ads
ads

مواقف وطرائف ومعاناة شباب التعداد السكاني

فتاة تعمل في التعداد
فتاة تعمل في التعداد
محمود حفنى
ads


«إيه اللى حصلك النهارده؟».. هذا هو السئوال الذي يتداوله الشباب المشارك في تعداد مصر لعام 2017، تحت تنظيم الجهاز المركزى للتعبئة العامة والإحصاء.


الشاب المشارك في التعداد  يطلق عليه "معاون تعداد"، وعمله عبارة عن تعب ومأساة ومواقف مضحكة، إذ يتجول في الشوارع ويتنقل  بين المباني، حاملا معه جهاز التابلت الذي استلمه من جهاز التعبئة العامة والإحصاء ومضى إقرارًا بالحفاظ عليه، محاولا التحدث مع المواطنين وأخذ بياناتهم.. لكن غرابة هذه الوظيفة في مصر تجعل معاون التعداد يتعرض لمواقف كثيرة منها الحرجة ومنها الخطرة، وأكثرها المضحكة.


وعلى الرغم من العمل الشاق الذي يمارسه شباب التعداد السكاني، إلا أنهم لم يفقدوا الأمل في مواصلة خدمة بلادهم بالطريقة التي يعملون بها، ومن أجل تبادل المواقف والاستفادة من خبرات بعضهم البعض أنشأوا "جروب" على موقع التواصل الاجتماعي "فيس بوك"، ليحكي كل واحد منهم المواقف التي تعرض لها.. ويرصد "النبأ" منه بعض الحكايات الطريفة عبر السطور التالية.


يقول أحد الشباب: "النهاردة حصل موقف يضحك روحت بيت أخد البيانات الست كانت بتدينى البيانات وفجأة جوزها طلع لقح مراته وقالى نعم في إيه.. قولتله تعداد قالى ورينى اللى في إيدك ده ولقيته بيحط صباعه في بقه عشان يفر التابلت.. قولت يا مصيبتى ده تابلت يا حاج.. هههههه قطفته منه وجريت.. هيا ناقصة قرف".


ويحكى آخر موقفًا طريفًا حدث معه، قائلا: "صباح الخير يا حاجة.. أهلا يابني صباح النور.. إحنا تعداد سكان.. أهلا وسهلا.. البيت باسم مين.. باسم ... ... .....تمام .... الأسرة .. كام ذكور ... كذا.. كام إناث ... كذا... بقولك يابني .. أأمري يا حاجة.. أنا عندي بنتي نهى الله أكبر تربية إنجلييزي وست بيت عالمية..ربنا يبارك ياحاجة .. رقم التليفون.. وسهير حقوق و قمر ١٤.. ربنا يخلي ياحاجة .. رقم تليفون.. تاخد تليفون نهى ولا سهير .. باريت تليفون أبوهم ياحاجه.. أنت متجوز؟.. ومعايا ٣ أولاد ياحاجة.. الباب طاااااااخ .. ياحاجة .. ياحاجة .. طب أطلقها ياحاجة طيب".

مواقف وطرائف ومعاناة


الشعر يرصد معاناة شباب التعداد

فيما كتب آخر مجموعة من أبيات الشعر عن المعاناة التي يتعرض لها كل يوم، قائلا: "بين البلوكات والمباني أسئلة كتير فى خيالى..ناس بتهرب من السؤال وتقول أنا مالي.. يتهموني ضرائب ولامخابرات ولاعقاريه مباني.. لا يا افندم دا أنا بتاع التعدد السكاني.. وجهاز و دى بي اس مش عارف مكانى.. ومفتش كل يوم عايز تقرير ميداني.. وقبض طاير نصه رسوم إداري".


اقرأ أيضًا.. "القوى العاملة" تعلن عن فرص عمل للكويت.. تعرف على المهن المطلوبة

مواقف وطرائف ومعاناة


يوميات معاون مطحون

فيما روت إحدى الفتيات المشاركة في التعداد، تحت اسم "يوميات معاونة مطحونة " قائلة: "داخلة بيت فى الصباح لاقيت واحدة بعد أما إدتنى البيانات تقولى إيه .. ده أنتي عليكى صحة شيفاكى من الصبح بتدورى فى المنطقة ..قالتلها والله رجلي ورمت من اللف ياحاجة.. قالت لي مش باين ده التعداد حلو أوى ياولاد .. حاليا أنا فى مستشفى أمان أدعولى بالشفاء".


وتحكى فتاة أخرى موقفًا حدث معها، قائلة:" في موقف حصل معايا إمبارح روحت بيت صاحبة البيت ست صعبة أوي بكلمها بقولها إحنا تبع التعداد لو سمحتي عايزة البطاقة ورقم التليفون ومعلومات عن البيت.. قالتلي أمشي من هنا وزعقتلي مسكت التليفون وعملت إني بكلم المفتش وقولتله البيت رقم 000 مش راضي يديني بيانات وابعت ليهم المركز.. سمعتني وأنا بقول كده عديت على البيت اللى جنبها لقيتهم بيقولولي أحمدي ربنا أنها مرمتش عليكي مياه.. لكن الأغرب أني لقيتها جاية جايبة البطاقة في إيديها وتقولي أتفضلي ياحبيبتي ربنا يعينك ويوفقك عايزة حاجه تاني.. قولتلها شكراااا".


وتحكي أخرى، قائلة: " لما تكوني رايحة تاخدي بيانات من بيت تطلعلك ست كبيرة تقولك أنتي مخطوبة يابنتي ..أه يأمي أنا مخطوبة. . تقولك لا سيبك منه مش في عدلك ده عدلك الواد عرفة هو أرزقي وشغل يوم بيومه.. والنبي يا أمي أنا مخطوبة.. وبعدين أديني البيانات عايزة أروح ... وفجأة.. ياد ياعرفة ياد ياعرفة تعالى شوف العروسة دي أنا خطبتهالك .. على سنينكم السودة والله ما عايزه بيانات ولا زفت. ههههههههههه بتعرف تجري ياعيد".


نرشح لك.."جوجل" يطلق ميزة مكافحة الأخبار الوهمية بثلاث دول جديدة

مواقف وطرائف ومعاناة


المعاناة مع جهاز "التابلت"

وكل ما سبق شيء ومعاناة معاون التعداد مع التابلت الذي يتحصل عليه من جهاز التعبة العامة والإحصاء شيء آخر، بسبب عيوب تصنيعه الكثيرة التي تجعله يتوقف عن العمل لفترات طويلة، ولا يقبل دخول المعلومات، هذا الجهاز الذي كان صاحب النصيب الأكبر في النقد لشباب التعداد في مصر.


ويقول أحد الأشخاص:" والله أنا بقيت ولا المدمنين تحت عينيا أزرق من كتر البص طول اليوم فى التابلت"، فيما قال آخر:" الحمدلله اشتغلت 8 ساعات النهاردة ساعة شغل ..و7 ساعات التابلت العظيم والعقبري جدا بيحمل"، ويرصد ثالث معاناته مع التابلت، قائلا:" يا جدعان دا أوسخ تاب مسكته في حياتي دا كل استمارة لازم يقف دقيقة حداد على روح التكنولوجيا في مصر".


كما أضاف آخر: "من فوائد تهنيج التابلت إنك بتمارس هوياتك عادي وممكن تدخل ع الفيس تعمل لايكات وكومنتات وترفع بوستات والمحروس لسه مهنننننننننننننننننننج وبيحمل ده لو بيحمل عابدين كان زمانه وصل".


ربما يعجبك..بالصور.. "قطة بلدي" تتجول في مترو الأنفاق

مواقف وطرائف ومعاناة


الرواتب الضعيفة والمجهود الكبير

وتتمثل المشكلة الأكبر التي يواجهها شباب التعداد في الرواتب الضعيفة التي يتقاضونها، على الرغم من الجهد الكبير الذي يبذلونه من أجل حصر جميع المباني والشوارع في جميع أنحاء الجمهورية، فضلا عن عدم تواجد رقابة على المفتشين المتخصصين بالإشراف على معاوني التعداد مما يتسبب في حدوث مشاكل وأزمات بين شباب التعداد وجهاز التعبئة العامة والإحصاء.