الورقي
تامر حبيب لصناع «الهرشة السابعة»: طاير من السعادة وغيران منكم
أعرب السيناريست تامر حبيب عن إعجابه بمسلسل «الهرشىة السابعة»، وذلك عبر حسابه على موقع التواصل الاجتماعي «فيس بوك».
وكتب: «بصراحة أنتوا ناويينها وقاصدينها من أول الأفيش أنا شديد الإعجاب والاستمتاع بتفرج بجد على الحلقة مرتين في اليوم.. أنتم أثبتوا إن مفيش حاجة اسمها الظروف، ولا الوقت، ولا إنك تعمل حالة وتحكي حدوتة وتوصل مشاعر زي دي هي حاجة مستحيلة».
وتابع: «أثبتوا إن التأثير اللي بيحصلك من فيلم والشحنة اللي بتتشحنها ممكن تحصلك من مسلسل، وتفضل مستني الحلقة الجديدة بفارغ الصبر مع إن مافيش لا جريمة قتل ولا مطاردات ولا تشويق ولا مجرم فاكرينه موسى ويطلع فرعون».
وأكمل «تامر»: «أثبتوا إن الصمت ممكن يبقاله تأثير أكتر من الكلام، أثبتوا إنكم ومن غير تقليد ولا قصدية وتخلوني استمتع قدام الحلقة نفس المتعة اللي بأحسها وأنا بتفرج على فيلم أوروبي اجتماعي جرىء ودايس على الجرح وبيشرح بمشرط دانتيل.. نيجي بقي للفخر والفشخرة أنا شديد الفخر وطاير من السعادة تقريبًا بكل الناس اللي هرشوا دماغي ومشاعر الهرشة دي».
وأضاف: «أصل تتر المسلسل ده مكتوب عليه كمية أسامي بجد بجد بجد هما إخواتي وأولادي وأجدع وأحلى صحابي.. بجد بجد بجد، كلكم عمري ما شفتكم بالحلاوة دي قبل كده وفرحان بيكم فرحة الأهبل وأقر واعترف إني وبكل حب وفخر غيران من جمالكم ما شاء الله، غيران أحلى غيرة بيحس بيها الفنان لما بتصيبه، اللي انتوا عاملينه ده صعب قوي وحلو قوي قوي ويشرف قوي قوي قوي.. يا بتوع الحاسة السابعة.. ألف مبروك على هذا الإبداع، وألف شكر على كل هذا الاستمتاع».
مسلسل «الهرشة السابعة» بطولة: أمينة خليل، ومحمد شاهين، وعلي قاسم، وأسماء جلال، وعايدة رياض، وحنان سليمان، وهو إخراج كريم الشناوي.
