إلهام شاهين عن الراحل نور الشريف: كنت هموت على إيده

كشفت الفنانة إلهام شاهين، في الندوة التي أقيمت لها ضمن فعاليات مهرجان الاسكندرية السينمائي لدول البحر المتوسط، عن كواليس عملها مع الفنان الراحل نور الشريف.

وقالت إلهام شاهين خلال الندوة: "كنت هموت على إيد نور الشريف في مسرحية كاليجولا، مهنتنا صعبة أوي بجد، أنا اتعرضت للحرق والغرق واتقلبت بيا عربيات في أعمالي، اتعرضت للموت كتير أوي".

وأضافت: " ساعة الحرق شعري اتحرق بجد، ومفيش علينا تأمين، كنت بصور في فيلم مع نور الشريف وحطوا جاز بالغلط في الطرحة اللي على شعري، ولما بدأوا يصوروا فجأة لقيت النار في شعري، وواحد من الناس اللي المفروض يدخلوا الأوضة في المشهد شد الطرحة والضفاير اللي متركبة عشان يلحقني والنار مسكت فيه".

وأوضح إلهام شاهين: "كان فيه بتاع مطافي موجود معانا في المشهد ولما سألوا ليه مطفتهاش قالهم بلغوني إني أتدخل لو حصل حاجة للديكور لأننا كنا بنصور في المبنى التليفزيون، يعني لو لبست النار في فنانة عادي لكن لو في ستارة هيتدخل، وحلقت شعري وفضلت سنة بلبس باروكات".

مسلسل ألفريدو لـ إلهام شاهين

يذكر أن أخر أعمال الفنانة إلهام شاهين، مشاركتها في  ألفريدو ضمن مسلسل "55 مشكلة حب"، المكوون من 10 حلقات ومأخوذ عن كتاب  للدكتور مصطفى محمود.

أبطال مسلسل ألفريدو

يشارك في بطولة المسلسل: إلهام شاهين، أحمد فهمي، ندى موسى، إيمان السيد، عمر شرقي، أمير شاهين وغيرهم من الفنانين، ومن تأليف عمرو محمود ياسين، وكتابة سارة مصباح، وإخراج عصام نصار، وإنتاج أحمد عبد العاطي.