في أول رمضان بعد رحيله.. محمد محمود عبد العزيز يوجه رسالة «مؤثرة» لوالده

يعيش الفنان محمد محمود عبد العزيز، حالة شديدة من الحزن، بعد رحيل والده، خاصة أنه يقضي حاليًا أول شهر رمضان، بدونه.

ووجه "محمد"، رسالة مؤثرة لوالده، عبر موقع الصور الشهير "انستجرام"، كما أهدى له صيامه، وكل عمل خير سيقوم به.

وكتب: "كل سنة وحضرتك طيب وبخير يا أبويا وصاحبي وأخويا وكل ما ليا، أول مرة في حياتي ماتكونش معايا وقدام عنيا طول المدة دي بس برضة كل سنة وحضرتك طيب لأني حاسس إنك بخير وفي مكان أحسن من اللي إحنا فيه بكتير".

وتابع: "وعايز أهدي لحضرتك كل حاجة بعملها سواء إنتاج أو تمثيل أو أي حاجة كويسة ممكن أعملها وتبسطك وأي خير بعمله أو بحاول إني أعمله زي ما حضرتك علمتني.. والسنادي بهدي حضرتك صيامي وكل ركعة وكل حرف هقرأه من المصحف الشريف اللي حضرتك ماكنتش بتسيبه".

وأضاف: "ربنا يتقبل مني ويقدرني وأبقى ربعك في أي حاجة.. رمضان كريم.. كل سنة وحضراتكم جميعًا بألف صحة وسلامة وخير وربنا يريح قلوبكم ويشفي كل مريض ويرجع كل بعيد ويصبر أي واحد موجوع ويهون علينا جميعًا يارب بحق الشهر الفضيل.. اسألكم الفاتحة والدعاء لأبويا ولأمواتنا جميعًا"