لماذا اعتذر سيد رجب عن فيلم "المهاجر" ليوسف شاهين؟

قال الفنان سيد رجب إنه كان سيشارك في فيلم "المهاجر" لكنه اعتذر عن عدم المشاركة ورفض الدور قبل التصوير.

وأضاف سيد رجب، خلال لقائه في برنامج "أسرار النجوم" من تقديم الإعلامية إنجي علي عبر إذاعة وقناة "نجوم FM": "سنة 1993 عملت فيلم مع خالد الحجر دور صغير مشهدين أو 3 بعدها كنت بعمل مسرحية وأستاذ يوسف شاهين وأستاذ خالد يوسف شافوا المسرحية، ويوسف شاهين اتفق معايا على دور في فيلم المهاجر لكن محصلش نصيب ومشتغلتش فيه".

وأوضح سبب عدم مشاركته في فيلم "المهاجر" قائلًا: "مختلفناش أنا اللي فكرت غلط ودلوقتي لو جالي دور مشهد واحد في فيلم مع مخرج عظيم هروح عشان اتعلم لكن أنا وقتها كنت صغير ومش فاهم، كنت وقتها رايح سويسرا بنعرض المسرحية في مهرجان زيورخ، وقالي لما ترجع نبدأ نعمل البروفات".

واختتم سيد رجب حديثه قائلًا: "ولما رجعت حد كلمني من المكتب لقيت سيناريو جديد ولقيت الدور بقى نصه أو ربعه وقلت مش دا الدور اللي أعمله ومينفعش أنا جاي على دور معين ودا دور ممكن أي حد يعمله واعتذرت".