زينة تكشف علاقتها بـ "شيرين": أعرفها من قبل "آه يا ليل" واختفت لما اتجوزت حسام

تحدثت النجمة زينة عن تفاصيل علاقتها بالنجمة شيرين عبد الوهاب، مؤكدةً أن صداقتهما تعود إلى ما قبل الشهرة، وذلك خلال ظهورها في بودكاست “قصتي”، الذي يقدمه الإعلامي محمد قيس.

زينة

وأضافت زينة: "أنا وشيرين عبد الوهاب أصحاب من زمان أوي من قبل ما تعمل "أه يا ليل" كنا شلة أنا وتامر حسني وأحمد سعد وشيرين وياسمين أختي ودنيا وإيمي سمير غانم، وكنت أعرف نصر محروس وكان عارف إني بلبس حلو كلمني قالي أنا جايب بنت جديدة صوتها حلو وطلب مني أنزل اشتري معاها لبس للفيديو كليب، أخدتها ورجعنا على البيت عندي واتغدينا مع بعض وبقينا أصحاب".

واستكملت: "لما بدأت تتعرف كنا بنسافر معاها، يعني مثلا عندها حفلة في لبنان أروح معاها أنا وياسمين تذاكر ببلاش ونتفسح، هي بالنسبة ليا مش مطربة ولا صاحبتي عادي، أبويا كان بيحبها وهي كانت بتحبه وفاكرة بابا مرة تعب ودخل المستشفى شيرين كانت بتيجي تقعد تحت رجله وتأكله عمري ما هنسى المشاهد دي في حياتي".

وتابعت: “علاقتي اتقطعت بشيرين خالص من وقت كبير قبل الأزمة اللي حصلت، حتي علاقتها بياسمين أختي من ساعة ما شيرين اتجوزت حسام حبيب اختفت تماما، إلى أن سمعت أنها تعبانة قلبي وجعني ولقيت نسرين أختي بتكلمني في التليفون وبتعيط كنا عرفنا الموضوع من ناس قريبين منها، كلمت حد وطلبت رقم شيرين وكلمتها ورحتلها”.

وعن تفاصيل حالة شيرين الصحية وقتها، قالت زينة: "كانت تعبانة صحيا عملت عملية وشالت المرارة وكان عندها الصفراء، مش الحاجات اللي بتتقال عنها، هي عملت عمليات ودخلت العناية المركزة وحالتها كانت خطر هي أهملت في صحتها، ولما لقيت نفسي لوحدي كلما أحمد سعد وهو أقرب لشيرين كتير، وهو مترددش لحظة هو راجل محترم وجدع".

وعن علاقتها بـ بنات شيرين عبد الوهاب، كشفت عن تفاصيل العلاقة التي تجمعها بهما، موضحةً طبيعة تواصلهما وموقفها منهما قائلة: "إحنا إخوات من زمان وأولادها ولادي ومولودين على إيدي وولاد أختي أصحاب "مريم وهنا" وبحبهم زي ما بحب "عز وزين" وفي حفل التخرج شيرين كانت موجودة بس مش لازم تتصور عشان تثبت لحد".