سامح صفوت: حسبي الله ونعم الوكيل في كل من آذاني في حياتي

وجه الفنان سامح صفوت، رسالة شكر لكل من اطمأن على حالته الصحية، الذي تعرض لها مؤخرا وأدت إلى دخوله المستشفى، كما قام بالدعاء على من تسببوا في ضرره.

سامح صفوت 

نشر سامح صفوت صورة له عبر حسابه الشخصي بموقع التواصل الاجتماعي فيسبوك، وعلق قائلا: “الحمد لله على الشدة اللي عرفت الواحد مين اللي ظهر وقت التعب ومين اختفى، المرض كان وجع بس نعمة من عند ربنا لازم نشكره عليها وأنه كشف الناس الأصيلة اللي دعواتها كانت بتوصل شايلكم في قلبي والله، ولولا الشدة اللي الواحد مر بيها مكنش هيعرف الفرق بين شخصيات في حياته”

واستكمل: "مين الصاحب أو ابن الناس الأصيل الجدع اللي بجد أو حتى معرفتي حديثة العهد بيه أشكره من كل قلبي، ومين اللي كان بيني وبينه عيش وملح وعشرة سنين طويلة وماعملش بيها وكان صاحب مصلحة، مع إن الواحد متربي من والده ووالدته رحمهما الله والبيت اللي طالع منه إنه يصون العيش والملح ويراعي العشرة سواء في مجال الحياة الشخصية أو العملية".

وأضاف: "ناس كنا فاكرينها قريبين اتبخرت وناس مكناش نتوقعها كانت أول الحاضرين بالسؤال والدعوة والكلمة الطيبة، درس والواحد اتعلمه ومش هيتنسي، الحمد لله عدت على خير وطالع منها متعلم حاجة جديدة على رأي المثل الإنسان طول ماهو عايش بيفضل يتعلم، واللي متابعيني وجمهوري اللي انتوا بالنسبة لي أهلي وإخواتي وعيلتي الكبيرة بشكركم من كل قلبي، وأشكر كل حد كتب لي كلمة ودعوة طيبة من قلبه، كمية الدعوات اللي جاتلي وأنا تعبان على صفحاتي وصفحات الغير وعلى كل المواقع فوق الوصف وفيها كمية حب صادق من القلب".

واختتم سامح صفوت حديثه قائلا: “كل واحد سأل عني من الوسط الفني والإعلامي والقانوني اللي هو مجال عملي الأساسي بصفتي محام مستشار قانوني بالنقض، حسيت اني بتعافى بفضل ربنا وقدرته ثم دعواتكم اللي وصلت وحسيت بيها وكانت سند ودعم وحسيت ان الدنيا لسه بخير وفيها ناس صافية ونقية زيكم، ربنا ما يحرمني من محبتكم ويكتب لكم أجر كل دعوة ويحفظكم ويجازيكم كل خير وما يكتب على حد المرض والضيق والشدة، بس لو جت اعرف إنها هتنضف حياتك، وحسبي الله ونعم الوكيل وفوضت أمري إليه في كل من اذاني في حياتي وكان السبب فيما جرى”.