سناء منصور لها فضل كبير عليا بعد ربنا.. أحمد حلمي يكشف التفاصيل كاملة لبداية مشواره الفني

كشف النجم أحمد حلمي عن بداية مشواره الفني، لافتًا إلى أن الإعلامية القديرة سناء منصور لها فضل كبير عليه بعد ربنا.

وقال أحمد حلمي خلال لقائه في برنامج سولد اوت Sold out الذي يقدمه الإعلامي محمود سعد، على قناة CBC، ومنصة Watch it الرقمية: "الاستاذة الكبيرة سناء منصور لها فضل كبير عليا بعد ربنا في مشواري الحقيقة، وأنا دخلت التلفزيون المبنى ده بالنسبالي كان غامض، وكان غموضه جاء من انك متقدرش تدخله كمان عادي، ودخلته بالصدفة قابلت واحد صاحبي كان يعمل بالتلفزيون دفعتي وكان في قسم الديكور وكان يعمل أيضًا في الإخراج وانا كنت أعمل في الدعاية والإعلان، وصاحبي قالي ما تيجي تشتغل في التلفزيون ولو كان قالي تعالى اشتغل في مكان أخر مكنتش هروح لأن هذا المبنى كان بالنسبة لي تدخله بتصريح وقصة وأخذ لي معاد لمقابلة سناء منصور في القطاع الفضائي".

وأضاف: "روحت وجلست حوالي ساعتين أو ثلاثة ومعرفتش اقابلها كان عندها اجتماعات ومشيت واخدت معاد تاني وقابلتها، وقالتلي عايز تعمل إيه! قولتلها أنا خريج ديكور وعايز اشتغل وقالتلي خلاص اشتغل في الديكور، قولت لها أنا مش عايز اشتغل في الديكور وعايز اشتغل في الإخراج ومعرفش هي شافت إيه في خلقتي ووافقت، وأنا دارس إخراج لكن مش مادة أساسية".

وتابع أحمد حلمي: سناء منصور قالت لصديقي محمد خلف كان بيخرج برنامج أطفال اسمه أحلام العصافير فقالت له خده معاك يا محمد يساعدك واتبسطت وبالفعل نزلت معه وكان بيروح يصور مع أطفال في النوادي والحضانات، وكنت بشيل شرايط واودي شرايط وهكذا، حتى في إحدى اللقاءات مسكت الميكروفون واتكلمت مع طفل وأنا من زمان في دماغي الحكاية دي، فعملنا تجربة وكان معانا المصور وقعدت اتكلم مع الطفل حوالي نصف ساعة وكنا بنجرب إحنا مع بعض كدة، لقيته جه قالي الانترفيو حلو جدا، قولتله أنا نفسي اعمل حاجة كدة قالي إحنا نروح نقول لمدام سناء، وإحنا كنا بنعتبرها الضهر بتاعنا مهما كنت غلطان كنا بنقولها".

واستكمل حديثه: "وقالت اشوف اللي أنتو عملتوه من غير مونتاج، جاب الشريط واتفرجت وقعدت تضحك كتير، فاتبسطنا فقالت أنا عايزة من ده 30 حلقة ورمضان كان فاضل عليه أسبوعين وكنا بنذيع في مصر وبرة، قولتلها طيب تمام مين بقى يقدمه؟ ما أنا المخرج جاي اخرج يكاد يكون قالتلي لفظ، وقالتلي محدش هيقدمه غيرك، قولتلها لأ انا كنت بس عايز أوضح الفكرة، قالتلي محدش هيقدمه غيرك".

أحمد حلمي ضيف برنامج سولد اوت Sold out

حل النجم أحمد حلمي، ضيفًا في برنامج سولد اوت Sold out الذي يقدمه الإعلامي محمود سعد، على قناة CBC، ومنصة Watch it الرقمية.