الورقي
حورية فرغلي: محمد رمضان مش «نمبر وان».. واشتغلت معاه من غير أجر
كشفت الفنانة حورية فرغلي، حقيقة خلافها مع الفنان محمد رمضان، وعدم تبادله السلام معها أثناء تصويره لمسلسله الشهير «الأسطورة»، وخاصة بعد نجاحهما سويًا في فيلملي «عبده موته» و«قلب الأسد».
وتابعت، خلال لقائها مع الإعلامية إنجي هشام، ببرنامج «كشف حساب»، المذاع عبر قناة «هي»: «لأ محصلش إني روحت لـ محمد رمضان الكواليس لما كان بيصور الأسطورة ومرضيش يسلم عليا، أنا كنت بصور قريب منه وقتها فيلمي «طلق صناعي»، وعرفت إن هو في نفس المكان.. روحت سألت عليه قالولي بيصور قولتلهم قولوا له إني عايزة أسلم عليه، وبعدها اليوم خلص وأنا كملت شغلي عادي».
وتابعت «حورية»: «مقولتي إني مثلت معاه مجاملة، قولت كلمني وأنا بصور حكايات بنات، واشتغل قبلها في دوران شبرا كأول مسلسل ليا، لقيته بيكلمني وبيقولي يا أستاذة لقيت المنتج اللي هيعملي أول فيلم فى السينما، كنت عايز أطلب من حضرتك طلب، البنت اللي المفروض اللي تبقى قدامي مش لاقيين الحد المناسب، قالي حضرتك ممكن تيجي مكانها، قولتله طبعًا يا حبيبي، وروحتلي عند أحمد السبكي، وكنت أول مرة أعمله، ومضيت عبده موته، وقولتله ده كادوه مني ليك، وبعدين عملنا قلب الأسد ومخدتش أجر».
وأكملت أنها لا ترى محمد رمضان «نمبر وان»، كما يطلق على نفسه، قائلة: «هو شايف نفسه رقم واحد ده براحته، لكن كل زملائي رقم واحد في حتتهم وشغلهم المميز، ولو عرض عليا اشتغل معاه أكيد هوافق ده نجم كبير».
