الورقي
صديق عاطف سعيد يروي موقفًا مؤثرًا له قبل وفاته: مات بحسرته
كشف الفنان الشاب عمر غانم، موقفًا مؤثرًا، جمعه بالفنان الراحل عاطف سعيد، موضحًا أنه توفي بعد معاناة مع قلة العمل، وسوء ظروفه الصحية والمادية.
وكتب، عبر حسابه على موقع التواصل الاجتماعي «فيس بوك»، قائلًا: «إنا لله وإنا إليه راجعون.. انتقل على رحمة الله تعالى منذُ قليل الفنان الأستاذ عاطف السعيد.. سامحوني على الكلام اللي هقوله ده لكن أنا حزنت حزنًا شديدًا لما عرفت الخبر».
وتابع: «كنت كل ما أعدي من جنب قهوة صدفة اللي جنب المعهد كنت ألاقي عم عاطف قاعد لوحده مهموم كان أول ما يشوفني يقول لي تعالى أقعد أشرب معايا شاي أقعد معاه يقعد يشتكي ليا من قلة الشغل ويحكي ليا قد ايه هو بيحب الفن ومش عارف يعمل حاجة غيره رغم ظروفه الصحية والمادية الصعبة ويقعد يحكي ليا عن مواقف ووعود كاذبة بياخدها من نجوم كبار.. وإنه عايز ينزل تصوير بأي شكل».
وأضاف: «كانت آخر مرة شوفته من حوالي أسبوعين كنت في تصوير ولقيته هو وابنه اللي ربنا يتولاه من بعده في اللوكيشن بالصدفة فـ بسأله بتعمل ايه هنا يا عم عاطف رد وقال لي جي اسعى وأقابل المخرج والنجم فلان علشان كان قايل لي إنك معايا في المسلسل اللي جي.. وقال لي يا عمر أنا ممكن أعمل زي ناس كتير وأنزل بوست وأطلب شغل وأعمل زي كل اللي بيعملوا كده النهاردة.. لكن كرامتي متسمحش لي أعمل كده».
وأكمل: «اللي مزعلني بجد إنه كان مكلمني من أسبوع كده وطلب مني إني أروح معاه لشركة لما عرف إن صاحب الشركة صديقي وأنا وعدته أول ما أرجع القاهرة هكلمه ونروح سوا وسبحان الله كان في بالي امبارح إن اكلمه وأقول له إني راجع خلال يومين لكن ربنا افتكره».
وأنهى «عمر» منشوره: «عم عاطف كان راجل محترم ومكافح وعنده عزة نفس.. عم عاطف كان فنان جميل وقدر يعلم معانا بمشاهد بسيطه لكن أثبت وجوده بيها وطول ما أنا معاه كانت الناس لما تشوفه تجري تتصور معاه وكان يبقى فرحان أوي.. وسامحوني على كلمة عم لكن أنا كنت متعود أقولها له
الأستاذ عاطف مات بحسرته.. لكن راح لربنا العدل.. وكان في كلام كتير لكن للأسف مش كل اللي اتقال يتحكي.. ربنا يرحمه ويغفر له ويسكنه فسيح جناته ويلهم أهله وذويه الصبر والسلوان».
وتوفي الفنان عاطف سعيد، في الساعات الأولى من صباح اليوم، الخميس، ولم يحدد موعد أو مكان الجنازة حتى الآن.
