مواطن يكشف تفاصيل معاناه سكان الأسمرات بعد سحب وحداتهم السكنية

بدأت الحكومة في الفترة الأخيرة سحب عددا كبيرا من الشقق السكنية من ملاكها في حي الأسمرات لاسيما بعد قيام بعضهم بتغير نشاطها من وحدات سكنية لتجارية بجانب تأخر العديد من السكان في دفع الإيجار الشهري.

 

وقال أحد السكان في منشور له على إحدى جروبات موقع التواصل الاجتماعي" فيس بوك":

"أهالي الأسمرات دول أهالي منشأة ناصر ومثلث ماسبيرو وغيرهم اللي اتنقلوا من بيوتهم لحي الأسمرات عشان دخلت حزام استثماري " شركة اعمار الاماراتية " وأرضهم اتباعت بمليارات الدولارات فالحكومة العظيمة عشان تطلعهم من بيوتهم وعدتهم "شفهيا " انها هتديهم شقق مفروشة بحي الأسمرات فور الانتهاء منه ولمدة 18 شهر بين اخلاء منطقة الدويقة بمنشأة ناصر وتسليمهم الشقق في الأسمرات كانت بتديهم بدل سكن "300 جنيه لكل أسرة " وفعلا تم دفع البدل بانتظام لبعض الاسر والبعض الاخر تم تسكينهم بشكل مؤقت ب 6 اكتوبر و 15 مايو "بدون مقابل ".

وتابع: "بعد الانتهاء من حي الأسمرات تم تسكينهم بالمدينة بشقق 65 متر بالمنقولات وحظر عليهم احضار أي اثاث معهم لوجودها بالشقق والشقق اتصورت وحفلات ومهرجانات والاعلام كله اتكلم على دلع الحكومة للغلابة دول المهم انهم اثناء الزحمة دي بصموهم ومضوهم على عقود فيها بند بيقول ان الايجار 300 جنيه والمسئولين قالولهم مش هتدفعوا ولا مليم وأول ما الاعلام مشي والسيسي مشي راحوا دفعوهم عن كل شقة 6000 جنيه تحت بند تأمين وصيانة ورسوم إدارية ومات الحوار على كده".

واستكمل: "بعد نتيجة الانتخابات الرئاسية الاخيرة بيوم واحد تم تعليق منشور بحي الاسمرات عبارة عن انذار لجميع السكان انهم لازم يدفعوا ال 300 جنيه ايجار اللي ميعرفوش عنها حاجة وبأثر رجعي منذ استلام الشقق يعني كل شقة تدفع بتاع 6000 ل 7000 جنيه او يتم طردهم وفعلا بدأت مناوشات مكتب الاسكان بتهديد السكان بالطرد في حالة عدم الدفع راحوا السكان عاملين وقفة صغيرة بيستغيثوا بالمسئولين والسيسي لنجدتهم".

وقال: "الامن قبض علي 11 منهم فيهم 6 سيدات واخدوا 4 ايام حبس واتجددلهم 15 يوم والاعلام ممنوع من تغطية اي حدث والصحفيين والمهتمين بالحق في السكن ممنوعين من الاقتراب من كامب الاسمرات, هقولكم ليه "كامب " وحتي المحامي المهني اللي رافعين معاه القضية علي الاسكان اتهدد انه يسيب القضية". 

وتابع "المهم النيابة وصلت مع الناس لاتفاق ان المقبوض عليهم يدفعوا مصالحة "جزء من الايجار " مقابل ان الحوار يخلص ويطلعوا وبالفعل الناس شحتت الفلوس من بعض ودفعوهم لمسئول الاسكان قدام النيابة عشان الناس تطلع فالناس برضه مطلعتش بس كمان عائلاتهم اطردوا فعلا من شققهم من يومين ".

وأضاف: "أثناء الطرد احد السكان الكبار في السن مات بالسكتة القلبية من القهرة والحسرة على رميته في الشارع بعد العمر ده وبعد ما كل الاعلام باعوا واشتروا بانجازات السيد الرئيس في حي الاسمرات لمعدومي الدخل" .

وقال: "انا  قلت كامب ليه ؟ الاسمرات مش زي ما الناس متخيلة هيا مش التجمع ولا الرحاب والله دى مدينة سكنية كويسة كتصميم وشكل لكنها معدومة الخدمات والحياة بمعني ان كل سكانها شغالين في منشأه ناصر ومثلث ماسبيرو واماكن تانية عشان اصلا مش مسموح لحد يشتغل هناك ولا فيها اي خدمات الا شوية محلات " مقفولة " وبس وكل اللي عايز حاجة لازم يطلع برة المدينة يجيبها ويرجع وممنوع طبعا انهم يعملوا اي حاجة جوه ولا يفتحوا محلات ولا حتي عربية كبدة فالواحد منهم برغم فقره عشان يروح شغله لازم يروح من الاسمرات في المقطم لوسط البلد او مثلث ماسبيرو او منشية ناصر ".

وأضاف : "ياريت بقا الناس اللي عمالة تردد نغمة الاعلام الرسمي بتاعة ان الحكومة لمتهم واديتهم بيوت وهما مش عاجبهم وايه يعني ال 300 جنية دول يهدوا شوية ويفوقوا كده ، عشان المفروض دي بيوت تعويضية عن بيوتهم مش مطلوب منهم يدفعوا ايجار عن بيوتهم حتي لو تم استغلال سذاجتهم وجهلهم وفقرهم وده اسمه " نصب واحتيال " ومش مطالبين بدفع حاجة غير المرافق زي ماكانوا بيدفعوا في بيوتهم القديمة والا كانت الحكومة بتديهم بدل سكن ليه قبل السكن في الاسمرات".

وتساءل: " هل الموضوع كان مجرد شو اعلامي وانجاز على الورق وخلاص ونعدي الزيطة ونسحبه منهم ونبيعة للمحاسيب والباشوات تاني ونرجع لدايرة فساد مبتنتهيش مع ان بيوتهم القديمة اتباعت بمليارات " استثمار بقي".

وختم قائلا: "انا كاتب البوست ده وعارف ان ممكن يسبب لي خطورة امنية ورغم كده اللي يشوف الغلب اللي الناس دي فيه يعمل اي حاجة لنجدتهم، ياريت اي حد مهتم بالحق في السكن او اي حد يعرف حد من سكان الاسمرات او حتي سكان منشاة ناصر ومثلث ماسبيرو يفهم منهم الوضع ايه ويتكلم .. للاسف مبقاش حيلتنا ولا نقدر نعمل غير الكلام".