الورقي
شريف منير يروي تفاصيل لحظة وفاة طارق عبد العزيز: شوفته وروحه بتطلع
كشف الفنان شريف منير كواليس تصوير الفنان طارق عبد العزيز معه، اليوم الأحد، أحد مشاهد مسلسل «وبقينا اتنين».
وقال شريف منير، خلال مداخلة هاتفية لبرنامج «الحكاية» للإعلامي عمرو أديب، على قناة Mbc مصر، إن الفنان طارق عبد العزيز يجسد دور «شريف» بالمسلسل، وإنه كان في حالة تألق أثناء التصوير، وإن كل شىء كان يسير بشكل طبيعي.
وأضاف: «في مشهد أنا بعمله هو وممثلة شابة بتيجي ترن جرس وهو بيفتح الباب وأنا بدخلهم الكادر وهو في وسطنا وبيسبنا وبيخرج وعملنا بروفة وصورنا أول مرة الشوت وكان واقف جنبي والمخرج قال عاوزين نعمله مرة تانية».
وتابع: «والمخرج بيقول أكشن جه طارق نحيتي وشوفت لونه بيروح وسند عليا وأعد على كرسي وسند دماغه على واحد واقف قصادي وقالي مش قادر أقف على رجلي وجسمه أصفر وفجأة أبيض وجسمه سقع وحاولت أدلكله قلبه ولقيت عينه مرفوعة لفوق وفتحتله القميص وجيت أسمع ضربات قلبه مسمعتش حاجة».
وأكمل شريف منير: «قمنا بنقله للمستشفى ولما رحنا الدكاترة قالولنا إنه جه المستشفى متوفي وأنا شوفته وهو روحه بتطلع».
توفي طارق عبد العزيز داخل لوكيشن مسلسله الجديد «وبقينا اتنين»، عن عمر ناهز الـ55 عامًا، إثر تعرضه لأزمة قلبية مفاجئة.
ومن المقرر تشييع الجثمان، غدًا الإثنين، بعد صلاة الظهر، من مسجد الشرطة بالشيخ زايد.
