من كلمات وألحان والدها.. ماس رحيم تطرح أولى أغنيات ألبومها الجديد "ضيعتنى"

طرحت المطربة الشابة ماس رحيم، أولى أغنيات ألبومها الجديد، والتى تحمل عنوان "ضيعتنى"، وهي من كلمات وألحان والدها الملحن الكبير الراحل محمد رحيم، وتوزيع كريم أسامة، وتوزيع شركة ديجيتال ساوند.

ماس رحيم 

وكشفت ماس رحيم، عن مفاجأة خاصة بأغنية "ضيعتنى"، قائلة: "والدى الفنان محمد رحيم هو اللى اختار لى أغنيات الألبوم ومن بينها أغنية "ضيعتنى"، وهى قريبة جدا من قلبى، ولحنها مفاجأة فهو قديم لحنه والدى فى سن الشباب، واللحن موجود فيه إحساسه وتركيبته المعروفة فى الألحان".

وأضافت ابنة محمد رحيم: "والدى كان حريص على عمل كل أغنية فى الألبوم حالة خاصة وشبهى، وشايف إن أنا بس اللى هقدر أقدمها، بشخصيتى وبطريقتى وبأسلوبى، وده طبعا زى ما اتعودنا منه، مع اكتشافه لأى موهبة جديدة، بيرسم لها طريقها فى الغناء، وأمثلة كثيرة قدمها بالشكل ده ومنهم النجنة روبى".

وتابعت: "اختارنا سوى أغنية "ضيعتنى"، وهى شبهى زى ماكان بيقول، والأغنية مش حزينة، ومعناها جميل، وتتخطى حاجز العنوان، وكل أغنية فى الألبوم لها قصة وشخصية وموضوع مختلف، وأنا بقدم الألبوم بكل فخر مش علشان نفسى، ولكن علشان والدى، لأن انا شايفة اللى قدمه رحيم مش قليل، لأنه قدر يغير شكل الموسيقى فى الوطن العربى على مدار 30 عاما".

واستكملت: “أنا بدأت حب الموسيقى وعمرى 5 سنين، وكنت بحس بوالدى والأجواء اللى كلها مزيكا، ده غير الجينات اللى توارثتها عنه، وكنت بكتب وألحن، وكان والدى بيسمعها وبيعجب بها، ولما وصلت إلى 8 سنين بدأت أركب الهارمونى لوحدى- تركيب الهارموني في الموسيقى هو فن تنسيق الأصوات المختلفة معًا في وقت واحد لخلق تأثير موسيقي متناغم- والموضوع ده لفت انتباهه جدا وعرف إنى موهوبة، وبدأ فى تبنى موهبتى، بتعليمى العزف على الآلات الموسيقية مثل البيانو والجيتار، وكنا بنتكلم مع بعض بلغة المزيكا، لو هو عاوز يوصل لى إحساس معين أو العكس لو انا عاوزة أوصل له إحساس خاص،  كنا بنغنى لبعض، كان صديقى وصاحبى وكان معايا فى كل حاجة”.

تقول كلمات أغنية "ضيعتنى":..

ضيعتني منك لله
و جرحتني منك لله
خليتني احزن على إلى فات
و اندم على قلبي وهواه

مش عيب اقول اني اتخدعت
أو اني ضيعت لما انت بيعت
هبدا حياتي من تاني عادي
اما إلى جاي سيباه لله

و إذا كان إلى فات من عمري
كنت عاشرتك فيه
يبقى اكيد الجاي من عمري هنسى غرامك بيه
و إذا كان إلى فات من عمري
كنت عاشرتك فيه
يبقى اكيد الجاي من عمري هنسى غرامك بيه

و انا هندم ليه واصبر على ايه
ما صبرت تعبت يا ناس من قولة ال اه من قوله ال اه

و إذا كان إلى فات من عمري
يبقى اكيد الجاي من عمري

و إذا كان إلى فات من عمري
كنت عاشرتك فيه
يبقى اكيد الجاي من عمري هنسى غرامك بيه

و انا هندم ليه واصبر على ايه
ما صبرت تعبت يا ناس من قولة ال اه من قوله ال اه
ضيعتني منك لله
و جرحتني منك لله
خليتني احزن على إلى فات
و اندم على قلبي وهواه

مش عيب اقول اني اتخدعت
أو اني ضيعت لما انت بيعت
هبدا حياتي من تاني عادي
اما إلى جاي سيباه لله