بالصور.. قصة طرد «منتقبة» من «كافيه» شهير بالتجمع الخامس

تعرضت إحدى «المنتقبات»، للطرد من «كافيه» شهير يدعي «COCO»، بـ«river walk»، بالتجمع الخامس في مدينة القاهرة الجديدة، بسبب صدور تعليمات من صاحب «الكافيه» بمنع دخول «المنتقبات» المكان.

وفي هذا السياق، روت سارة الكموني، تفاصيل الواقعة، قائلة: «روحت أنا وماما وأخواتي، نتغدى في التجمع الخامس  بـcoco اللي في river walk وهو أكيد مشهور جدا و كل الناس عارفه تقريبا».

وأضافت: «اللي حصل، أن أخويا طلب الأوردر ومستني الأكل ودخلنا أنا وماما قعدنا فجأة لقينا واحد من اللي بيشتغلوا فيه بينادي أخويا بيقولوا معلش جدًا صاحب المكان مانع أي واحدة منتقبة تدخل المكان».

وتابعت: «طبعا كلنا اندهشنا اللي هو أيه القوانين، اللي بتنص أن المتنقبة، (أمي) متدخلش تتغدي زى الناس الطبيعية في أي مكان، بالرغم أن إحنا بنروح الكافيهات (المحترمة) اللي جانبه علي طول وكل الكافيهات اللي في التجمع و كل المولات، مفيش حد بيمنع المنتقبات».

وواصلت: «فعلا صادمة بالنسبة لى أن كل البنات اللي في الكافية من أولهم لآخرهم ومن أصغرهم لأكبرهم قاموا ووقفوا وقفه رجالة فعلا وكأنها أقسم بالله مامتهم وأكتر وباسوا دماغها وقعدوا يقولوا لها إحنا آسفين ليك من الكافية غير محترم ده، وفي ناس منهم كانوا بياكلوا وقالوا لو مشتوها إحنا كلنا هنمشي معاها وفعلا ده اللي حصل بعد ما مشينا كلهم قاموا معانا».

واستكملت: «ده غير الناس اللي شغالين في المحل كلهم من أولهم لأخرهم قالوا إحنا آسفين ديه سياسة صاحب المحل، حتي اللي جه قال لأخويا مامتك تمشي قالوا أنا أسف و قالوا بالنص، أنا مامتي منتقبة ومش عارف أقولك أيه يا فندم!!».

واستطردت: «وده وصاحب الكافيه بيوافق على دخول الكلاب مع الزبائن عادي، وأنا بطلب من صاحب المكان يعلق لوحة كبيرة اوووي يكتب فيها ممنوع دخول (المنتقبين) و بالمرة (المحجبين)».

وختمت: «أول مرة في حياتي أتحط في الموقف ده ومعرفش اتصرف والله حالة صدمة !!! اللي هو أنا على طول قاعدة فيه ويوم ما أخد مامتي يطردونا علشان منتقبة !!!!!!!، الموضوع مش منتقبة بس، بكرة يبقى المحجبة كمان، أنا مش عارفة أيه العنصرية اللي في بعض الأماكن دي اللي لا قانون ولا عرف بينص علي منع المنقبين من دخول الأماكن العامة..!!، القانون المصري منع التمييز بكافة صوره، ومش معقول صاحب مؤسسة تجارية يضرب بالقانون المصري عرض الحائط..!!»