أول ظهور لـ لقاء سويدان بعد إصابتها بالعصب السابع: جالى بسبب حالة نفسية سيئة

كشفت النجمة لقاء سويدان، عن إصابتها بالعصب السابع، وتفاصيل حالتها الصحية، وذلك خلال ظهورها في برنامجها، كأول ظهور لها بعد مرضها.

لقاء سويدان

وقالت لقاء سويدان، في ظهورها الأول ببرنامجها: بشكر كل الناس اللى وقفت معايا وشكرا لكل دعواتكم، أول مرة اطلع بعد التعب، أنا جالي العصب السابع، واسمحوا ليا إنى أتكلم معاكم على مرضى، لأن أنتم بتشاركوني كل لحظات حياتي، في نجاحي ومسلسلاتي ومسرحياتي والبرنامج، وبتفرحوا معايا بكل حاجة حلوة، حبيت أظهر الجانب الإنساني فيا ليكم، وبدون خجل.

وأضافت “سويدان”: "احنا بني آدمين وعندنا مشاكلنا الصحية والإنسانية ومحدش يتخيل إنها عندنا، الصورة اللى الناس واخدينها عن الفنانين هي صورة لامعه أوي، والناس بتقول إن لازم الفنانين طول الوقت يكونوا متشافين كدا، بس أنا حبيت أقولكم إن في لحظات ضعف كتير ومرض ويأس بتعدي علينا.

واستكملت: “المرض اللى جالى بسبب حالة نفسية سيئة مريت بيها، وأنا بكتم وبظهر قوتي ودايما كل اللى حواليا شايفني قوية، وظهرت حملات تشويه ليا وفي ناس كنت بعتبرهم صحابي وقريبين مني ومطلعوش على هذه المكانة، الفترة الزمنية اللى عايشنها الآن هي غريبة جدا، وكلنا بنمر بضغوط، بس الفكرة إننا نتحمل إزاى، وندى الآخرين فرصة يأثروا علينا إزاى”.