الورقي
عمرو محمود ياسين عن جدل «وننسى اللي كان»: أنا صوتي من دماغي
رد المؤلف عمرو محمود ياسين على تعليقات الجمهور حول مسلسله الجديد «وننسى اللي كان»، المقرر عرضه في رمضان 2026، وذلك بعد حديث البعض أنه يحكي قصة فنانة.
وكتب، عبر حسابه على موقع التواصل الاجتماعي «فيس بوك»: «بقرأ كتير بوستات وتعليقات عبيطة وبضحك من سذاجة المكتوب كلمتين هقولهم، عمر ما حصل ولا هيحصل إني اكتب الدراما بتاعتي لخدمة أهداف محددة لا حصل ولا هيحصل ولا عمر ده اتطلب مني أصلًا».
وتابع: «أنا بحترم مهنتي جدًا وصوتي من دماغي أنا مؤلف بيحضر تصوير كل شوت في مسلسله عشان أضمن دايمًا أن النص بتاعي بيسير في الاتجاه اللي أنا مقتنع بيه، وبقف على الكلمة والحرف وكل اللي اشتغلوا معايا عارفين الكلام ده».
وأضاف: «يعني قصة أي مسلسل هي قراري واختياري.. عنوان المسلسل.. أسماء الشخصيات.. كل حرف وكلمة هو ملكي ومسؤوليتي.. وفي نفس الوقت بيتم في إطار شغل جماعي واحترام متبادل بيني وبين كل عناصر العمل».
وأكمل «عمرو»: «لكن أي بقى تفصيلة تتشابه أو تتقاطع مع أي شخصية في الحياة فـ ده أمر وارد لأن أي مؤلف في الدنيا ينهل من وعاء الحياة والمجتمع اللي عايش فيه.. كفاية افتراضات ساذجة، والحمد لله إني بشتغل دايمًا مع فنانين ونجوم محترمين أقدر حجمهم وبيقدروا دوري وشغلي.. وأشوفكم قريبًا في رمضان إن شاء الله».
و«ننسى اللي كان» بطولة: ياسمين عبد العزيز، وكريم فهمي، وإنجي كيوان، وخالد سرحان، ومنة فضالي، ومحمد لطفي، لينا صوفيا، وهو إخراج محمد الخبيري.
