الورقي
حلا شيحة تكذب والدها وتدافع عن زوجها: «كلامك لا يصح.. ومش محتاجة حد يخطفني»
ردت الفنانة حلا شيحة على تصريحات والدها الفنان التشكيلي أحمد شيحة، الأخيرة، حول أن زوجها معز مسعود له يد فيما تكتبه وتفكر فيه، وإدعائه أن ابنته "مخطوفة".
وكتبت "حلا"، في منشور طويل، عبر حسابها على موقع الصور الشهير "انستجرام"، قائلة: "الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام ورجولة وشهامة نادرة الأيام دي، وأنا لم يخطفني أحد كما قال والدي والكلام ده لا يصح أبدًا".
وأضافت: "وأنا بحب زوجي وسعيدة بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائمًا بيهدّيني، وطبعا بيساندني ويشجعني لأني زوجته وحبيبته، وهو أكبر بكتير من كل الكلام اللي بيتقال عليه وافتراءات مش صحيحة وهو أبعد ما يكون عنها".
وتابعت: "لن أسمح لأحد الكلام عنه ولن أسمح بأي تصور خاطئ عنه بأي شكل من الأشكال، معز طول عمره له رؤيته الواضحة في الدين وحتى في الفن وهو ليس مع أي جماعة أو فئة معينة هو يمثل نفسه وله أفكاره وآرائه العلمية والدينية المختلفة الجميلة وليس لأحد أن يصنفه أو يضعه في أي قالب فقط لأن هواه لا يوافق ما يمثله معز".
وقالت: "هو في ايه في بلدنا الأيام دي بنحارب ونصارع في بعض وعايشين في قصص وهمية من نسج خيالنا عن بعض، هو خلاص أي حد يتكلم بلغة الدين لازم يبقى متطرف أو إخواني هو مبقاش في مسلمين وسطيين طبيعين هو ليه كل انواع الهجوم ده على أي حد".
وأشارت إلى أنها: "أنا زعلانة من والدي جدًا لأنه يعرف معز كويس جدًا وقعدوا مع بعض كتير ووالدي يحبه جدًا وشاف منه كل خير، معز زيي اتجوز ١٤ سنة من عمره وكان مستقر في حياته وعنده ثلاث أولاد ربنا يخليهمله جمال ماشاء الله وعمره ما كان بتاع ستات زي ما بيتقال كلام لا يليق أبدًا وفي الآخر زيي لم يكمل جوازه وحدث الطلاق وكلنا معرضين لده.. طبيعي إنه كان بيحاول زي أي راجل محترم إنه يلاقي استقرار في حياته في الحلال ومتوفقش أكتر من مرة ودي مش حاجة تعيب أي حد".
وأكملت حديثها: "الحمد لله اتقابلنا وتلاقينا لأن ظروفنا قريبة جدًا وعندي أولاد مثله وأولادنا شبه بعض الحمد لله واستقرينا إحنا الاتنين ليه ده يزعل الناس بدل ما ندعي لبعض بالخير بقينا نتصيد لبعض، ونخوض في أعراض بعض هو حصل في مجتمعنا ده إحنا جرالنا ايه".
ووجهت رسالة إلى والدها: "في الآخر بوجه كلمة لوالدي الحبيب أن لا يصح أبدًا كلامك مع كامل احترامي لك وللجميع، أنا الحمد لله سعيدة في حياتي ومع زوج اتشرف أنه زوجي وبعتز بيه وإحنا أصدقاء قبل أن نكون أزواج، وكل كلمة اكتبها وقلتها نابعة مني وأنا متدينة بطبعي زي أي ست مصرية بتحب دينها وده لا يعيبني.. وتديني اللي بدأ من أكتر من ١٥ سنة من المنطقي أن معز مش هو سببه، مش محتاجة حد يخطفني أو يكتب عني أو يوجهني، هذا كلام لا يليق، دعوا الخلق للخالق وكل واحد يخليه في حاله، وياريت نسمع من بعض بدل ما نسمع عن بعض، أحسنوا الظن".
