رئيس التحرير
خالد مهران
count
count

ويزو لـ"النبأ": بدأت بدور عاهرة.. وأول سوكسيه سببه ضحكة رقيعة

وزير مع محررة النبأ
وزير مع محررة النبأ


خبرتى فى البطولة المطلقة "زيرو".. وانطلاقتى الفنية "جد جدا"

قبل الفن كنت مدرسة كيمياء.. وسميت ابنى "إسماعيل" لهذا السبب   

الضرب فى "مسرح مصر" كان حقيقى.. وأوقفنا العروض بسبب "الحفظ"  

فنانة كوميدية استطاعت أن تدخل عالم الفن من أوسع أبوابه، وهو الكوميديا، لتتربع في قلوب الجمهور، بخفة ظلها وأدائها المتميز، ولم تقف أمامها أي عقبات في طريق الوصول للنجومية.

الفنانة دينا محسن، أو "ويزو"، كما عرفها الجمهور، إحدى نجمات مسرح مصر، اللاتي تألقن على أيدي النجم أشرف عبد الباقي، في 130 مسرحية استمتع بها الجمهور المصري والعربي، كانت حاضرة في حوار مثير مع "النبأ" كشفت فيه كواليس عملها بمسرح مصر، والكثير من أسرار حياتها الشخصية، وسألناها: 

في البداية نود أن نتعرف على بدايات مسيرتك الفنية؟

كنت بدرس في كلية التربية وباخد 13 مادة، ولقيت فريق مسرح الكلية ناس لذيذة جدا، وكلهم أقسام مهمة جدا، فدخلت المسرح لقيتني بعرف امثل، وكنت بحب التمثيل والأفلام والتقليد.

كيف تقبلت عائلتك فكرة التمثيل؟

في البداية انتابني الرعب من أمي، أن تعرف إني بمثل، أبويا بس اللي كان عارف، وكان بييجي يحضرلي مسرحيات، وكنا بنعمل مسرحيتين في السنة (صغرى وكبرى) والصغرى دي بيكون مخرجها طالب مننا، أما الكبرى دي بييجي مخرج كبير من برة يخرج العمل، وفي الصف الثالث أمي عرفت، وطبعا كنت واثقة من اللي هتقوله، وبالفعل قالتلي لو شيلتي مادة مش هتمثلي تاني، ثم قدمت في ورشة الإبداع الفني مع أستاذ خالد جلال، وبعدين أستاذ أشرف عبد الباقي أخدني معاه في برنامج "جد جدا" ومن هنا جاءت انطلاقتي الفنية.

حدثينا عن أولى تجاربك السينمائية؟

كانت بدايتي في السينما مع الفنان سامح حسين في فيلم "جيران السعد" ثم فيلم "جوازة ميري" مع الفنانة ياسمين عبد العزيز.

اشتغلتي إيه قبل الفن هل كنتِ مدرسة فعلا؟

اشتغلت لمدة 3 سنوات مدرسة كيمياء للثانوي بنين.

حدثينا عن مشاركتك في المسرح القومي؟

شاركت في مسرحية واحدة اسمها "الجريمة والعقاب" للروائي الروسي فيودور دوستويفيسكي، والمسرحية دي كانت أول مسرحية يتم فيها تقييمي بالجامعة، وحصلت على أحسن ممثلة مركز ثاني، وكنت طالعة بدور عاهرة "صاحبة كباريه"، وكنت بقول جملة واحدة، ضاحكة "كانوا متنبئين لي وحطوني على التراك صح بصراحة"، وأول سوكسيه أخدته في حياتي كان على ضحكة رقيعة.

كيف ترين الانتقادات التي تعرض لها مسرح مصر؟

أذكر تعليقا للأستاذ محمد صبحي لما قال إن مسرح مصر هو سهرات ليلية، فأستاذ أشرف عبد الباقي طلع قاله ده صح، إحنا بالنسبة لينا هو الليدر، لما يقول حاجة فيبقى أمين يعني، بس بالنسبة لينا والرسالة اللي عايزين نوصلها في وقت كانت الدنيا كلها مكتئبة وتعبانة نفسيا، فكون إحنا نضحك شخص متضايق فأنا كسبت ثواب كبير.

كلمينا عن كواليس وأبرز المواقف الكوميدية في مسرح مصر؟

فكرة الضرب في كواليس المسرح كانت بتيجي بشكل تلقائي مش مقصودة ولا مترتبة، مش منطقي خالص أني اعمل بروفة ضرب يعني بس هي بتبقى حاجات على الهواء فحظهم معايا كدة بقى أعملهم إيه، وعن مشهد جلوسي فوق خاطر، كمان بنبقى مرتبين كلام وفجأة لما بنطلع على المسرح وتفاعل الجمهور بيسخن جدا وبيكون عندى استعداد اشيل اللي قدامه وارميه عليهم عشان يضحكوا جدًا، ومشهد لما وقعت بأوس أوس على الأرض كان حقيقي والجردل رشق في قلبي حرفيا، ومسرحية الفلاحين مصطفى خاطر اتعور في ايده بالفعل، وفي حاجات كانت بتبقى غصب عننا ولكن بتعجب وبضحك الجمهور جدا، وفي 3 حاجات أستاذ أشرف محذرنا منهم (السياسة والجنس والدين).

لماذا توقفت عروض مسرح مصر رغم ما تحقق من نجاح؟

عملنا 130 مسرحية بـ130 فكرة، وأصلا أفكار الدراما على بعضها 35 فكرة، فإحنا عملنا 130 مسرحية فيها أفكار وشخصيات مكررة، أنا شخصيا عاملة دور الأم في أكتر من 10 مسرحيات، بس ممكن تبقى في لازمة وإفيه وأداء مختلف، فحسينا أن إحنا كدة تمام ومحتاجين نعمل بروجيكت تاني بشكل جديد، لأن الناس حفظت ما قدمناه.

كلمينا عن دورك في "تيمون وبومبا"؟

أنا فعليًا معرفش أي شيء عن تيمون وبومبا، غير أني في المسلسل، لأن هذه مرحلة الكتابة ولن أقرأ الدور حتى الآن لحين الانتهاء، وأيضا أبطال العمل مشغولين، وأكرم حسني كان لديه عرض مسرحيته الجديدة "عطل فني" وأحمد فهمي بيصور الفيلم بتاعه، فإحنا مستنين خلال الشهر الجاري لنبدأ تصوير وأعرف ملامح شخصيتي في العمل.

ما مصير فيلم "ويزو سكول" وسبب عدم عرضه حتى الآن؟

الفيلم ده تفاصيله مش لذيذة معايا، اللي عجبني في الفيلم كله هو أني مش هتعب في الشخصية وهتعامل كويزو، بس طلعت البطولة شيء صعب شوية لأن أنتي مش بتركزي في نفسك بس، لأ لأنك بتركزي في نفسك ومن حولك والديكور ومشاكل التصوير والإضاءة، فاكتشفت أني معنديش خبرة في فكرة البطولة تمامًا، بس معجبة بالفيلم، وطبيعي أي شركة إنتاج جديدة متعرفش تسوق أو ليس لديها الخبرة الكافية فكان طبيعي اللي حصل، ومش زعلانه وهيجيله وقته، وأنا غير مؤهلة للبطولات المطلقة حاليا ومحتاجة اتنطط شوية من هنا لهنا.

ما علاقة "ويزو" بـ "الحوت الأزرق"؟

ده إفيه رميته بشكل كوميدي وكنت نشرت صورة على السوشيال ميديا، وأنا لابسه ترينج من اللون الأزرق، فالجمهور علق بالحوت الأزرق.

شايفة نفسك فين بين نجمات الكوميديا؟

أنا شايفة نفسي زيرو، ولسة معملتش حاجة في حياتي ومحققتش أي حاجة من اللي نفسي اعملها، والواحد بيسعى وبيقدم أفضل حاجة عنده.

من أين ورثتي روح الكوميديا؟

جدتي كوميديانة فظيعة وكمان والدي.

إيه حكاية لقب ماما عضلات في المدرسة؟

ويزو ده كان "nickname" عادي جدًا طلع عليا في 3 إعدادي، وهو كان اسم لانشون كنت باخده معايا كتير جدًا في المدرسة، وصحابي اللي كانوا معايا في إعدادي هما اللي طلعت بيهم لثانوي وللجامعة فاتعودوا على الاسم، أما لقب "ماما عضلات" أطلق عليا وأنا في 5 ابتدائي لأن كنت أطول وأعرض طفلة في الفصل كله بنات وأولاد، ومكنش عندي رأفة بأي حد وكنت بمسك العيال أضربها وكدة.

ما الفرق بين "ويزو الأم" والفنانة"؟

في تغيير تام من ناحية الأفكار والأولويات، وبقيت بصحى من النوم بدري خمس تسع عشر ساعات عشان اقعد معاه، وغير كدة وكدة حاجة جديدة عليا مش فاهمة إيه، يعني أول شعور انتابني أول ما ولدت إسماعيل (إيه ده هو هيفضل معايا طول عمري؟) وكل ما بيكبر كل ما بتعلق بيه أكتر، وبقى حديثي مع صحابي دايمًا عن إسماعيل، ولما بروح اشتري حاجة وعيني تروح عليها "السيريلاك" حتى لما بسافر برة وأجي اعمل شوبينج بيكون له لأنه فرق في حياتي جدًا.

هل هناك سر وراء اختيار اسم "إسماعيل" لابنك؟

سميته على اسم سيدنا إسماعيل، ويقال إن الأطفال لما بيتسموا باسم بيكون ليهم نصيب من اسمهم في الدنيا فأنا نفسي ابني يبقى بار بينا أنا وأبوه وفي نفس الوقت بحب الاسم ده جدًا، وأسماء الأنبياء عمومًا.

ما سبب زيادة وزنك منذ الطفولة؟ ومش بتفكري تخسي؟

ماما رضعتني لمدة 3 سنوات واتولدت 7 كيلوجرامات، وكانت بتاخد فيا كورسين فيتامين لأنها كانت تحاول أن تعوض ما حدث في أختي لأنها كانت بتمرض كتير، فتجنبت هذا فيا، وبالنسبة للخسسان أنا هفضل زي ما أنا حتى لو خسيت حتى لو شالوا مني شاورما، وبعد الولادة فجأة لقيت نفسي مش أنا بعد المغات، وأنا شايفة أن جسمي له عامل كبير في الضحك عند اللي قدامي، وانا مبحبش الرفع وفي وزن معين لما بزيد عنه برجعه تاني لأنه بيأثر على ركبي.

الفنانات بعد الجواز والولادة يقل نشاطهن لكن ما شاء الله نمسك الخشب نشاطك بيزيد كيف؟

والله للأمانة اتسحلت لأن وقتها كان عندي تصوير مسرح مصر، وكان من المفترض أن أركز في عملي وحياتي الشخصية معًا، وأنا وزوجي لأنه في نفس المجال وبناخد رأي بعض في الشغل كتير وده ساعدني أوفق بين الاتنين.

مين من النجوم "الكوميديين" المفضلين لديك؟

بالنسبة للممثلين الكوميديين طبعًا أولهم الزعيم عادل إمام، وكمان سعيد صالح وفؤاد المهندس وعبد المنعم مدبولي وإسماعيل ياسين.