حلمي عبد الباقي يهاجم مصطفى كامل بعد التسريب: مش هسيب حقي (فيديو)

علّق الفنان حلمي عبد الباقي على التسريب الصوتي المنسوب لنقيب المهن الموسيقية الفنان مصطفى كامل، والذي تضمن – حسب ما تم تداوله – عبارات سب وقذف بحقه، مؤكدًا أنه لم يكن ينوي الرد لولا ما حدث، لكنه قرر توضيح الأمور لأعضاء الجمعية العمومية والجمهور.

وقال حلمي في فيديو نشره عبر صفحته الرسمية على فيسبوك: "أخواتي وأخواتي أعضاء الجمعية العمومية لنقابة المهن الموسيقية.. أخواتي وحبايبي وأصحابي اللي في كل الدنيا سواء في الجمعية العمومية أو خارجها، عايز بس أتكلم في شوية حاجات صغيرين.. وتردت كتير جدًا أني أعمل الفيديو ده بس في الأخر أنا راجل تلقائي من جويا لما بحب أتكلم بتكلم، نقط غيرة كدة".

حلمي عبد الباقي: في اجتماع النقابة لم أستطع الرد بسبب المقاطعة

وتحدث حلمي عن الجلسة التي شهدت مشادات وصراخًا في النقابة، قائلًا: "في البث المباشر اللي حصل في النقابة واللي كل ناس قالت هو إيه اللي بيحصل وإيه كمية الزعيق والخناقات دي، ناس كتير لامتني وقالتلي أن ليه متكلمتش، كب أنا بقولكم في ناس لما تيجي تتكلم مبتخدش فرصة تماماً لازم يقطع عليك ميخلكش تتكلم، أنا اتكلمت في النقطتين اللي اتوجهوا ليا بالتحديد وهما الإسكان ونادي المنصورة وأنا ولا كنت هنا ولا كنت هنا، ولا أعلم عنهم أي شيء، دي نقطة".

دفاع عن تاريخه في النقابة: "عمري ما قصرت مع حد"

واستكمل حديثه قائلًا: "النقطة التانية.. أنا بسأل الجمعية العمومية بكاملها، هل حلمي عبد الباقي في يوم قصر مع حد؟ هل مكنش بيشتغل؟ من أيام الأستاذ هاني شاكر وأنا ماسك لجنة الخدمات، الناي أكيد مش ناسية كنت بعمل إيه في أيام كورونا أيام ما كنت بنزل بدي الجوابات للناس عند بيوتها وفي الأخر عملت بروتوكول مع جميع المستشفيات والمراكز اللي أنا برضه معظمها تعاقدت معاهم، قولت يا جماعة عايزين نتعامل بالوات آب عشان نشيل الحمل من على الناس أنهم ينزلوا من بيوتهم ورايح وجاي ومواصلات وتعب، والحمد لله الدنيا نجحت جدًا ومشيت جدًا، فطبعًا كان شيء محمود اعتقد ومقصرتش مع حد ابدًا سواء أعرفه أو معرفهوش".

اعتراضه على إلغاء التعامل بالواتساب

وتابع: "أي حد، مش أنا بس، أي حد بيعترض على أي حاجة يبقى متأمر وبيزايد، لما صحيت من النوم ولقيت على جروب المجلس أن قرر النقيب العام إلغاء التعامل بالواتس آب أنا اعترضت وقولت لأ مش هينفع، إزاي ننزل الناس من بيوتها وغير التعب والناس اللي جاية تعبانة وكل ده عشان ياخد جواب من النقابة عشان كشف أو تحاليل أو أشعة، فاتهمت بأني بزايد مع أن أنا ممسكتش ميكروفون وقولت أنا عملت كذا كذا، عادي بتكلم في مصلحة الناس، وبعد أيام الناس اتكلمت كتير فتلغى القرار".

أزمة التربية النوعية

كما علّق على ملف خريجي "التربية النوعية": "موضوع التربية النوعية، اللي إحنا اتكلمنا فيه وقولنا ده قانون دولة، واللي معاه تربية نوعية لازم ياخد الكارنيه، فاتقال أيوة ما أنتو عايزين تهدوها وترجعوها، هو عشان خاطر أحمد أبو المجد؟ هو أحمد أبو المجد بس هو اللي عنده تربية نوعية! طيب ما جميع أنحاء مصر في تربية نوعية، وعايز أقول حاجة طول السنة دي كلها من أولها لأخرها حوالي 120 ملف، يبقى أنا برضوا بزايد ومن الناس اللي عايزة تهد النقابة!؟، بمعنى أصح أن أي اعتراض يعتبر مؤامرة وهدم للنقابة".

رسالته الأخيرة بعد التسريب

واختتم حلمي عبد الباقي: "أخر حاجة بقولها.. أنا بعد كل اللي عملته في نقابة المهن الموسيقية وخدمتي لكل الناس وأنا سعيد بكل ده على فكرة، اتفاجأ بتسجيل صوتي بتهان وأسب فيه بكلمات صعب أوي أنه يتقال على حلمي عبد الباقي، لأن أنت عارف أني جدع وراجل ومش جبان لما وقفت معاك ساعة الانتخابات ولفيت بيك مصر كلها كان الفضل لربنا ثم أنا ثم ناس أخرين، إيه اللي يخليني اتغير؟ الناس دخلت في ودانك أن حلمي بيعمل كدة عشان عايز يبقى نقيب، للأسف الشديد أنت سمعت واتعاملت معايا بعد كدة على بهذا المنطق للأسف، أنا راجل محترم ليا أسرة، وأولاد وزوجة محترمين، 2 إعلاميين وواحدة مهندسة ديكور وواحدة دكتورة، لما يسمعوا الكلام ده عن أبوهم المحترم اللي رباهم أحسن تربية، هقول إيه؟! بس عايز أقول لكل الناس أنا مش هسيب حقي، لو سبت حقي يبقى أموت أحسن، وفي أيام كتير جاية وهتبين كل حاجة".

يذكر أن التسريب ليس الأول للفنان مصطفى كامل، حيث سبق تداول مقاطع له يتلفظ فيها على بعض أعضاء المجلس، من بينهم الدكتور عاطف إمام الذي قدّم بلاغًا رسميًا ضده بتهمة السب والقذف.