الورقي
تفاصيل شكاوى العملاء ضد البنوك بعد قرار تأجيل سداد أقساط القروض لمدة 6 أشهر
اشتكى عدد من عملاء البنوك العاملة في مصر، من ارتفاع نسبة فوائد القروض، بعد قرار البنك المركزي، بتأجيل السداد لمدة 6 أشهر.
وقال أحد العملاء: «أنا عامل قرض بـ100 ألف جنيه لمشروع شنط بلاستيك (أكياس) عن طريق التوزيع بالأسواق ملتزم بدفع الأقساط بمواعيدها من حوالي سنة بدفع 3775 جنيه شهريا».
وتابع: «حاليا مفيش شغل ولا بيع نهائي لإغلاق الأسواق ذهبت للبنك عشان مبادرة السيد المحافظ مدير البنك المركزي لتأجيل الأقساط طالبوني البنك بالتوقيع على طلب لتأجيل الأقساط مقابل فائده 12 ألف جنيه أعمل أيه عاوز حل حرام عليهم والله».
ومن ناحيته أضاف عميل أخر: «أنا عندي كافية وطبعا مقفول نهائي وجايب منهم 150 ألف وحاطين عليا فايده 15800 على الـ6 شهور تاجيل وطلبوني عشان أروح أمضي ومش رايح».
بدوره قال عميل أخر: «للأسف هما معتمدين على الثغرة اللى في البيان، أنا شخصيا عندي قرض في بنك مصر، بعد ما قالوا هيرحلوا بدون فوائد غيروا كلامهم أول أمبارح وقالوا القرار أتغير وهيبقي في فوائد، وخدمة العملاء قالوا هتعرفوا الزيادة بعد 6 شهور اللي هوا عمياني أو إلغي المبادرة».
وأضاف: «الحل الواقعي حاليا أن الناس تحاول تتصرف وتسدد عشان ميزدش عليها فوائد مركبة واللي مش قادر الله أعلم مصيره أيه لأن كل بنك ماشي بمزاجه ومحدش فاهم حاجة».
وقال عميل آخر: «أنا عميل بنك الإمارات دبي الوطنى، البنك بينفذ مبادرة البنك المركزى على مزاجه، واخد قرض وبتدفع قسط شهرى قيمته مثلا 3000 يقوم البنك ينفذ المبادرة إزاى بقي أنه يعفيك من الدفع لمده 6 شهور يعنى يعفيك من دفع مبلغ 3000*6=18000».
وأضاف: «ولكن يتم تعديل القسط الشهري ليكون مبلغ 3300 يدفع فى بداية كل شهر بعد 6 شهور من الآن يعنى زود كل شهر 300 جنيها فى عدد باقى شهور القسط اللى عددهم تقريبا 118 شهر يعنى 300*118=35400 يعنى البنك هياخد فائدة على تأجيل القرض مبلغ 17400».
وتابع: «فبعد مكالمة طويلة مع خدمه العملاء يقولى أيه الموظف والله يا فندم لو مش عاجبك قدم طلب بإلغاء التأجيل وعدم قبول حضرتك المبادرة يعنى تأجل مبلغ 18000 وتاخدهم 35400 رسالتى فى الموضوع ياريت الجميع يتأكد من البنك اللى هو بيتعامل معاه».
واشتكى عميل أيضًا، قائلًا: «ده نصب من بنوك مصر كلها حضرتك هتأجل الاقساط من غير أى غرامة تأخير، والأقساط بتتاجل لمدة 6 شهور لكن حضرتك بتدفع عليهم فائدة وكل واحد طبعا على حسب قرضه أو المبلغ اللى واخده يعنى الفائدة للناس المتوسطة اللى بتدفع منة 3 إلى 4 آلاف بيزيد عليهم فائدة من 500 جنيه وأنت طالع فى الشهر».
وأضاف: «وكمان في بنوك هتدفعك الفائدة على باقى اقساطك كلها زى #بنك_دبى_الإماراتى مثلا، أنا مأجل ٦ شهور عايز تدفعنى ٣ سنين زيادة 500 جنيه فى الشهر إزاي».
وقال عميل أخر: «خدت القرض بـ50 ألف بقالى 8 شهور بسدد بنتظام وكنت جايب القرض عشان أفتح كافتيريا وطبعا الكافتيريا مغلقة بسبب كورونا روحت أجل السداد 6 شهور، لقيت البنك هياخد مني فايدة تأجل القرض 5110 جنيهات، يعني نصف ما بسدد القسط الطبيعي، وبعدين يقولي تجي 10/1 ومعاك 7000جنيه، فوايد التاجيل + القسط يعني، ده بنك مصر الإسلامي».
وتابع: «فين المسئولين اللي عملوا لنا البحر طحينة أنتم بتقفوا معانا ولا بتدبحوا فينا حرام عليكم هنجيب منين وأنا قفلين المشروعـ فين محافظ البنك المركزي اللي بيقول عندنا فائض لحد شهر 10».
وكان البنك المركزي قرر تأجيل جميع الاستحقاقات الائتمانية للبنوك على العملاء من المؤسسات والأفراد (تشمل القروض لأغراض استهلاكية والقروض العقارية للإسكان الشخصي) لمدة 6 أشهر.
وتضمن قرار البنك المركزي، عدم تطبيق عوائد أو غرامات إضافية على التأخر في السداد.
وأشار المركزي إلى أن القرار يأتي إلحاقا للكتاب الدوري الصادر بشأن التدابير الاحترازية الواجب اتخاذها لمواجهة آثار فيروس كورونا، وفي ضوء متابعة أوضاع وتطورات السوق المصرفي.
