بالفيديو.. ريهام سعيد ترد على اتهامها بالمتاجرة بمرضها: «سفالة وقلة رحمة»

نشرت الإعلامية ريهام سعيد مقطع فيديو، عبر حسابها الشخصى على إنستجرام، رداً على اتهامها بالمتاجرة بمرضها وأنها لم تتعرض لأى مرض خطير، بل كانت تجهز نفسها للخضوع لعمليه تجميل في الأنف.

وقالت ريهام سعيد فى مقطع الفيديو "أنا شيفاها سفالة وقلة ذوق وقلة رحمة، هل أنا هقعد حابسة نفسى فى البيت شهر علشان أمثل إنى تعبانة؟، هل أنا لميت تبرعات على مرضى؟ هل لما تعاطفت معايا مرتبى زاد ؟ أنا ست كويسة غصب عنك، ربنا بيبتلينى علشان بيحبنى، أنا مطلعتش أعيط للناس وأعمل فيديوهات وأقول الحقونى، على فكرة أنا بقالى 3 شهور عيانة ومقولتش لحد، دايما قوية وعمرى ما تاجرت بحاجة".

وأضافت "أنا مبحبش أصعب على حد ومبحبش حد يتعاطف معايا، وأنا ست قوية جدا بإيمانى بالناس اللى هتقف معايا، أنا عملت خير كتير جدا فى حياتى وواثقة إن ربنا هيطلعنى من أى حاجة وحشة، هو أنا أصلا كنت محتاجة تجميل فى مناخيرى؟ ولا محتاجة تجميل فى أى حاجة ؟ وحتى لو عملت عملية تجميل أنت مالك، دى حرية شخصية، أنت مالك، أنا تعبت وكنت بموت زى اى واحد، الناس المريضة دى، على فكرة مبيكذبش غير الكذاب ومبيخونش غير الخاينين، يعني شريف مدكور لما كان بيستقبل الناس فى بيته يبقي كدا هو مكنش عنده كانسر؟ كان بيمثل؟ هل هو الواحد لازم يموت علشان ميكنش بيمثل، هل لازم يكون خبر وفاتى انهاردة علشان تقول انها مش بتكذب".

واختتمت قائلة: "أنا كنت عيانة وخفيت وراجعة أحسن وأقوى من الأول وراجعة برنامجى وهيبقى أحسن من الأول، بإذن الله بإذن الله، يوم الأحد هتبقوا مكسوفين أوي علشان كنت مصورة كل اللى حصل، أد إيه هى حاجة قذرة أنك تثبت للناس أنك كنت بتموت، أنا قلت لما أموت ادعولى مش اتعاطفوا معايا، أنا مش عايزة أصعب على حد أنا طلبت الدعاء بس، الدكتور لما تشوفوه هيقولك اللى حصل دا معجزة، كان علطول يقولى انتى محتاجة معجزة، لو مستكتر عليا ان انا اخف دى مشكلتك، لو مستكتر عليا ان انا ارجع شغلى واعيش حياتى، وكنت عاوز خبر وفاتى للاسف دا مش وقتى".