باسم يوسف: أنا كوميديان.. بس الناس مصممة تشوفني سياسي

في حوار صريح ومليء بالمشاعر، قال الإعلامي باسم يوسف إنه يشعر دائمًا بالغربة عن الأماكن التي يتواجد فيها، موضحًا خلال استضافته في برنامج "كلمة أخيرة" مع الإعلامي أحمد سالم على قناة ON: "حياتي كلها كده، دايمًا بلاقي نفسي في أماكن مش بتاعتي. أنا بحب الكوميديا، لكن لقيت نفسي غارق في أخبار السياسة أكتر من أي حاجة تانية، وده مضايقني".

وتحدث باسم بأسى عن رحلته المهنية، مؤكدًا أن حلمه لم يكن أبدًا الطب، وإنما كان يسعى لتحقيق أحلام أسرته: "قضيت عمري كله بدح علشان أحقق أحلام أهلي في إني أبقى طبيب، مش علشان حلمي أنا".

باسم يوسف: والدتي ماتت مقهورة

وتطرق باسم للحديث عن والدته الراحلة بكلمات مؤثرة، قائلًا: "أمي، ربنا افتكرها، مشافتش قَلبة الناس على ابنها.. ده كان قتلها.. كانت نار جواها، أما أبويا فكان زي الهوا، مش بتحس بيه لكن ما تقدرش تعيش من غيره".

وأعرب باسم عن سعادته بعودته للظهور على قناة ON التي شهدت انطلاقته قبل 14 عامًا، لافتًا إلى أن ظهوره أثار جدلًا واسعًا وشائعات حول حصوله على مبالغ مالية ضخمة.

وقال باسم يوسف ضاحكًا: "كل شوية يقولوا إني واخد فلوس كتير، ومراتي بدأت تشك! بيقولوا أخدت 22 مليون جنيه، وأنا بقول الحقيقة إنهم 22 مليون دولار"، قالها ضاحكًا، مضيفًا: "مستعد أظهر في أي حفلة أو برنامج أو حتى سبوع وطهور".

وأكد باسم يوسف أنه لا يرى نفسه بهذا الحجم الذي يُعطى له من قبل البعض، قائلًا: "أنا مش شايف نفسي أستحق كل ده، دايمًا بيبقى اسمي في وسط جدل، وأنا في الأساس كوميديان، مش سياسي، بس الناس مصممة تشوفني في الدور الغلط".