حمادة هلال: كنت عارف أن أحمد فهمي معايا في برنامج "رامز جاب من الأخر"

كشف النجم حمادة هلال كواليس مشاركته في برنامج "رامز جاب من الآخر" مع رامز جلال.

وقال حمادة هلال خلال لقائه في برنامج "الراديو بيضحك" من تقديم فاطمة مصطفى عبر إذاعة "الراديو 9090": "روحت البرنامج قبلها بـ8 ساعات، جالي تليفون لازم تسافر لدبي هتروح لرامز جلال، عجبني فكرة البرنامج أنه خلاص رايح أقابل رامز وعارف أنه مش هيسيبني".

وردًا على سؤال فاطمة مصطفى أنه هل كان يعلم بالمقلب وباستضافة أحمد فهمي معه أم لا، قال حمادة هلال: "هناك فعلا مش بيقولوا إيه المقلب، لكن عرفت أن أحمد فهمي هيكون معايا عشان منبقاش كدابين".

وأضاف حمادة هلال: "أنا مفيش مشكلة بيني وبين أحمد فهمي، فكانت حلقة مختلفة وآخر حلقة اتصورت، لما شفت الكلب اتخضيت بس أنا مخفتش منه فجأة لقيتني وقفت، لأن إحنا كان عندنا في مسلسل المداح كلب شبه وبقيت بسأل دا إيه اللي جابه دبي هو دا المقلب، حتى السير اتحرك ووقعني، كانت حلقة حلوة وانبسطت وكنت في فترة ضغوط تصوير المداح، لكن الحلقة فرحتني، اتمرمطنا جامد ونزلنا في مايه متلجة، وأخدت ضربه جامده في راسي".

واختتم حمادة هلال حديثه قائلا: "رامز أروح له في أي حته، ما دام البرنامج إحنا مش بنمثل على الناس بتبقى المصداقية بتاعته عالية، أنا روحت برنامج رامز قرش البحر مكنتش اعرف أنه رامز وانفعلت في آخر الحلقة انفعال عمري ما حصل في حياتي كانت لحظة صعبة، وبرامج رامز معظمها الناس متعرفش".