رئيس التحرير
خالد مهران
count
count

قصة حقيقية.. معلومات سريعة عن مسلسل "بالطو" قبل عرضه على WATCH IT

مسلسل بالطو
مسلسل بالطو

نشر المؤلف أحمد عاطف، عبر حسابه الرسمي على موقع التواصل الاجتماعي "فيسبوك" البوستر الرسمي لمسلسل "بالطو" المقرر عرضه على WATCH IT يوم 8 فبراير.

وكشف أحمد عاطف، معلومات عن المسلسل قائلًا: "وأخيرًا.. البوستر الرسمي لمسلسل بالطو.. شوية معلومات سريعة عن المسلسل".

البوستر الرسمي لمسلسل بالطو

مسلسل بالطو

 وقال مؤلف مسلسل بالطو: "المسلسل هيتعرض على WATCH IT يوم 8 فبراير إن شاء الله.. المسلسل مأخوذ عن رواية (بالطو وفانلة وتاب) إخراج أ / عمر المهندس، قصة وسيناريو وحوار أحمد عاطف فياض (اللى هو أنا.. وهيجي حد يسألني يقولي و"فياض" دي جت منين... هرد عليه وأقوله ده أسمى الثلاثي عادي وهيبقى مكتوب ثلاثي كده ع التتر إن شاء الله.. وده لسببين، أولًا عشان فيه كذا (أحمد عاطف) في الوسط الفني مخرج وموزع موسيقى ومدير تسويق فلازم أضيف "فياض" منعًا لتشابه الأسماء".

وأضاف: "وثانيًا وده السبب الأهم عشان الفنانة فيفي عبده والاستاذ أحمد عبد العزيز ما يعرفوش إنه أنا ) اه وفيه لعيب كورة كمان في نادي فيوتشر وجاي الأهلي اسمه أحمد عاطف.. مش فاهم انا ايه الحوار ده... الواحد مش عارف يتهنى بـ أسمه!!".

وتابع أحمد عاطف: "المسلسل عن أحداث قصة حقيقية... اللي هي قصة حياتي.. اللي أعتقد إن أي دكتور شاب بيتخرج في مصر بيعيش وهيعيش قصة مشابهة ليها.. الاحصائيات بتقول ان مسلسل "جريز أناتومى" على مدار السنين اتسبب في دخول قرابة 200 ألف شخص لكلية الطب... على أمل انهم يعيشوا أجواء شبيهة ".

معلومات عن مسلسل بالطو

واستكمل: "بإذن الله (بالطو) يحقق نفس المعادلة والــ 200 ألف اللي دخلوا طب بسبب جرايز أناتومى يطلعوا من الكلية بسبب مسلسل بالطو" مضيفًا: "المسلسل 10 حلقات من بطولة: نجوم كتير جدًا عملوا اللي عليهم وزيادة وفعلا اشتغلوا من قلبهم في العمل وأنا بشكر كل واحد فيهم من أصغر دور لأكبر دور".

وأوضح: "من ساعة ما أعلنت إن (بالطو وفانلة وتاب) هيبقى مسلسل.. ناس كتير بتدخل تسألني تقولي مين اللي هيعمل دورك في المسلسل... اللي يسألني ويقولي أحمد أمين؟... واللي يقولي أحمد عيد ؟.. واللي يقولي ماجد الكدواني؟.. فمع حبي الشديد لكل النجوم الكبيرة دول بس المرحلة العمرية للدور محتاجة حد أصغر فــاللي هيعمل دوري في المسلسل هو الفنان ماجد المصري".

واختتم أحمد عاطف قائلًا: "طبعا مفيش ماجد المصري بهزر.. ما انتو شايفين البوستر اهو يا جماعة.. اللي هيقوم بالدور هو الفنان الشاب الموهوب جدًا جدا ً عصام عمر، وأتمنى في النهاية إن المسلسل يعجبكو إن شاء الله... عشان لو معجبكوش..هنتريق عليه هنا ف الصفحة عادى خالص... أنا معاكو في أي حاجة".