محمد رمضان يعلق على أزمة نجله: "ماتوقعتش قسوة الحكم والتشهير بيا وبعيلتي للدرجة دي"

خرج النجم محمد رمضان عن صمته، وعلق على أزمة نجله الأخيرة التى تعرض لها مع أصدقائه واتهامه بالاعتداء عليهم، وكشف تعرضه هو وأسرته للقسوة والتمنر منذ أكثر من 11 عام.

محمد رمضان

وكتب محمد رمضان عبر حسابه الشخصي بموقع التواصل الاجتماعى فيسبوك: “القانون ده من 2018 ياسادة بضرورة حماية الطفل والعيلة بحجب هوية الطفل واسمه وصورته عن الإعلام والصحافة حتى لو كان مُجرد شاهد في قضية، ولكن لأن الطفل ده أبوه محمد رمضان ( يبقى حلال )”.

وأضاف: “بالأمر أصدروا بيان صحفي لكل الصحف والمواقع العامة والخاصة والحكومية، انشر صورة ابن محمد رمضان وأكتب أنه هيتاخد من أمه وأبوه وهيروح دار الرعاية مع إن القانون بيمنع النشر ولكنهم نشروا، من حقي كأب أعرف مين خالف القانون وأصدر البيان الصحفي اللي مفيش مؤسسة واحدة قدرت ترفض نشره”.

واستكمل "رمضان" قائلا: “رغم كل شيء لا أشك أبدًا في نزاهة القضاء المصري.. ابني اللي كان واضح في الڤيديو اللي النيابة شافته إنه كان قاعد في حاله مع أخته الصغيرة في النادي، وراحوله مجموعة أطفال يقولوله انت أسود زي أبوك وأبوك عنده ڤيلا كبيرة وعربيات علشان فلوسه حرام، إنما إحنا عايشين في شقق نيو جيزة علشان أهالينا مش حرامية.. ولما ابني كلمني في التليفون سمعت الكلام ده بنفسي.. وواضح ان ده كلام أهل طفل منهم لان مستحيل طفل يفكر كدة وده في حد ذاته بيزرع الحقد والغل الطبقي بين الأطفال.. ورحت لأبني النادي واتكلمت مع الأطفال قدام فرد الأمن ومدرب السباحة إنكم أخوات وجيران وده واضح في فيديوهات النادي اللي شافتها النيابة”.

واختتم رسالته قائلا: “عمومًا دي حلقة من سلسلة طويلة من الاضطهاد الواضح والقسوة والتعنت تجاهي لأكثر من 11 سنة وبكتب النهاردة بس علشان ماتخيلتش انهم يدخلوا طفل عنده 11 سنة في معركتهم مع أبوه.. ماتوقعتش قسوة الحكم والتشهير بيا وبعيلتي للدرجة دي.. وللعلم الشارع المصري فاهم اللي بيحصل وشايفه بوضوح الشمس، لكن مهما حاولوا  ومهما ظلموا سواء بالقصد أو بالجهل هنفضل أنا وأولادي وعيلتي نحب بلدنا وهنعيش ونموت فيها.. ولا عاش ولا كان اللي يكرهني فمصر.. نحيا كمصريين أولًا بحبنا لبعض دون غيرة أو حقد أو استكتار علشان تحيا مصر”.