نور في حوارها مع "النبأ": هذه مواقفي الطريفة مع "الملوخية" وسر شهقة "جمال الحريم"

نور اللبنانية:

شخصيتى فى "جمال الحريم" من أكثر الشخصيات المتعبة خاصة "الشهقة"

أشارك فى "ضل راجل" مع ياسر جلال ومسلسل "عمر الناجى" مع أمير كرارة

"ملاكى إسكندرية" نقطة تحول في مسيرتى الفنية وأطرف المواقف لى فى مصر مع "الملوخية"

نفسي أقدم شخصية مى زيادة وكورونا خلانى أرجع أرسم الطبيعة اللى بحبها

فنانة جميلة ومتألقة ومغامرة أيضًا قررت الدخول إلى عالم الجن من خلال طقس سحر يسمى "جمال الحريم"، إنها الفنانة اللبنانية نور التي حققت نجاحًا كبيرًا في عام 2020 من خلال مسلسل "البرنس" الذي عُرض في رمضان الماضي، و"جمال الحريم" الذي يُعرض حاليًا على إحدى الفضائيات وتصدر مواقع البحث ومنصات التواصل الاجتماعي.

 "النبأ" التقت الفنانة نور لتكشف لنا أسرار عالم الجن وعلاقته بـ "جمال الحريم" عبر السطور التالية:

شايفة التعاون مع خالد سليم بعد 16 سنة إزاي؟

ج- تعاونت مع الفنان خالد سليم في فيلم "سنة أولى نصب" الذي عُرض عام 2004، وكانت تجربة ناجحة جدًا، ومسلسل "جمال الحريم" ثاني تجربة معه وهو ممثل موهوب وشاطر ومحترم ومريح وسهل في التعامل، وأنا مبسوطة أني تعاونت معه للمرة الثانية ومقدمين عمل يارب يعجبكم.

 وليه طول المدة دي محصلش تعاون رغم نجاح البدايات؟

ج- في حاجات مبتبقاش في إيد الشخص، مبيبقاش في سكريبت يجمعنا أو لم يتم ترشيحنا في عمل واحد، وده يرجع لظروف الحياة، بس الحمد لله عملنا ثاني عمل وإن شاء الله نتعاون تاني.

اسم المسلسل مش غريب شوية "جمال الحريم"؟ وإيه أسباب اختياره؟

ج- في البداية استغربت الاسم وبعدين تعودت عليه، وبعدين هما بيعملوا طقس سحر اسمه جمال الحريم، ومن هنا جاء اسم العمل.

مش خايفة من بطولة مسلسل مصنف رعب في بدايات ظهور اللون ده من الفن في مصر؟

ج- حق الجمهور أن يعجبه العمل أو لا يعجبه ويوجه انتقادات أيضًا وهذا من حقهم، بس أنا بقول إحنا مواضيعنا مختلفة عن البلاد الأجنبية حتى إذا تناولنا موضوعات الرعب إحنا مجتمعنا موضوعاته مختلفة عن موضوعات الغرب، فأكيد هنصورها بطريقة مختلفة وأكيد هنتناولها بمنظور مختلف، لما كنا بنعمل أكشن من 15 سنة زي ما بنعمله دلوقتي؟! لأ طبعًا لأننا اتمرنا وغلطنا واتعلمنا فده نفس الشيء إحنا بنقدم مسلسل جمال الحريم حاليًا ممكن يجي حد تاني بعد 3 أو 4 سنوات يقدم حاجة أفضل ونقوله برافو ليه لأ؟!

في الوقت الحالي قدمنا أحسن ما عندنا من سيناريو وإخراج وتصوير وإضاءة ومزيكا وإنتاج وتمثيل، إمتى أضايق من ردود الأفعال؟ لو أنا مقصرة ومعملتش ومبذلتش مجهود كامل أبقى بلوم نفسي وأقول يارتني كنت جربت ومكنتش قصرت.. بس أنا فعلًا بمنتهى الأمانة حتى لو حد مش عاجبه حاجة مبزعلش لأني عملت أقصى ما عندي فعلًا وتعبت وضميري مستريح.. وجمهورنا مش متعود على فكرة أن حاجة عربية في الموضوعات دي فيتعودوا عليها".. أنا كممثلة محتاجة أمثل أدوار مختلفة وكبيرة وكتيرومختلفة ومتناقضة أحيانا ومش عايزة طول الوقت أقدم الأدوار اللي تعجب بس.

كيف حضرتي لشخصيتك في "جمال الحريم"؟

ج- كل"شهقة" في المشاهد كان ضغطي بيحصله حاجة يعلى ويوطى وشخصيتي كانت متعبة جدًا، بسبب الريأكشنات، وتقمصت الشخصية بزيادة وحسيتها بجد ورغبتي في أني أظهر على الحقيقة.. أنا جيت على نفسي طول الوقت وكنت بصور عدد ساعات مش طبيعي ومكنش في إجازات وبقدم أدوار صعبة ومركبة دورين مع بعض.. وهي من أكتر الشخصيات المتعبة.

إيه أصعب المشاهد في المسلسل؟

ج- مشهدالتغلب على الجن، وشدي علشان أوصل للمصحف وكانت في وسط صحراء وتراب وسرير في نفس الوقت وهو من أصعب المشاهد.

إيه هي نقطة التحول في مسيرتك الفنية واللي بتعتبريها سر النجاح؟

ج- مفيش سر نجاح واحد ولكن بتكون عدة عوامل سنين وتجارب ونجاح وفشل، بس ممكن أذكر نقطة تحول في مسيرتي الفنية هي فيلم ملاكي إسكندرية.

مخوفتيش من دور الفتاة الشعبية المحجبة في البرنس علشان الجمهور مش متعود عليكي كده؟

ج- هو كان مشهد واحد بالحجاب، وأخاف ليه؟ بالعكس المشهد كان حلو.

إيه الشخصية اللي نفسك تقدميها؟

ج- مي زيادة من الشخصيات اللي نفسي أعملها لأنها لبنانية عاشت في مصر، وقصة أديبة مشهورة، وفي حاجات كتير لسة مقدمتهاش، وكمان أني أقدم الدراما الرومانسية بس بطريقة مختلفة.

وإيه سر جرأة نور في اختياراتها دايما؟

ج- أنا مش شايفة في جرأة زيادة، أنا ممثلة ولازم أقدم أدوار مختلفة.

هل ذهبت إلى طبيب نفسي من قبل؟

ج- لم ألجأ لطبيب نفسي من قبل ولكن لو حسيت أني محتاجة هروح طبعًا.

إيه سر قلة أعمالك مقارنة بفنانين كتير رغم نجاحك المستمر؟

ج- ممكن يعدي وقت مفيش أدوار عجباني فمش هروح أعملها، وممكن يجي وقت صدفة كذا عمل حلوين ورا بعض واعملهم.. لازم أشارك في عمل عجبني.

فيروس كورونا غير كل حاجة.. أثر على حياتك إزاي؟

ج- رجعت للرسم وأنا بحب أرسم الطبيعة.

كلمينا عن دورك في "ضل راجل" اللي هيتعرض رمضان القادم والتعاون مع ياسر جلال تاني.

ج- لم أدخل الشخصية حتى الآن ولكن من المقرر أنه سيعرض في رمضان 2021، واشتغلت مع ياسر جلال مسلسل رحيم والحمد لله كسر الدنيا ودي تاني تجربة مع بعض وأتمنى أن ينجح، وفي مسلسل آخر اسمه "عمر الناجي" سيعرض على watch it، مع الفنان أمير كرارة.

ليه الفن اللبناني في أزمة يعني المشكلة في الإنتاج ولا النصوص ولا المواهب؟

ج- الفن اللبناني مش في أزمة خالص نسبًا للي بيحصل في لبنان كتر ألف خيرهم أنهم عارفين يشتغلوا في ظل الظروف الصعبة اللي بيمروا  بيها انتاجيًا وإخراجيًا وتمثيليًا.

هل مقصود إن حياتك الشخصية وأولادك يبقوا بعيد عن الإعلام؟

ج- نوعًا ما مقصود أريح وأحسن وهما لما يكبروا يقرروا وشغلي حاجة وحياتي حاجة.

إيه أطرف المواقف اللي اتعرضت ليها في مصر؟

ج- أول مرة أشوف فيها الملوخية المصري مكنتش عارفة أنها بتبقى كدة كنت فكراها بايظة، تاني مرة بيقدموها ليا فشميت ريحتها لقيتها حلوة جدًا فأدمنتها.