أحمد شوبير يعدد أزمات الأهلي ويطالب المسئولين بالتدخل الفوري

تحدث الإعلامى الرياضى أحمد شوبير، عن بعض المشاكل والازمات التى يمر بها النادى الأهلى فى الوقت الحالى، وذلك بعد نهاية مباراة كهرباء الإسماعيلية فى بطولة الدورى المصرى الممتاز "دورى نايل".

وكشف أحمد شوبير فى تصريحات إذاعية أن النادى الأهلى لديه أزمات واضحة فى خط دفاعه خلال مباريات الدورى، وقال:" الفريق قدام حرس الحدود اتسجل فيه هدفين، نفس الكلام قدام مودرن سبورت، وكهرباء الإسماعيلية سجل فيه هدفين، يعنى فى 3 ماتشات ورا بعض شباك الأهلى اهتزت 6 مرات ده رقم كبير جدًا بالنسبة لفريق كان بيقفل الماتشات بالشهور من غير ما يدخل فيه هدف واحد".

شوبير يعدد أزمات الأهلى

وأضاف أحمد شوبير فى تصريحات عبر برنامجه المذاع عبر "راديو أون سبوت إف إم":" واضح أنه فيه خلل كبير فى خط الدفاع، الأخطاء متكررة بشكل كبير، ولازم المسئولين فى النادى الأهلى يقفوا عند الموضوع ده، لأن الفريق نفسه مش متعود على كدة، وده مش المستوى اللى إحنا عارفينه عن النادى الأهلى".

وتابع:" كمان موضوع الشد العضلى بقى ملف كبير جدًا، الإصابات العضلية بقت كتير ومبالغ فيها، والناس قالت إن المشكلة إن فى فترة ريبيرو ماكنش فيه حمل زايد، دلوقتي ريبيرو مشى، ومسك عماد النحاس، وقاد الفريق فى 5 ماتشات، يعنى وقت مش قليل، والمشكلة لسه موجودة، وده أمر غريب جدًا".

واختتم شوبير تصريحاته قائلًا:" بطلب من مسئولى النادى الأهلى التدخل بشكل سريع لحل تلك الأزمات، إستمرار المشاكل أكيد هيأثر عى مشوار الفريق فى البطولات، خاصة فى ظل ضغط المباريات والمنافسة القوية".

وحقق النادى الأهلى مساء أمس السبت، فوزًا كبيرًا على منافسه كهرباء الإسماعيلية بنتيجة 4-2 فى المباراة التى أقيمت على ملعب المقاولون العرب.