ناني سعد الدين: زوجي بين الحياة والموت وكل اللي عايزاه ماكينة خياطة

كشفت الفنانة ناني سعد الدين عن معاناتها خلال السنوات الأخيرة، مؤكدة أنها تعيش حالة من الحزن وعدم التقدير، رغم مشوارها الفني الذي تجاوز ثلاثة عقود. 

وقالت خلال لقائها مع الإعلامية نهال طايل في برنامج "تفاصيل" على قناة "صدى البلد 2" إنها اضطرت في فترة من حياتها للعمل في عدة أعمال فنية في وقت واحد، ما سبب لها إرهاقًا شديدًا: "كنت بروح من بالم هيلز لكارفور والعربية تستناني، أرجع لأصوّر كلام نسوان وزهرة وأزواجها الخمسة، وأرجع البيت منهكة، وربنا هو اللي مديني الصحة".

وأوضحت أنها اليوم لا تشعر بالسعادة أو التقدير: "أنا مش مبسوطة.. مفيش حد مقدّر تعبي، ولو في دور شبه ناني بيجيبوني، لكن مفيش أي تقدير.. وزوجي دلوقتي بين الحياة والموت".

وانتقدت ناني سعد الدين طريقة التعامل معها في الوسط الفني قائلة: "إزاي واحدة بقالها 30 أو 40 سنة شغل يدّوها مشهد ويطلبوا منها كاستينغ؟ هم عارفيني كويس. كل اللي بطلبه ماكينة خياطة أشتغل عليها بدل ما أموت من الجوع".

من جانبها، أكدت الإعلامية نهال طايل أن طلب الفنانة بسيط للغاية رغم مشوارها الطويل: "كل اللي الست دي عايزاه ماكينة خياطة بس".

وخلال الحلقة، تحدثت نهال طايل عن تجربتها مع طلاب الجامعة البريطانية، موضحة أنها كانت تناقش معهم كيفية صناعة الفرص والتخطيط للمستقبل، مشيرة إلى أن التعامل أمام الكاميرا يتطلب أحيانًا قدرًا من الأداء والتمثيل: "زي ما ممكن تتصور وإنت مش مرتاح بس تضحك علشان الصورة ماتطلعش وحشة.. وهكذا الكاميرا، ممكن أكون زعلانة وأظهر بهدوء أو أقدّم الحلقة بشكل طبيعي".