باسم يوسف: عندي 51 سنة.. ومبقتش باسم بتاع 2011
علق الإعلامي باسم يوسف على تلقيه ردود الفعل على الحلقة الأولى من لقائه في برنامج «كلمة أخيرة»، من تقديم الإعلامي أحمد سالم عبر قناة ON.
وقال باسم يوسف: «فيه ردود أفعال كتير، وكنت متوقع يكون فيه ردود أفعال مختلفة، لكن أكتر حاجة مش هقول ضحكتني، هقول استغربتها، يقولك إيه ده! ده مش باسم، باسم اتغير مش زي ما هو.. معلش يعني كلنا أخبارنا إيه؟.. 11 سنة عدت على الناس كلها والناس هتفضل زي ما هي! أيوة أنا معدتش باسم بتاع 2011».
وأكمل: «أنا واحد عنده 51 سنة، عندي حياة مختلفة وظروف مختلفة وأفكار مختلفة ومستمتع إني بتغير وبتعلم حاجات كتير.. مصر نفسها بتتغير والظروف والأحاسيس بتتغير».
وأضاف «باسم»: «أنا مقدر وممتن إن الناس عايزة باسم بتاع برنامج البرنامج، وفي الحقيقة الناس مش عاوزة باسم ولا البرنامج، الناس عاوزة تشوف الترمومتر رايح فين واللقاء رايح فين.. والاتجاه رايح فين.. هيتكلم ولا لا؟ هيقول ولا لأ.. لأسباب تانية بره البرنامج».