محمد سامي يرد على إدعاءات عمرو سعد بتصدر «إفراج» قائمة الأعلى مشاهدة: بنغفل الجمهور
رد المخرج محمد سامي على ما يدعيه الفنان عمرو سعد، حول تصدر مسلسله «إفراج» قائمة الأعلى مشاهدة، وفقًا لمستندات وأوراق، مؤكدًا أن هذه المستندات غير صحيحة.
وقال، في مقطع فيديو، عبر حسابه على موقع التواصل الاجتماعي «فيس بوك»: «نجم زميل عمل فيديو فيه مستندات وأوراق وقال أنا المسلسل رقم واحد، إحنا بنحدد رقم واحد على أساس ايه ناس في الشارع ومنصات وتليفزيون وده بيكون صعب جدًا أنا كنجم لما أسيب المنصة اللي أنا فيها 7 و10 وأقول أنا رقم واحد على شيء مقدرش أثبته ده غلط».
وتابع: «لما كان جعفر العمدة رقم واحد في الشارع والتليفزيون كان رقم واحد على المنصة.. المسلسل رقم واحد في حتة رقم واحد في كل حتة».
وأضاف: «إني أطلع أقول المسلسل بتاعي أعلى تقييم آخر 10 سنين، الناس تضحك عليك على طول، ولو سأل الجمهور ايه أكتر مسلسل رائج اخر 10 سنين مع احترامي لكل زمايلي ومسلسلاتهم، لكن فيه مسلسل اسمه جعفر العمدة هو ظاهرة.. مفيش مسلسل تاني وصل لحالة الرواج دي، زي ما بنقول برنامج رامز جلال ظاهرة، وبالتالي لما بنيجي النهاردة وأقول أنا مسلسلي ده الأعلى آخر 10 سنين يبقى بغفل الجمهور».
واستكمل «سامي» حديثه: «مينفعش مسلسل مش متشاف أطلع أقول للناس إنه مكسر الدنيا».
وعن فكرة الأعلى أجرًا، أضاف: «نفس الموضوع على فكرة الأعلى أجرًا، مينفعش أطلع أقول أنا الأعلى أجرًا، وافتكر كله معروض أجره كام لأنه بيدفع ضرايب، وتعالوا نعمل زي نجوم هوليوود لما بيمضوا على فيلم أو مسلسل بياخدوا صورة للأجر وبينزلوها على السوشيال ميديا».