الورقي
السيسي يكشف تفاصيل جديدة عن «اعتصام رابعة»
قال الرئيس عبد الفتاح السيسي: «متنسوش إن إحنا خلال الخمسين ستين سنة اللي فاتت مكنش فيه حياة سياسية كاملة زي ما بنتمنى في الدولة المتقدمة.. لأن يعني منذ 1952 بقي حزب واحد وشكل واحد وده كان ليه تأثير على شكل الأحزاب والقوى السياسية، واللي هي في الآخر بتبقى رقيب ويكون ليها فرصة إنها تدخل الدولة وتعمل حكومة أو ائتلاف.. بالتالي تقدر هي تخلي فيه توزان ميبقاش فيه حد بينفرد بالسلطة لوحده».
وقال الرئيس: «أنا عاوز أقول للمصريين إللى بيشوفوني هو إحنا فيما يخص الناس إللي هي بترفع السلاح علينا.. هل كان عندنا خيار تاني.. الناس اللي بتقول أنتو متشددين كأجهزة أمن مع الناس دي.. أنا قلت الكلام قبل كده.. لما واحد ياخد مليون جنيه ويفجر كنيسة مش بيكسر خاطر المصريين كلهم.. ولما ييجي يخش على منشآت سياحية ويدمرها ويوقف حال خمسة ستة مليون بياكلو عيش وأسرهم عايشة عليهم وميشتغلوش ولا يلاقو وتخسر بلد زي مصر 10 إلى 12 مليار دولار.. ياتري طب أعمل إيه.. فبنضطر نبقى حازمين لأجلكم لأنكم مش هتستحملو وطبيعي أنكم متستحملوش».
وتابع: «أنتو أمنتوني وأنا لازم أخاف على الأمانة دي.. هم لوعاشوا معنا بأمان وسلام.. لن يتعرض لهم أحد.. يعيشوا في أمان وسلام معانا.. مين إللى بدأ.. إحنا اللي بدأنا ولا هم.. هم اللي بدأوا.. وأنا بقول للمصريين هاتو بيان 3 يوليو وأقروه.. لم يتم القبض على واحد.. ولم يتم الإساءة لأحد.. وتركنا الناس في رابعة لغاية بعد العيد أكتر من 45 يوما.. أنا هقولكم مش سر برضو.. الناس اللي اتوسطت ذنب كتير من الذنوب في رقبتهم لأنهم أتوا إليا في رمضان وقالو ليا من فضلك يعني ممكن متعملهمش حاجة.. قولتلهم يقعدوا بدل اليوم كذا يوم بس كل اللي يعملوه ميخرجوش بره رابعة على المطار والعباسية يوقفوا حال البلد».
وأردف الرئيس: «راحوا ومرجعوش ومقالوش إن هم قالولهم هنموتكم جوه عندنا في رابعة ومترجعوش.. طالما السيسي وافق على كده يبقى خايف من الأمريكان.. والله ما ماكنت خايف من الأمريكان.. أنا كنت خايف من ربنا.. مسبوش خيار تاني.. ولغاية دلوقتي مسبولناش خيار تاني.. كل ما نمسك نلاقي معاهم السلاح والمتفجرات والتخطيط والقتل والإرهاب.. للأسف فكر خطير غير قابل للحياة ولا مع نفسه.. يقتل نفسه.. أنتم مسئولين مني في رقبتي».
وقال: «إحنا هنعامل المواضيع دي بالقانون والحزم المطلوب أنا مسئول عن الناس اللي بتشتغل في السياحة وبتاكل عيش.. أو بقى تقوليلي خرجهم وأنا مستعد أنفذ كلامكم بس محدش يسألني على حاجة لا على أمن ولا استقرار.. أنا بكلمكم بجد.. أنا بكلمك إذا كنتم يا مصريين.. أصل أنتم الشعب وقراركم ملزم بالنسبالي دي إرادة شعب لو أنتو شايفين كده نخرجهم بس محدش يسألني على أمن وأمان واستقرار وزارعة .. ولكن طالما أنتو موافقين على التفويض إحنا معاكم».
