حلمي عبد الباقي يرد على قرار شطبه من نقابة الموسيقيين: إحنا في زمن تكميم الأفواه

رد الفنان حلمي عبد الباقي على البيان الصادر من نقابة المهن الموسيقية برئاسة الفنان مصطفى كامل، بشأن أزمته الأخيرة وقرار شطبه من النقابة، معبرًا عن استيائه مما ورد في البيان، ومؤكدًا أنه لا يزال يسلك المسار القانوني للاعتراض على القرار.

وقال حلمي عبد الباقي، في مقطع فيديو نشره عبر حسابه على "فيسبوك": "إحنا في زمن تكميم الأفواه، عايزة اناقش بيان نقابة المهن الموسيقية، أولًا عيب إنك تقول المشطوب، لأن ده حكم مبدئي ولسه في استئناف، والقضاء شامخ وأنا بستعمل حقي القانوني في استكمال الإجراءات، ويعني إيه أسلوب يفتقر إلى الحقائق؟ يعني أنا ألفت قرار إحالتي لمجلس تأديب؟، و90% من مجلس التأديب كان بينصب حول ناصر صقر، وأنا مش محتاج أكسب تعاطف، كل الجمعية العمومية، حلمي عبد الباقي بيتمتع بحب أعضائها، وبدليل أن أصوات حلمي عبد الباقي لم تحدث في تاريخ المهن الموسيقية".

وتابع حديثه منتقدًا ما وصفه بعدم المساواة داخل النقابة، قائلًا: "بتقولوا إن فيه مساواة وشفافية بين الأعضاء، وفي أرقام اتعالجت بعد ناصر صقر بـ أرقام، فين يا جماعة الشفافية والمساواة؟، أنا قلت قبل كده في برنامج لما يجيلي موضوع زي ناصر صقر أجيب لكم منين، طيب أهي الأرقام وأنا مقولتش أسماء حفاظًا على عائلات المتوفيين واللي على قيد الحياة، وأنت طلعت في التلفزيون وقلت في غفلة مني لاقيت إن الفلوس اتدفعت بعد ما 6 أعضاء مضوا اليومين دول، والفلوس دي مدفوعة من سنة، وهل الحسابات مقالتش لك؟، يعني أنت المفروض عارف كل صغيرة وكبيرة في النقابة".

وأضاف: "بتقول إنك توليت علاج عضو منتسب ربنا يرحمه بـ 172 ألف جنيه، وده بشهادة عضو مجلس وعضو جمعية عمومية، لما قالوا لك إن الراجل عمل حادثة وبين الحياة والموت وقعد في المستشفى لغاية ما توفى، أنا معنديش مشكلة وأنتم أخدتوا قرارات، ودايمًا بقول الرحمة فوق القانون، ده حد تعبان إيه المشكلة لما النقابة تقف جنبه؟، أنا مباخدش حاجة أحطها في جيبي، والشيكات كانت بتطلع على المستشفيات، قولي الشفافية فين وفين المساواة بين الأعضاء؟".

وأكد حلمي عبد الباقي حديثه موقفه من أزمة الموسيقار ناصر صقر، قائلًا: "علشان ننهي موضوع ناصر صقر، قولتلك أنا معرفش إن المبلغ بقى كبير بسبب تغيير بروتوكول العلاج، والراجل عمل فيديو وقال الكلام ده، وبعد أول جرعة خدها طلع في فيديو وكان زي الفل وشكر النقيب والنقابة، وقدمت فيديوهين لـ ناصر صقر في مجلس التأديب، وقلت لك ربنا معانا عن الفلوس إنها بقت كتير علشان الراجل ربنا يشفيه، ولو في مسؤولية عليا أنا مستعد أدفع الفلوس".

واختتم قائلًا: "وأنت قلت في التلفزيون إني قولتلك مستعد أبيع عربيتي، ليه قفلنا على موضوع ناصر صقر وعالجنا الناس دي كلها؟، مش ده إنسان وده إنسان؟، لأ علشان حلمي عبد الباقي هو أساس موضوع ناصر صقر، نشيل ده على جنب يمكن يفكر ينزل انتخابات فنطلع له بقى، بس ربنا قادر على كل شيء وبيظهر الحقائق".