودايمًا فى حاله واصلا دايما متغرب برة ولما كان بينزل إجازة وبيقعد هنا شهر ولا شهرين مكنتش بشوف منه أى حاجة وحشة.

س/ ما طبيعة عمل زوجة سالف الذكر؟
حارس عقار صيدلى حلوان/ هي بتشتغل صيدلانية فى صيدلية هنا فى حلوان معرفش بتاعتها ولا بتاعة ابوها.

س/ هل كانت سالفة البيان حسنة السلوك؟
ج/ هي كانت ست محترمة وأنا مشوفتيش منها أى حاجة وحشة

س: هل كان يوجد ثمة أحد يتردد على المتوفى لرحمة مولاه؟
حارس عقار صيدلى حلوان/ لأ انا مكنتش بشوف له صحاب ولا حد بيجيله.

س/ ما الذى حدث بداية صباح اليوم في بداية الواقعة محل التحقيق؟
حارس عقار صيدلى حلوان/ أنا اتفاجئت حوالى الساعة 6.30 الصبح بحماه دكتور حمدى أبو دكتورة رما ومعاه ولاده اتنين جم وطلبوا منى اسجلهم شفرة الأسانسير عشان يطلعوا ليهم لأنهم ساكنين فى الرابع والأسانسير بشفرة وبعدها بحوالي نص ساعة لقيت ولاد تانين شباب كانوا حوالى أربعة جم وقالولى انهم طالعيين لدكتور حمدى وسجلت ليهم شفرة الأسانسير وبعدها بشوية لقيت واحد خامس جه وطلع عالسلم ولما سألته رايح فين قالى طالع لدكتور حمدي وطلع عالسلم وبعدين على الساعه 12 الضهر لقيت أم دكتور ولاء بتتصل عليا وبتقولى الحق دكتور ولاء عنده  بلطجية فالشقة وقتها كان جارهم فالرابع أسمه مصطفى صديق كان نازل، وطلبت منه يطلع معايا نطمن على دكتور ولاء وبالفعل طلعنا وخبطنا على الباب وفتح لينا دكتور حمدى اللى هو حما دكتور ولاء وسألنا عايزين أيه وقتها قولناله هو فيه حاجة، قالنا فيه مشاكل عائلية وبس، وقتها نزلنا من البيت لأننا مشوفناش أى حاجة غريبة ولما سألت كابتن مصطفى صديق اللي هو جارهم فى نفس الدور هو فيه أي صوت ولا زعيق قاللي لأ أنا مسمعتش أي حاجة فاطمئنت وبعدها برضوا لقيت أم دكتور ولاء بتتصل عليا، وأنا قولتلها لو فيه حاجة أتصلي عالبوليس وبعدها أنا كنت قاعد مع عيالي ولقيت على الساعة 2.30 راجل بتاع دليفرى جه وجايب أكل وقاللى إنه جايب أكل عند دكتور حمدي وسجلتله الأسانسير وبعدها بحوالى نص ساعة اتفاجئت بصوت حاجة اترزعت عالأرض قدام العمارة ولما خرجت أشوف فيه أيه لقيت دكتور ولاء واقع على ضهره قدام العمارة وبعدها حاولت انجده وواحد جه معايا وشاله معايا ونقلناه على مستشفى النصر في حلوان لأنها اقرب حاجة.

س/ هل سبق أن حدثت ثمة مشاكل  بين المتوفى لرحمة مولاه وبين والد زوجته المدعو دكتور حمدي؟
حارس عقار صيدلى حلوان/ هو أحيانًا أنا كنت بعرف من أم دكتور ولاء بإن بينه وبين مراته بيحصل مشاكل وقتها كنت بشوف دكتور حمدي بيجى ليهم البيت وكان بيراضيهم على بعض ويمشى زى أي بيت.

س/ هل سبق وأن تعدي أيا من اهلية زوجة المتوفي عليه من قبل؟
ج لأ خالص

س: من تحديدًا حضر صباح اليوم للذهاب للمتوفى لرحمة مولاه؟
حارس عقار صيدلى حلوان/ هو فالأول عالساعة 9.30 الصبح كان دكتور حمدى حما دكتور ولاء وكان معاه عياله الأتنين شباب صغيرين وبعدها بشوية جه اربعة شباب برضو صحاب ولاده وبلغوني بإنهم طالعين عند دكتور حمدي وبعدها جه واحد خامس وقالى إنه طالع عند دكتور حمدي والخامس طلع عالسلم.

س/ هل كان بحوزة أيا من انفى البيان ثمة أسلحة؟
ج/ لأ

س/ هل تنامى إلى مسامعك ثمة أصوت تشاجر أو صياح؟
ج/ لأ خالص انا مسمعتش أي حاجة.

س/ كيف اتصل علمك بالواقعة محل التحقيق بداية؟ 
حارس عقار صيدلى حلوان/ هو اللي حصل إني اتفاجئت بأن جالى تليفون من أم كتور ولاء وبتقولى فيه أن دكتور ولاء عنده بلطجية فى البيت عنده وهى أصلًا مش ساكنة هنا دى قاعدة فى المنوفية.

س/ ما التصرف إلى بادرت بيه؟
حارس عقار صيدلى حلوان/ انا وقتها طلعت اخبط عليه عالباب وكان جاره فى نفس الدور قابلته نازل فى الأسانسير واسمه مصطفى صديق.

س/ ما صلة المدعو مصطفى صديق بالمجنى عليه؟
حارس عقار صيدلى حلوان/ هو جاره ومعاه فى نفس الدور وهما الاتنين في الدور بس.

س/ ما الذى حدث حال توجهك وسالف الذكر لشقة المجنى عليه؟
حارس عقار صيدلى حلوان/ انا الأول سألت مصطفى صديق إذا كان سمع حاجة أو زعيق جاى من شقة دكتور ولاء، وهو قالى لأ مفيش أي حاجة وبعدها أنا طلعت معاه خبطنا على الباب وقابلنا وقتها حماه الدكتور حمدي وقالنا أن عندهم مشاكل عائلية بعدها نزلنا من عندهم.

س/ هل قمتم بالدخول داخل الشقة محل سكن المجنى عليه.
حارس عقار صيدلى حلوان/ لأ احنا كنا بنكلم حماه من عالباب

س/ هل تلاحظ لكما ثمة شىء يدعو للشك آنذاك؟
حارس عقار صيدلى حلوان/ لأ خالص واحنا مكانش في بالنا أن فيه أي حاجة وحتى وقتها أم دكتور ولاء اتصلت عليا تانى بعد لما نزلت، وانا قولتلها لو فيه حاجة اتصلى إنتى بالبوليس، لأن انا طلعت ومكنش فيه أي حاجة.

س/ هل ابصرت واقعة سقوط المجنى عليه ولاء سعيد مصطفى من الشقة محل سكنه؟
حارس عقار صيدلى حلوان/ لأ انا سمعت صوت حاجة بتهبد عالأرض ولما خرجت أشوف ايه اللى بيحصل اتفاجئت بدكتور ولاء مرمي عالأرض على ظهره قدام العمارة.

س/ ما التصرف الذى بادرت باتخاذه آنذاك؟
حارس عقار صيدلى حلوان/ انا وقتها كل إلى جه في بإلى ان انجده وساعدنى واحد سواق توك توك ونقلناه على مستشفى النصر فحلوان

س/ ما حالة المتوفى لرحمة مولاء آنذاك. 
حارس عقار صيدلى حلوان/ هو كان جايب دم من بؤه ومناخيره.

س/ صف لنا هيئة المتوفى رحمه مولاه؟
حارس عقار صيدلى حلوان/ هو كان لابس قميض وبنطلون زى ما يكون خارج

س/ هل انتقل صحبتك ثمة أحد من اهل المتوفى  أو اهل زوجته والمتوجدين هناك؟
حارس عقار صيدلى حلوان/ انا وقتها مجاش فى بإلى غير أن انجده والحق انقله عالمستشفى وانا لما روحت المستشفى لقيت حماه الدكتور حمدى جه ورايا عالمستشفى وكان بيبص من بعيد بيشوف ايه اللي حصل بس مدخلش وسأل بنفسه عنه.

س / ما سبب حضورك لسراى النيابة وما الذى حدث عقب نقلك للمتوفى لرحمة مولاه آنذاك لمستشفى النصر وفقًا لما قررت سلفًا؟
حارس عقار صيدلى حلوان / أنا بعد لما نقلته عالمستشفى طلبوا منى البطاقة بتاعتى وأنا رجعت عالعمارة عشان اجبها ووقتها قابلت الحكومة وسألونى على اللى حصل وسألونى إذا كان فيه حد فى الشقة ووقتها مراتى بلغتني بأن محدش فالشقة وكلهم نزلوا، وبعدها أنا دليت الحكومة على بيت دكتور حمدي أبو دكتورة رماء مرات المرحوم لأنهم قاعدين فالشارع اللي ورانا ولما روحت ادلهم عالبيت لقيت دكتور حمدى وولاده ودكتورة رماء ومعاها ابنها يونس كلهم كانوا فالبيت.
س / صف لنا تحديدًا مكان سقوط المتوفى لرحمة مولاه آنذاك؟
حارس عقار صيدلى حلوان / هو كان واقع تحت البلكونة قدام العمارة.

س / هل يوجد بالعقار محل الواقعة ثمة كاميرات مراقبة؟
حارس عقار صيدلى حلوان / لأ مفيش كاميرات فالعمارة خالص
س / هل تشتبه جنائيًا في وفاة المتوفى لرحمه مولاه؟
ج / انا والله يا باشا معرفش ومشوفتوش حتى وهو بيقع
س / هل لديك اقوال أخرى؟
ج / لأ. تمت اقواله وتوقع منه.