عضها كلب في منطقة حساسة.. رحمة حسن تكشف تفاصيل واقعة مرعبة

كشفت الفنانة رحمة حسن، عبر حسابها الرسمي على موقع "إنستجرام" عن تعرضها لهجوم من كلب شرس، لافتة إلى أنه قام بعضها في منطقة حساسة ونقلت على إثرها إلى المستشفى.
وروت رحمة حسن، تفاصيل الواقعة، قائلة: "إمبارح الساعة 11 بليل كنت نازلة أجيب حاجة من السوبر ماركت جمب البيت، كنت ماشية على الرصيف وكان في عربية بتركن جمبي عادي، فجأة الباب اتفتح ولقيت كلب جيرمن شيبرد بيهجم علي بكل قوته".

وأضافت: "طبعا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".

وتابعت: "صاحبة الكلب كتر خيرها أخذتني فورا على مستشفى إمبابة، أدوني حقنة تطعيم الكلب ولسه فاضل لي 4 هاخدهم خلال شهر، بس المشكلة إن من إمبارح الجرح بينزف دم كتير، وأنا طبعا خايفة ومصدومة وتعبانة وعندي تروما من إمبارح واللي واجعني أكتر أني مَش عارفه اتصرف إزاي، خصوصا أني أكيد مَش عايزة الكلب يتئذي، بس كمان مَش عايزة أي إنسان كمان يتئذي ويتعض ويتبهدل في الشارع زيي".
وأستكملت رحمة حسن: "أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالت لي متخافيش هو عض ولادي قبل كدة وتمام محصلش حاجة".
وأوضحت: "طبعا أنا اتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه ويحاسب على إهمال مسؤوليته، خصوصا لو إهماله تسبب لشخص تاني في أذى بدني يحتاج أكتر من 21 يوم علاج وأذى نفسي ماعرفش هايحتاج قد إيه عشان يخف".
واختتمت حديثها قائلة: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جدا.. أنا أسفة طولت عليكم بس أنا بجد مَش عارفة المفروض أعمل إيه عشان محدش تاني يتأذي".