رئيس التحرير
خالد مهران
count
count

بالفيديو| تفاصيل صادمة في تعدي منقذي سباحة نادي "6 أكتوبر" على عضو وأسرته

مشاجرة نادي 6اكتوبر
مشاجرة نادي 6اكتوبر

تعرض عضو بنادي مدينة 6 أكتوبر وأسرته "زوجته وطفله، الذي لا يتعدى الـ 5 أشهر"، للضرب والسب والقذف على يد منقذين حمام السباحة أثناء نزول العضو مع ابنه لحمام السباحة.

وقال العضو، أحمد علي، في منشور له على جروب نادي مدينة 6 أكتوبر: "أنا ومراتي وابني الخمس شهور، اضربنا واتشتمنا في حمام السباحة الخاص بالأطفال، أقل من 5 سنوات، مافيش أي إرشادات أو لافتات تنفي أو تأكد المعلومة، ولكن اعرف المعلومة شفهيا من زمان".

وتابع قائلاً "ابني عنده 5 شهور روحت النادي عشان أنزله الحمام الخاص بالسن ده، وبما إن الحمام صغير مش هينفع أنزل بجسمي كله، وبالتالي قعدت على سور البسين عشان أقدر أمسك ابني لاقيت المنقذ الأول «ع.ج»، بيقولي مش هينفع تنزل هنا قولت له أنا مش نازل أنا همسك ابني بس وأنا قاعد كده، قالي انزل به في البسين الكبير قولت له البسين الكبير أقل حاجة فيه متر ونص، ومش هاقدر أنزل به فيه قالي انت قاعد قدامي وحاجب عني الرؤية قلت له حاضر هتحرك،  وفعلا روحت الناحية التانية من حمام السباحة، وشي في وشه وبمشي برجلي فقط ماسك ابنى من ايده و بتحرك به".

وأضاف العضو "مرة واحدة فوجئت بمنقذ آخر «أ.ج» انت ماينفعش تتمشى في البيسن هو احنا هنفضل نهاتي مع الناس ايه القرف ده، وطلبت منه أن يأتي بالأمن أو المشرف بتاعك، ليرد مش هجيب حد ويقولي هو أنا كل ما اكلم حد يقولي الكلمتين الفارغين دول، وتوجعوا لنا دماغنا مابلاش قرف، فضلت أقوله يا ابني يا حبيبي عيب واتأدب فى الكلام، ورد عليا، وقالي وأنا همرمط بكرامتك وكرامة أهلك الأرض، ومن هنا بدأ تبادل الألفاظ بيني وبينه وفجأة لاقيته وابني في ايدي بيجري عليا هو المنقذ التاني "أخوه" ومراتي في ضهري، ومدوا ايدهم علينا و ما فيش اي اعتبار لوجود ست وطفل عنده خمس شهور اللي "اتخبط في وشه وأنا كنت ماسكه في صدري، ولولا تدخل الأعضاء اللى ماكانوش راضيين عن تصرفاته وأسلوبه ومستائين من حال النادي وبيقولوا ان التصرفات والأسلوب ده بيحصل معاهم كل يوم ومشكورين اتبرعوا، وشهدوا معايا في مذكرة بإدارة النادي، وفضلت أزعق عاوز الأمن ومدير الأمن «اللى كان للأسف اجازة» وكان مكانه مدير الوردية التانية الأستاذ قرني اللى حضر بعد أكتر من ربع ساعة، والنادي ملموم ومافيش بتاع امن واحد اتحرك ولا استخدم جهازه اللاسلكي، عشان يبلغ بالمشكلة وخلال المشكلة وقبل ما مشرف الوردية يوصل، جه شخص مسئول عن البسين أخد الشخصين وخفاهم تماما وماشوفناهمش بعد كده خالص".

واختمم العضو أحمد علي- صاحب الشكوى- حديثه "روحت مع الأستاذ قرني مكتب الأمن عملت مذكرة، ومستنين مدير الأمن لما يجي عشان يطلع عليها ويديها رقم وتطلع للشئون القانونية ومدير عام النادي".