الورقي
عبارات محبة وفكاهة وذكريات جميلة في عيد ميلاد عادل إمام
أدلى العديد من النجوم الفنية بعبارات تدل على مدى حبهم واعتزازهم بقيمة الفنان عادل إمام، وذلك بمناسبة عيد ميلاده.
جاءت تهنئة الفنان أوس أوس، نجم مسرح مصر، بعيد ميلاد الزعيم عبر صفحته الخاصة بموقع تبادل الصور "انستجرام"، فكاهية بعض الشيء فهي وجهت أولا لابنه محمد إمام، حيث نشر صورة الزعيم تليها صورة تجمعه بمحمد إمام في أحد المشاهد التي جمعت بينهما في مسلسل هوجان، وكتب عليها: "يا هوجان قول لبابا كل سنة وانت طيب.. كل سنة وانت طيب يا زعيم ربنا يخليك لينا.. رمضان مالوش طعم من غيرك.. الزعيم واحد بس.. #عادل_إمام".. "#اوس_اوس.. #حورس.. #هوجان.. #محمد_إمام
أما الفنان أحمد زاهر فقد نشر صورة للزعيم من مسرحية "الزعيم" وعلق: "كل سنة وانت طيب يا زعيم.. يا زعيم الفن المصري والعربي.. كل سنة وانت البسمة والضحكة اللي في حياتنا.. انت اللي علمتنا الف والتمثيل والكوميديا والنجومية.. انت اللي علمتنا احترام الفنان لنفسه ولجمهوره.. اخترام عقلية المشاهد.. انت مثل أعلى لكل فنان صغير أو كبير.. انت اللي جسدت تاريخ مصر في كل أفلامك.. اللي عايز يعرف تاريخ مصر يتفرج على أفلام عادل إمام.. ربنا يخليك لينا ويديلك الصحة يا أغلى نجم في حياتنا.. كل سنة وانت نجم مصر والوطن العربي الأول بلا منازع أو منافس على مر السنين #بنحبك_يا_زعيم".
ومصطفى خاطر قرر يحتفل بعيد ميلاد الزعيم على طريقته، فنشر له صورة شخصية معلقا عليها بعبارات مقتبسة من الأدوار التي قام بها الزعيم في مختلف أعماله الدرامية والسينمائية والمسرحية، كتعبير منه على مدى التأثر به، فكتب: "بطة مش ليك يا مرزوق.. مصر اللي يشوفها من فوق غير اللي يشوفها من تحت.. انا بخاف من الكلب يطلعلي أسد.. وداعا ايها الفنكوش.. انا هحلااااااااام.. انت ما بتجيش ليه، مش تبقا تيجي.. احنا بتوع الأتوبيس يا اخوانا.. بتعرف تعد لحد كام.. انا الزعيم".. ثم أكمل عباراته: "لو عاوز تعرف مصر كويس والحياة عندنا شكلها إيه.. ازاي بنضحك ونحب ونحلم ونحزن.. لو حابب تعرف ليه الوطن العربي بيحبنا وبيحب لهجتنا.. من الأخر لو حابب تعرف مصر بجد اتفرج على أعمال الزعيم #عادل_إمام.. مفتقدينك السنة دي في رمضان.. كل سنة وانت طيب يا زعيم وبخير".
أما عن الفنان أحمد السقا فكتب في تهنئته للزعيم بعيد ميلاده عبر صفحته الرسمية على "الانستجرام" معلقا على صورة جمعت بينه وبين الفنان عادل إمام: "صانع السعادة.. مؤسس مدرسة البهجة والفرحة.. كل سنة وانت دايما بخير.. ربنا يبارك في صحتك.. الزعيم عادل إمام".
وعيدت الراقصة والممثلة فيفي عبده على الزعيم بنشر صورة تجمعهما وعلقت: "كل سنة وانت طيب يا زعيم يا ابن مصر الجدع.. ربنا يديك الصحة وعقبال مليون سنة يارب".
وعبرت الفنانة روجينا عن تهنئتها للزعيم بعيد ميلاده بنشر صورة له وكتبت معلقة عليها: "كل سنة وانت طيب.. كل سنة وانت صاحب السعادة.. حفرت حبك في وجدان المصريين ووجدان الوطن العربي.. رحلة طويلة وعظيمة في الفن اكتشفت فيها الطريق لقلوب الجماهير لأنك منحتهم السعادة، الحلم، الأمل، البهجة، كل سنة وانت الزعيم".
نشر الفنان شريف رمزي صورة الفنان عادل إمام مرفقة بصورة ذكرى لإهداء الزعيم له أثناء عرض مسرحية "الواد سيد الشغال" معلقا عليها: "ده أول أوتوجراف اتكتبلي في حياتي وكان منك يا أستاذ عادل لما جيتلك في أوضتك في استراحة مسرحية الواد سيد الشغال من سنين طويلة جدا كنت طفل صغير وقلتلك إني قد إيه بحبك وإني نفسي أطلع ممثل زيك وبحلم اشتغل معاك.. وساعتها قلتلي كلام كتييير جميل.. وبادلتني مشاعر طيبة ونصحتني نصايح.. ومضيتلي الأوتوجراف ده قبل ما يخترعوا الموبايلات وتطلع موضة السيلفيهات.. وتمر السنين وحلمي يتحقق وأشتغل معاك أحلى مسلسل العراف وأفضل وحافضل محتفظ بالأوتوجراف ده طول حياتي لأن دي كانت أول مرة أشوفك فيها.. كل سنة وانت طيب يا أستاذ عادل".
واكتفت الفنانة دنيا بجملة واحدة على صورة جمعتها بالزعيم عادل إمام فكتبت: "كل سنة وانت الزعيم".
ونشرت الفنانة مي عمر صورة جمعتها بالزعيم في أحد المشاهد الدرامية بينهما معلقة: "كل سنة وانت بخير.. كل سنة وانت الزعيم".
ونشر الفنان عمرو يوسف صور تجمعه بالزعيم كاتبا عبارة "كل سنة وانت طيب.. كل سنة وانت الزعيم.. #عادل_إمام".
وكذلك الفنانة هبه مجدي عيدت على الزعيم من خلال صفحتها علي "الانستجرام"، بنشر صورة جمعتها بالزعيم عادل إمام معلقة: "كل سنة وانت طيب يا زعيم ربنا يخليك لينا".
وكتب الفنان طارق صبري تهنئة للزعيم على صورة جمعت بينهما: "كل سنة وانت زعيم يا زعيم".. جاء ذلك عبر صفحته الرسمية على موقع تبادل الصور "الانستجرام".
وأعربت الراقصة والفنانة دينا، في تهنئتها للزعيم بعيد ميلاده عن مدى فخرها به، فنشرت صورة خاصة له وعلقت: "كل سنة وانت الزعيم.. زعيم البسمة والضحة اللي من القلب.. كل سنة واحنا فخورين بيك.. ربنا يديك الصحة ويخليك لينا.. كل سنة وانت طيب.. الزعيم عادل إمام".
يذكر أن الفنان عادل إمام من مواليد 17 مايو 1940، برغم غيابه عن المارثون الرمضاني 2019 لظروف مرضه، إلا أنه له العديد من الأعمال الدرامية منها فرقة ناجي عطا الله، وعوالم خفية، وكذلك الكثير من الأفلام السينمائية كالمتسول، والهلفوت، وغيرهم، والمسرحيات منها مدرسة المشاغبين، والواد سيد الشغال.
