"بحبك ووحشتني وزعلانة منك".. آيتن عامر تتذكر والدها برسالة مؤثرة (صور)

وجهت النجمة آيتن عامر رسالة مؤثرة لوالدها الراحل، وذلك من خلال نشر مجموعة صورة تجمعهما على طريقة “الذكاء الإصطناعي ”، وذلك عبر حسابها الشخصي بموقع التواصل الاجتماعي فيسبوك.

آيتن عامر 

وعلقت آيتن عامر، على صورها مع والدها، قائلة: “وحشتني أوي وحقيقي محتاجالك، الدنيا مش حلوة يا بابا ولا الناس كمان، كل مرة بتحط فى اختبار صعب أو أزمة مفيش حد بيجي فى دماغي غيرك، أول واحد بيبقى نفسي اجرى عليه وأقوله الحقنى بيبقى انت”

وأضافت: “وجودك كان هيفرق أوي، يمكن عمرى ما قولت ان غيابك مسببلي أزمة كبيرة ولا قولت اللى جوايا، بس هيجى يوم وأبقى قوية كفاية إنى أواجه وجع قلبي وأطلع كل الكلام اللى جوايا ومقولتهوش، زعلانة منك فى حاجات ومفتقداك فى حاجات اكتر بكتير، ومتأكدة ان لو كنت موجود كنت هتبقى السند بس غيابك خلانى أنا السند لنفسي وللى حواليا كمان، لأن فيا منك كتير خصوصا قوتك وجدعنتك مع الكل”.

واستكملت: “بس أنا تعبت من كتر القوة وزهقت مبقتش عايزة أدخل حروب ولا عايزة مشاكل، اللى عايز يفهم حاجة يفهمها واللى عايزة ياخد فكرة ياخدها لا هبرر ولا هدافع، بس اتطمن بنتك بميت راجل ومهما قابلت هتفضل واقفة وراسها فى السما هتاخد استراحة محارب وعمرها ما هتبدأ حروب بس دايما هتكون مستعدة وجاهزة  لاى حاجة وساعتها مش هيكون فى احتمالية للخسارة”.

واختتمت آيتن عامر رسالتها، قائلة: "بحبك ووحشتنى وزعلانة منك ومشبعتش منك وجوايا وجع كبير بس مش هقولك غير كلمة واحدة 
اتطمن بنتك قدها، الترند صورة متصورتهاش دة منتشر أوي اليومين دول وأول ما السوشيال ميديا تيم بعتولى الصورة لقتنى بكتب كلام كتير من قلبي، وجوايا أكتر من كدة مليون مرة وعندى صور كتير أوي ناقصها وجود بابا حقيقي،
آسفة لو طولت عليكوا شكلي فضفضت أوي".