بيان إمام عاشور للإعتذار بعد الغياب عن بعثة الأهلي فى تنزانيا

أصدر إمام عاشور، لاعب خط وسط الأهلي، بيان يكشف فيه حقيقة تمرده ورفضه السفر مع بعثة الفريق الأول لكرة القدم بالنادي الموجودة حاليا في تنزانيا لمواجهة يانج افريكانز المقرر إقامته عصر غدا فى الجولة الرابعة بدور المجموعات ببطولة دوري أبطال إفريقيا 

بيان إمام عاشور للإعتذار بعد الغياب عن بعثة الأهلي فى تنزانيا

عاشور كتب: للأسف كلام كتير مغلوط وغير صحيح بيتردد بخصوص اللي حصل.

 وأنا متقبل أي قرار ياخده النادي. وواثق أنه المسئولين في الأهلي هيتفهموا موقفي كويس..

مضيفا  أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي.

 وباخد مضادات حيوية وللأسف كل أسرتي بتعاني من نفس الأعراض.. 

وإكد عاشور أنا بلغت الدكتور أحمد جاب الله بظروفي الصحية وعدم قدرتي على السفر. وده إجراء غير كافي في مثل هذه الأمور. لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر..

الموضوع اتقفل خلاص. وتواصلت امبارح بالليل مع الكابتن وليد صلاح الدين. وأنا تحت أمر النادي. 

وقال عاشور وجمهور الأهلي سندي وضهري بعد ربنا سبحانه وتعالى. وبعتذر للنادي والجهاز الفني وزمايلي وقبلهم جمهور الأهلي. 

أنا فخور باللعب في أكبر نادي في إفريقيا. وعلاقتي بجماهيره العظيمة لا تقبل القسمة على اتنين.. وأرجو من الجميع إغلاق هذا الموضوع..

والناس اللي بتقول ان إمام عايز يلوي دراع النادي بقولهم حسبي الله ونعم الوكيل.. محدش يقدر يلوي دراع الأهلي. ولا يمكّن أفكر بالطريقة دي أبدا..وانا اتشرفتْ بارتداء الفائّلة الحمراء وبقالي3 سنين في النادي. والحمد لله عمري ما قصرت لا في حق النادي ولا جماهيره. وده حقهم عليا.

ووجودي في الأهلي نادي القرن وفي ضهري جمهور الأهلي يعوضني عن كل حاجة.. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية.