الورقي
متضررو «كارتة طريق السويس» يقدمون اقتراحات للمسئولين لحل الأزمة.. اعرف التفاصيل
ناشد متضررو وجود بوابة رسوم "كارتة" على طريق السويس من سكان مدينتي والشروق وبدر، المسئولين بضرورة إنشاء طريق بديل للطريق بدون رسوم والقاعدة هو عدم وجود رسوم للتنقل والاستثناء أن ينشأ طريق آخر متميز بديل للأصلي تطبق عليه رسوم.
وقال أحد المتضررين، إن المشكلة ليست فقط في بوابات تحصيل رسوم أمام سكان مدينة الشروق ومدينتي وبدر بل شكواهم أنها ستمثل عائقا كبيرا في الزحام الشديد في الصباح والمساء حين ذهابهم إلى أعمالهم وعودتهم أيضا، مؤكدين ان مشهد الزحام بدأ من الآن ومع بداية بناء البوابات الخاصة بـ "الكارتة".
وبدأ سكان مدينة الشروق ومدينتي وبدر بتفعيل جروب خاص تحت اسم "لا لكارتة طريق السويس" والتي تحظى بمشاركة أكثر من 7000 عضو، وتهدف لتوصيل صوتهم إلى الجهات المسؤولة قبل بناء بوابات تحصيل الرسوم " الكارتة".
وفعل سكان مدينة الشروق ومدينتي وبدر هاشتاج على تويتر #لا لكارتة_طريق_السويس_قبل_المدن_الجديدة، حتى يصل صوتهم إلى الجهات المسؤولة في الدولة.
وتفاعل بشكل كبير سكان مدينة الشروق ومدينتي وبدر مع الهاشتاج، وناشد عدد كبير من السكان بضرورة عمل وقفة احتجاجية قبل تفعيل البوابات ولكن قوبلت بالرفض من السكان، كون تلك الوقفات تحتاج إلى تصريح، وطلب عدد آخر ضرورة تدخل أعضاء مجلس النواب على رأسهم نواب حزب مستقبل وطن لإيقاف إنشاء بوابات الرسوم أو استثناء السكان من هذه الرسوم.
وكان من أكثر التعليقات المتشابهة "ليه أنزل من بيتي وارجع وأدفع رسوم كل يوم مقابل الذهاب والعودة إلى منزلي، وأخرى تطالب بضرورة اذ تم تفعيل هذه الرسوم فإنه من الضروري أن يكون هناك تصاريح مجانية لقاطني الشروق ومدينتي وبدر.
وقال أحد المتضررين:"بصوا يا جماعة مفيش حاجة اسمها ادفع إجبارى حضرتك عامل طريق زى سالك فى دبى اعمل نظام زى دبى متعطلش الناس وبوابات وكارتة كل واحد يعلق كارت فى عربيته والى ميشحنوش مخالفة وعلى شرط ان فى المقابل يكون فى طريق بيوصل ممهد ونضيف وبرضه لنفس الاماكن بدون رسوم وميبقاش سالك والمواطن يختار لكن مفيش حاجة اسمها علشان اوصل ادفع مستحيل طبعا ومشوفتش كارتة بصراحة قبلها مناطق سكنية، وبعدها مناطق سكنية جديدة دى الكارتة فى اول الطريق السريع الا لو هنستخدم البطئ من الرحاب ونمر على الدورانات ونعدى من جمب الكارتة بدون ما نقف ولا نتعطل فده موضوع تانى ومعتقدش ان ده هيحصل".
وتابع:" فالمفروض الكارتة دى تتعمل بعد آخر مدينة سكنية أو صناعية واعتقد تقريبا بدر ومننكرش مجهود الدولة فى تطوير الطريق فى زمن قياسى وبكفاءة عالية وشكرا للدولة وجيشنا العظيم بس الرجاء مراجعة مكان الكارتة".
وقال آخر: طريق السويس "اللي هو كان متجدد من ٣ سنين أساساً" متكلف ٥٠٠ مليون جنيه، يعني بحسبه بسيطة لو ثمن الكارتة ٥ جنيه زي بتاعت المركز الطبي، يعني محتاج ١٢٨ ألف عربيه تعدي يوميا في الاتجاهين و ده طبعا هيتحقق يوميا.
يعني انت عايز تجيب ثمن الطريق كل سنة اللي هو واصل حسابه من الضريبه أساسا، بخلاف النقل الثقيل".
وتحدث السكان عن التكدس المروري الذي سيحدث يومياً بعد إنشاء بوابة الرسوم" الكارتة"، قائلاً: "انتم متخيليين الزحمة اللي هتحصل يوميا في الخروج والدخول بتقفل على ٤ مدن جديدة مليانة سكان وده طريقهم الوحيد عشان يروحوا اشغالهم يوميا بكارتة وتعدي عربية عربية حتى لو عامل ٨ حارات، أي عقل ومنطق بجد اللي خد القرار ده، وفي الدول المحترمة بيدوا طرق بديلة مجانا بتكون أزحم شوية أو أقل في الكفاءة لكن احنا عندنا ياتدفع وتقف في الزحمة يا ماتخرجش من المدينة يعني مساجين من الآخر، واحنا مش مساجين وبندفع ثمن خروجنا من الآخر
هما قاصدين الطريق يبقى زحمة وتقعد ساعة لغاية ما تعدى علشان لما تفتح الكارتة ويحصل شوية سيولة فى المرور تبقى فرحان وتدفع وأنت مبسوط".
