بالصور.. طالب بهندسة وتكنولوجيا الطيران ينجو من الموت بأعجوبة بسبب أولكس

نشر احد الأعضاء يدعي "إسلام حاتم"، على إحدي جروبات موقع التواصل الإجتماعي " فيسبوك" تحذير شديد اللهجة من التعامل مع موقع أولكس "OLX".

وقال " إسلام" في منشوره في اقل من اسبوع تتكر مأساة OLX بعد زميلي محمد عبد العزيز "رحمه الله".

 

وتابع أنا في تانية مدني معهد هندسة وتكنولوجيا الطيران، كنت عاوز عدسة ٥٠مل للكاميرا وشفت الإعلان على اولكس وأرسلت رسالة لصاحب الاعلان اسمه "فريد"، واتفقت هيقابلني في موقف العاشر من رمضان، وصلت الموقف يوم الاحد الساعه ٧ ونص كدا بالليل، كلمته جالي وقالي انا لسه طالع من الشغل والله وجيتلك على طول عشان ماتستناش، وهنروح نجيب العدسة من البيت قريب هنا، ونقعد على اي قهوه نشتري حاجة وارجع، قلتله البيت فين قال قريب.

وتابع ركبنا من موقف العاشر من رمضان " الاردنية" ركبنا اتجاه ستة وفي نصف الطريق اتنين قالو للسواق على جنب ونزلوا، قالي تعالى هننزل هنا احنا قربنا نزلت معاه

هو بس المفروض معايا، الاتنين التانيين تبعه لكن ماكنتش اعرف.

وأستكمل لما نزلنا فضلنا ماشيين شويه أنا وهو لحد مالقيت شومه على دماغي من ورا من الاتنين اللي نزلوا قبلنا، والتاني بمطوة او بموس واللي كان جمبي انا لقيته بيشد الشنطة من ايدي بتاعت الكاميرا.

واضاف انا فضلت اقاوم كتير والشنطة في إيدي وهما يضربوا لحد ما خدوا الشنطة وهربوا كان فيها الكاميرا بتاعتي وفلوس العدسة اللي كنت هشتريها.

وأشار سرقوا مني الشنطة وجريوا وانا حاولت أجري وراهم وأوقف في العربيات حد يساعدني ومفيش حد وقف ليا وانا كنت بنزف فتعبت، لحد ما وقفلي راجل ابن حلال وصلني قسم اول العاشر محدش عبرني ولا اهتم بيا وقالولي روح اتعالج وبعدين تعالي وانا معرفش اي حاجه في العاشر، روحت اجري علي اي حد يساعدني يوصلني

المهم مشيت لحد ما وصلت بنزينه خلف القسم قعدت اتحايل على الناس حد يوديني مستشفي، لحد ما خلوا واحد كان بيمون بنزين يوصلني بس قالولي اغسل وخد مناديل، ومحدش اسعفني وقالولي خد مناديل وروح مستشفي التأمين الصحي.

وتابع طلعت كل ما اوقف حد على الطريق أو تاكسي يشوف منظر الدم يجري ويسيبني ويمشي لحد مالاقيت تاكسي وصلني عند التأمين، نزلني بعيد عنه وشاورلي عليه

نزلت فضلت أجري بردو لحد ماوصلت كنت خلاص برتعش ومش قادر ووشي ابيض من كتر مانزفت، دخلوني العمليات فضلت ملطوع نص ساعه لوحدي وجات الممرضه ركبتلي محلول والدكتور خيطلي بتاع ٢٩ غرزه في دماغي

وفي وشي ٣ جروح من ٤ ل ٦ سم طول الجرح الواحد وايدي كمان، وأداني التقرير الطبي وطلعت على القسم وعملت محضر بالواقعه2899 جنح اول العاشر سنة 2018 وفي انتظار ضبط الجناة.