بالصور.. أدمنز صفحات " مدينتي والرحاب" ينقلبون على "هشام طلعت مصطفي" لهذا السبب

بالرغم من فرحة جميع سكان " مدينتي، الرحاب" من خروج هشام طلعت مصطفي وعودته لإدارة المدينتان ومحاولة السكان في مساعدته لتطوير المدينتان لتصبح للعالمية كما كان يريد فوجئوا السكان صباح أمس الثلاثاء أثناء جولة "هشام طلعت مصطفي" في المدينة للوقوف على اخر التطويرات قيامة بالتحدث بأسلوب غير لائق مع أحد السكان ويدعي " أحمد حمدي" عضو إتحاد السكان وأدمن صفحة "رابطة سكان مدينتي"، وتكاتف أدمنز جروبات الرحاب ومدينتي واستنكروا ورفضوا ما حدث وقالوا في منشور لهم على صفحة " أخبار سكان مدينة الرحاب"الأتي:

"ردا على ما حدث الْيَوْمَ الثلاثاء من الرئيس التنفيذي هشام طلعت مصطفى شخصيا أثناء زيارته للمدينة تجاه جارنا المهندس أحمد حمدي عضو الاتحاد وأدمن صفحة رابطة سكان مدينتي.. وهو ما نراه علامة فارقة في أسلوب التعامل مع الشركة من قبل الملاك وأصحاب الحقوق.. وهو أسلوب  لايليق من الرئيس التنفيذي للشركة.. فنحن بصفتنا اتحاد أدمنز جروبات الرحاب ومدينتي نستنكر ونرفض ما حدث الْيَوْمَ.. ونؤكد على الآتي:

١- أننا نحن الملاك ونحن من نحدد متى نترك أملاكنا وكيف. 

٢- أن ما يحدث من ما يسمى تطوير هو في الحقيقة محاولة لإصلاح التقصير والإهمال الذي حدث خلال فترة غياب الرئيس التنفيذي وفشل الادارة. 

٣- محاولات إظهار الإهدار والفساد فيما  يحدث من أعمال  هو ليس بتشهير كما أبلغك البعض من الفشلة ولكنه محاولة للمساعدة على إظهار أوجه الفساد والقصور في التنفيذ.. ونحن نؤكد أننا لن نتوقف عن إظهار هذا القصور في الفترة القادمة وبصورة مكثفة. 

٤-  إذا كانت هذه طريقة التعامل مع من يطالب بحقوق  الملاك،  وإذا كانت هذه الطريقة للتعامل مع  الشركاء من قبل الرئيس التنفيذي فكيف ستكون طريقة موظفيه معهم؟؟؟؟

٥ - إذا كنت قد أعطيت أذنيك إلى من يفشل  مشروعاتك ويضر بسمعتك في الوقت الذي كنا نحن نقاتل هؤلاء ومازالنا ...  فإنك سوف ترى بنفسك  قصورهم وبالصورة .

الرئيس التنفيذي.. أنت مدين بإعتذار ونحن نستنكر أسلوبك..

حتي وإن لم تعتذر فقد وصلتنا رسالتك وعرفنا من هم شركائك  وستري من هو الخاسر ..

وهذا ماذكرة جارنا أحمد حمدى  ..

النهاردة أثناء زياره الاستاذ / هشام طلعت مصطفى للمدينه واثناء وجوده بمنطقه البي11 ،  كنت موجود كده من بعيد وسط الهيصه بتاعت الزياره ،  ولم اطلب مقابلته ولا حتي سلمت ولا اي شئ من قريب او بعيد. 

بعدها بشويه فوجئت باللواء علي السبكي مدير قطاع الامن بمدينتي والرحاب يناديني ويقول ان الاستاذ / هشام طلعت مصطفي عاوزك...  

بصراحه استغربت وقولت في سري يا فرج الله اخيرا الراجل وصلته الرساله والرؤيه...  اخيرا هنسق معاه ونعمل اجتماع معاه....  طبعا هواجس ايجابيه جدا بدات تدور في بالي لمده لحظات. 

المهم وصلت ليه...  قالي بصوت وطريقه مدير بيعامل موظف عنده مش عميل او شريك ...  مينفعش اللي انت بتعمله ده...  قولته بعمل ايه....  قالي كل يوم علي مكتبي الاقيهم طابعين بوستاتك ويقولوا احمد حمدي قال واحمد حمدي عاد..  فلان قال وفلان عاد... الجروب نشر والصفحه عملت...  

قولته هوه احنا بننشر او بنقول حاجه كدب او حرام او غلط او مش صح. 

قالي انا بقولك اهوه انت والكام واحد اللي عاملين مشاكل انا صارف من جيبي مليار جنيه علشانكوا...  قلتله لا مش علشانا ده علشان سمعتك والمدينه وتصحح اخطاء الشركه. 

قالي تقوم تشتمني علي النت...  قلتله محصلش وفين..  ما شتم الا من بلغ. 

قالي انت شغال ايه وفين وليه كده مش سايبين المدينه في حالها انتوا فاضيين ..  قلتله احنا مش فاضيين ولا هنسيب فلوسنا تضيع في الارض. 

المهم وبدون الدخول في تفاصيل الموضوع انتهي بانه رفض اي اجتماع الا بعد 4 شهور وقالي انا مش فاضي وورايا شغل...  ولو مش عجباك المدينه شوف لو عاوز كام في شقتك خدهم وروح مكان احسن.

بصراحه بقي انا اتصدمت فيك يا ا.  هشام...  ده لا اسلوب لا شريك ولا حتي عميل. 

علشان بس حضرتك تبقي عارف واسال من ورايا 

1- انا وغيري اللي مش عجبينك كنا هنلف علي شقه شقه علشان نجمع توقيعات علشان عفو رئاسي. 

2- انا وغيري اللي كنا بنحضر جلساتك في المحكمه لابسين تشيرت عليه صورتك علشان ندعمك. 

3- انا وغيري اللي عملنا حفله ولفينا شوارع مدينتي والرحاب لحظه خروجك. 

4- انا وغيري اللي وثقنا فيك تماما ودعمناك علشان نكون في ضهرك. 

5- انا وغيري اللي بعض الناس افتكرتنا قبضنا منك علشان نقول للناس اصبروا والامور هتكون افضل. 

6- انا اللي كنت طلبت تيجي البيت تشرب قهوه عربي. 

علشان بس قلنا انك غلطان وانك لازم تقيل كل الفشله والفاسدين اللي حواليك...  فطبعا الفاشلين دول حاولوا يوصلوا ليك صوره عنا غير الحقيقه. 

بس انت مازلت غلطان علشان سمعت منهم ومن طرف واحد ووثقت في ناس سرقتك وضحكت عليك قبل كده  ..

بكررها تاني انت في الطريق الغلط مهما كانت خبراتك ومعلوماتك...  لاننا طول الفتره اللي فاتت في المطبخ وعارفين كل صغيره وكبيره. 

عفوا يا استاذ هشام خانك اتباعك وخانك تصرفك وخانك اسلوبك مع عميل امام موظفين تطلب منهم احترام العميل. 

انا يا باشمهندس هشام بقي قبلت العرض بتاع الشقه وخد شقتي بنفس سعر المتر اللي بتبيع عليه دلوقتي في البي12 وانا هسيبهالك مخضره...  لاني الصراحه اتصدمت ومذهول. 

بس طول ما الوضع كده صدقني لن ترضي عملاؤك لا بمدينتي ولا الرحاب".