الورقي
«في حق بيتاخد في الضلمة؟!».. تامر أمين يوجه رسالة لـ أمريكا وإسرائيل
«في حق بيتاخد في الضلمة؟!».. تامر أمين يوجه رسالة لـ أمريكا وإسرائيل
علق الإعلامي تامر أمين، على تصاعد الغارات الإسرائيلية على قطاع غزة، الجمعة الماضية، بالتزامن مع قطع الاتصالات والإنترنت عن القطاع.
وقال تامر أمين، خلال برنامجه «آخر النهار» والذي يعرض عبر قناة «النهار»، مساء السبت: «ليلة أمس هي ليلة الجحيم للفلسطينيين بامتياز، وليلة العجز للدول العربية، وليلة الانحياز والصمت الغربي، نحن أمام مجزرة وفضيحة إنسانية للعالم».
وأضاف: «نحن أمام فضيحة للعالم وخصوصا العالم الغربي المتقدم والأول كما يقال عليه، اللي يرضى بأن ترتكب في عام 2023 مثل هذه المجزرة الإنسانية في الضلمة، ده لا عالم متحضر ولا أول ولا بشر من الأساس، دول عالم همج».
وتابع: «من إمبارح إسرائيل قطعت كل حاجة عن غزة، قطعت الكهرباء عشان يبقى في ضلمة، وقطعت الاتصالات عشان يبقى في هس، وقطعت التغطية الإعلامية عشان يبقى في تواطؤ، ده معناه إن إسرائيل عايزة تعمل حاجة في الضلمة، لا من شاف ولا من سمع، ولا من صور ولا من سجل».
وأوضح تامر أمين: «أنا هنا سؤالي إلى أمريكا والدول الغربية اللي مصدعانا طول الوقت بحق إسرائيل في الدفاع عن النفس، بقولهم هو في حق بيتاخد في الضلمة؟! صاحب الحق صوته عالي وياخد حقه في النور وقدام العالم، قولوا لنا يا بتوع الحريات والديمقراطيات».
وأكمل: «ولا أنا بعمل الضلمة عشان عايز أعمل حاجة في الخفاء محدش يسجلها عليا، قطع إسرائيل الاتصالات ومنع التغطية الإعلامية في غزة منذ ليلة أمس هو اعتراف إسرائيلي بأنها ترتكب جرائم لا تريد للإعلام أن يوثقها».
