"أمهات مصر" تعرض فضفضة أولياء الأمور وتخوفاتهم قبل انطلاق امتحانات الثانوية العامة

"فضفضة حول امتحانات الثانوية العامة.. إيه أكتر حاجة شغلاكم حاليا؟ شاركونا بتعليقاتكم علشان نفيد بعض"، بهذه الكلمات وجهت عبير أحمد مؤسس اتحاد أمهات مصر للنهوض بالتعليم وائتلاف أولياء الأمور، حديثها إلي أولياء أمور طلاب الشهادة الثانوية العامة.

وقالت مؤسس اتحاد أمهات مصر، إن امتحانات الثانوية العامة ستنطلق 21 يونيو المقبل، وعلي أولياء الأمور تهيئة المناخ النفسي الملائم لأبنائهم داخل الأسرة، استعدادًا للامتحانات، وحتي يستطيع الطالب المراجعة بكل تركيز واهتمام، داعية الطلاب وأولياء أمورهم بالاطمئنان والتوكل علي الله، وعدم إضاعة الوقت المتبقي لبدء الامتحانات.

وتفاعل أولياء الأمور من أمهات طلاب الشهادة الثانوية العامة علي صفحة اتحاد أمهات مصر للنهوض بالتعليم وائتلاف أولياء الأمور، في الفيسبوك، حيث قالت ولي أمر: "تعالوا ندعوا جميعا ربنا مايسلط علي أولادنا ظلما أبدا في اللجان ولا التصحيح ولا في حياتهم، ويرزقهم الهدوء والسكينه ويجعل أيامهم كلها سهلة يارب ويمتعهم بعافيتهم وسعادتهم وينجيهم يارب".

وأضافت ولي أمر أخري: "تظليل البابل شيت والغش وتوتر اللجنة والامضاءات الكتيره اللي بتضيع وقت الامتحان، وأخيرا التصحيح وتظليل اكتر من إجابة للسؤال ويتحسب غلط، ربنا ينجحهم ويوفقهم ويجبر بخاطرهم وخاطرنا فيهم ياارب".

وتابعت أخري: "خايفه إن ناس متستحقش تنجح بالغش والسماعات أو إن الورق يتبدل، الظلم هو إللي يقهر أكثر من صعوبة الامتحانات"، واستكملت أخري: "اللجنة والتوتر والخوف من حدوث غش، دة غير البابل شيت والغلطة فية بتضيع الامتحان".

وذكرت ولي أمر: "الضغط النفسي اللي احنا فيه دلوقت، بجد كل حاجه صعبة ده اللي قلقنا الفتره دي وتعبنا والتفكير في الامتحانات والنتيجة، بس سيباها علي ربنا ربنا يستر يارب".