الورقي
الجزء الأخير من نص اعترافات المتهم في قضية مقتل طالب «مودرن أكاديمي»
جريمة قتل استغرقت 3 دقائق فقط، راح ضحيتها شاب في مقتبل عمره، وضيع آخر حياته، ليتركوا الاثنين حالة من الحزن تخيم علي زويهم، تعجبت كثيرًا من جرأة المتهم وهو يسرد تفاصيل وقائع جريمته، يحكي عن جريمته وكأنها شئ طبيعي ومعتاد، يحكي وكأنها قصة خيالية قرأها في احدي الكتب والروايات، حالة غريبة ستشعر بها أيها القارئ، وأنت تقرأ هذا الجزء من نص تحقيقات المتهم محمد وحيد في قتل طالب مودرن أكاديمي كريم مدحت ابو زيد.
س: الي اين توجهت آنذاك؟
ج: طلعنا علي المعادي علشان نجيب روكا.
س: ما الذي حدث عقب ذلك؟
ج: اتقابلنا مع روكا في المعادي وخدناها وطلعنا علي التجمع.
س: متي تحديدا وصلتم الي التجمع الخامس؟
ج: كان الساعة 2 ونص الصبح.
س: ما الذي حدث حال وصولكم آنذاك؟
ج: وصلنا للمكان اللي احنا متفقين عليه وبعد كده شفت عربية كريم واقفة علي جنب الطريق ناحية اللي رايح علي الجامعة وكان فيه ملف في المنطقة دي لفيت كأني راجع في اتجاه مدينة نصر ووقفت بالعربية ونزلت وقلت لاسلام سوق انت وروح انت وروكا وانا هجيلكم علي طول وانتم معاه.
س: ما الحالة التي شاهدت عليها المتوفي كريم آنذاك؟
ج: كان قاعد جوه العربية وكان مستني روكا.
س: هل كان أحد برفقته؟
ج: كان قاعد لوحده.
س: ما بيانات السياره حوزته؟
ج: كانت بي ام كابورليه لونها فضي.
س: هل شاهدك المتوفي كريم مدحت آنذاك؟
ج: لا مشفنيش اول مره ساعة لما لفيت بالعربيه.
س: ما سبب قيامك بالنزول من السياره امام المول؟
ج: انا نزلت قلت لاسلام روحوا انتم وانا هاجي.
س: هل استعلم اسلام وروكا سبب ذلك؟
ج: قلتلهم روحوا انتم قابلوه علشان ينزل من العربية علشان لو شافني معاك هيجري.
س: هل قام كلا من اسلام وروكا بتنفيذ ما طلبت منهم؟
ج: ايوه هما لفوا ورجعلوه.
س: هل تقابلوا معه آنذاك؟
ج: ايوه اتقابلوا معاه.
س: ما كيفية حدوث ذلك؟
ج: روكا كلمته وقالتله انا وصلت واللي جاي معايا ده جوز صاحبتي فكريم شاف العربية جايه فلف بعربيته عكس الطريق.
س: ما الذي حدث آنذاك؟
ج: اللي حصل انه هو وروكا واسلام نزلوا من العربية.
س: هل كان المتوفي علي علم بهوية المدعو اسلام سيد؟
ج: لا؟
س: ما هو مكان تواجدك آنذاك؟
ج: انا كنت مستخبي ناحية جامعة المستقبل.
س: ما هو سبب قيامك بذلك؟
ج: رحت علشان ساعة لما ينزل من العربية هروح أموته.
س: ما التصرف الذي بدر منك ساعة مشاهدتك الأطراف سويا؟
ج: لقيت كريم مديني ضهره فرحت بسرعه وساعتها هو كان بيتكلم مع روكا واسلام رحت مطلع الفرد وضربته علي راسه من ورا بضهر الفرد كتير واول لما عدل وشه قمت ضربة بالفرد في وشه وبعد كده الدم طرطش علي العربية بتاعته ووقع علي الأرض.
س: ما عدد الضربات التي وجهتها للمتوفي آنذاك؟
ج: أنا ضربته بطلقة خرطوش واحدة اللي كانت في السلاح وقعدت اضربة بالفرد في راسة وفي وشه كذا ضربه بس مش فاكر اد ايه بالظبط.
س: هل كنت علي علم بأماكن ضربك للمتوفي آنذاك؟
ج: أنا كنت عارف بضرب مين بالظبط وأنا كنت عاوز أموته.
س: ما المسافة التي كانت بينك وبين المتوفي حال التعدي عليه بأول وهله؟
ج: مكنش فيه مسافه خالص انا ضربته علي خوانه من ضهره في راسه وساعة لما اداني وشه مكنش فيه مسافه فضربته بالخرطوش.
س: ما الذي حدث عقب قيامك بذلك؟
ج: اول لما وقع علي الأرض شيلته وحطيته جنب الطريق جنب العربية بتاعته وخدت الموبايل بتاعه اللي كان عليه الصور من العربية.
س: هل شاهدت كلا من اسلام وروكا تلك الواقعة؟
ج: اول لما شافوني بضرب بالنار خدوا العربية وجريوا ومكنوش عارفين اني هعمل كده.
س: ما المدة التي استغرقتها في ارتكاب تلك الواقعة؟
ج: حوالي 3 دقائق.
س: ما التصرف الذي بدر منك عقب ذلك؟
ج: خدت الموبايل وجريت من المكان وقفت تاكسي وركبت وانا في التاكسي قمت مكسر الموبايل ده ورميته قريب من جامعة المستقبل بعد ما كسرته وانا في الطريق ومروح رميت الفرد.
س: ما بيانات السيارة التي استقلتها آنذاك؟
ج: كان تاكسي فيرنا بس معرفش رقمه وقفلي في شارع التسعين ومعرفش السواق وقلتله وصلني حلوان.
س: هل شاهد سائق السيارة الحالة التي كنت عليها آنذاك؟
ج: ايوه شاف هدومي اللي كان عليها دم بس مشفش الفرد بس هو مسألنيش عن حاجة ووصلني لغاية طره وانا من طره ركبت لغاية حلوان.
س: اين تحديدا قمت بالتخلص من السلاح الذي كان بحوزتك؟
ج: رميته علي الدائري بس معرفش فين بالظبط ورميته علشان هعدي علي كمين طره وممكن يفتشوني ويلاقوا السلاح.
س: متي تحديدا وصلت الي حلوان عقب ذلك؟
ج: حوالي الساعة 5 ونصف صباحا.
س: ما الذي حدث عقب وصولك لمنزلك؟
ج: رحت البيت ملقتش لا ابويا ولا امي ولا اختي وغيرت هدومي وحطيت هدومي اللي عليها الدم في الزبالة اللي في الشارع.
س: ما هو سبب ترك افراد عائلتك للمنزل آنذاك؟
ج: انا عرفت ان اسلام كلمهم وقالهم علي اللي عملته فهما سابوا البيت علشان أهلية كريم هيموتوهم.
س: أين تحديدا قمت بالتخلص من تلك الملابس؟
ج: أنا رميتها في الشارع اللي ساكن فيه بس تقريبا المباحث دورت علي الملابس وانا معرفش لقوها ولا لأ.
س: ما الذي حدث عقب قيامك بفعل ذلك؟
ج: انا الساعة 10 ونص الصبح رحت قسم حلوان وسلمت نفسي هناك وقلتلهم اللي انا عملته.
س: ما قصدك تحديدا من ارتكابك لتلك الواقعة؟
ج: قتل كريم مدح.
س: ما قولك فيما ورد بمعاينة النيابة العامة ومناظرة جثة كريم (تلوناه عليه)؟
ج: انا فعلا عملت كده.
ملحوظة.. قمنا بفض الأحراز بعد التأكد من سلامة أختامه وتبين تواجد قطعة من موبايل مكسور والهاتف الثاني سامسونج نوت فايف والثالث سوني وبعرضهم علي الماثل أمامنا أقر لنا بأن الأجزاء المكسورة خاصة بموبايل المتوفي كريم والذي قام بكسرة وأن الهاتف الثاني ملكة والهاتف الثالث ملك اسلام السيد.
س: هل لديك سوابق؟
ج: لا.
س: هل سبق اتهامك في قضايا من قبل؟
ج: لا.
س: أنت متهم بقتل المتوفي كريم مدحت ابو زيد عمدا مع سبق الاصرار والترصد بأن عقدت العزم وبيت النية علي قتله وأعددت لذلك سلاح ناري " فرد خرطوش" وايقنت مكان تواجده وما ان ظفرت به حتي انهلت عليه بالضرب وأطلقت عليه عيارا ناريا من السلاح سالف الذكرقاصدا من ذلك قتله فأحدثت به الاصابات الموصوفة بالتحقيقات والتي أودت بحياته؟
ج: حصل.
س: انت متهم بإحراز سلاح ناري (فرد خرطوش) والمستخدم في ارتكاب الاتهام السابق؟
ج: حصل ان كان معايا فرد وضربته بيه.
س: ما قولك في ما هو منسوب اليه من أنك متهم بإحراز طلق خرطوش يستخدم في السلاح سالف البيان بدون ترخيص؟
ج: حصل السلاح كان فيه طلقة اللي ضربت بيها كريم.
س: هل لديك أقوال أخري؟
ج: اه انا كنت عاوز اقول اني عملت كده علشان الفضيحة بتاعت اختي وكريم السبب فيها هو واختي.
س: هل لديك أقوال اخري؟
ج: لا.
تمت أقواله
غدا.. اقوال والد المجني عليه كريم مدحت ابو زيد وبقية الشهود
