بالفيديو.. غادة إبراهيم: «أنا دخلت الفن بفلوسى.. وطز في الوسط كله»

عادل توماس: مفيش غير الفنانة غادة إبراهيم واحدة ؟
غادة إبراهيم: فى عشرين غادة إبراهيم.

عادل توماس: فنانات..؟
غادة إبراهيم: أدخل كدا على «جوجل سيرش»، وأنت تلاقى مليون واحدة وجه جديد اسمها غادة إبراهيم، أكتب كدا غادة إبراهيم ممثلة مصرية هيطلعلك غيرى خمسة ستة غادة إبراهيم، مابين موديل إعلانات، ووجه جديد وكومبارس يمكن ستة سبعة، ودى كانت مشكلتى فى النقابة، وبعت لأشرف ذكى كذا مرة أن فى كذا واحدة بنفس الاسم، ولازم يغيروا أساميهم، وتقدر تتأكد من نقابة المهن التمثيلية فى غادة إبراهيم كذا أسم ولا لأ، عندك النقابة وعندك أشرف ذكى .. ومن شهرين تلاتة، كلمت أشرف ذكى لأن واحد «ريجيسير» كلمنى قالى فى واحدة ساكنة فى الهرم أسمها غادة إبراهيم، بنت وجه جديد، دا غير إن فى تلاتة أربعة، بيمثلوا أدوار مهمة، مش ممثلات كبار بس أدوار مهمة، اسمهم غادة إبراهيم برضو، وقالى فى واحدة أسمها غادة إبراهيم برضو وعلى فكرة شعرها أسود برضو، قولتله طب سجل الكلام ده فى النقابة، علشان بعد إذنك بالكلام ده الاسامى هتبقى مختلطة.. وفى بدايتى خالص غادة عادل كان أسمها غادة عادل إبراهيم، وكان أسمها الفنى غادة إبراهيم، وبعت شكوى فى النقابة فى الأول غيرت أسمها لغادة عادل، هى أسمها الحقيقى غادة إبراهيم، وأنا غادة محمد إبراهيم، وفعلا غيرت أسمها لغادة عادل، علشان أنا بدأت قبل منها.. حبيبى مفيش حاجة بتستخبى، الكويس بيبقى معروف واللى مش كويس معروف، والشمال معروف واللى مش شمال معروف، مفيش حاجة بتستخبى فى الوسط الفنى.. معروف أن غادة إبراهيم داخلة الوسط الفنى دا بفلوسها.

عادل توماس: احنا لما اتصلنا بحضرتك علشان قانون الصحافة بيعطيكى حق الرد ؟
غادة إبراهيم: حضرتك أنا دارسة قانون زىي زيك، يعنى الحمد لله، احنا زملاء قبل الفن، انسى الفن، طز فى الفن.