أكرم ناجي: الهجوم على "ريستارت" غير مبرر.. و"المشروع X" أقل أفلام كريم عبد العزيز

علق الناقد والمخرج أكرم ناجي على الانتقادات الموجهة لفيلم ريستارت بطولة النجم تامر حسني مؤكدا أن الهجوم على الفيلم كان مبالغا فيه وأن العمل يحمل جوانب إيجابية واضحة رغم ما به من ملاحظات.

وقال ناجي في تصريح خاص لـ “النبأ “: ”طارق الشناوي ناقد كبير وبنتعلم منه لكن حسيت إن في انتقاد قوي منه على الفيلم وكأنه شايف إن مافيش ميزة فيه وده مش دقيق أي فيلم طبيعي يكون فيه مشاكل بس ده ما ينفيش وجود عناصر إيجابية”.

وأضاف: “في ناس بتقول إن المشروع X أسوأ من ريستارت وأنا قلت ده فعلا لكن مش علشان مين أحسن أو أسوأ الفكرة في التوقعات لما تدخل فيلم لتامر حسني طبيعي تتوقع إنه فيه حاجات ممكن تكون مش مثالية لكن في المقابل فيه استايل تامر فيه كوميديا فيه اللمسة اللي جمهوره بيحبها علشان كده الجمهور بيستمر معاه وبتحقق أفلامه إيرادات كبيرة وهو المطرب الوحيد اللي أفلامه بتجيب ملايين بالشكل ده”.

وتابع: “أما المشروع X الناس كانت متوقعة إن كريم عبد العزيز هيقدم فيلم مختلف وأقوى كقصة وإخراج وإحساس عام لكن اللي حصل إن الفيلم كان فيه مشاكل في السرد في الإحساس بالبداية والوسط والنهاية مقارنة بأفلام كريم الأخيرة هو أقل فيلم ليه”.

وعن رأيه في ريستارت قال أكرم ناجي: “أنا شايف الفيلم حلو وقلت نقدي لطريقة السرد من وجهة نظر نقدية في إطار أفلام تامر مش بقارنه بأفلام برا بالنسبة لي هو واحد من أحلى أفلام تامر من أيام البدلة”.

وأضاف: “الفيلم فيه فكرة وقصة عن السوشيال ميديا اتقدمت باستايل وكوميديا تامر اللي الناس بتحبها أكيد فيه حاجات محتاجة تتغير بس فيه كمان حاجات عجبتني وفيه تطور في شغل سارة وفيق كمخرجة طبيعي أي مخرجة تتطور عن أول أفلامها ومقدرش أقول إنها ماعملتش حاجة بالعكس فيه رؤية واضحة بينها وبين تامر”.

واستكمل حديثه: “في الفيلم شفنا ممثلين زي محمد ثروت وباسم سمرة كل واحد اشتغل بشخصيته محدش عمل كاراكتر جديد أو غير استايله حتى تامر نفسه لكن اللي اتعمل كان حلو ضحكني الفيلم وأنا انتقدته بس شايف دمه خفيف”.

وأوضح "ناجي": “الكوميديا أذواق ممكن حاجة تضحكك متضحكنيش والفيلم فيه إفيهات وفيه ناس قالت إن فيه إيحاءات زيادة لكن برضه فيه ناس عجبتها وناس لا وده طبيعي”.

وعن تشابه الموضوع مع أفلام أخرى قال: “بيت الروبي مثلًا بيتكلم في نفس القصة تقريبًا عن الإنفلونسرز والسوشيال ميديا لكن بشكل أخف والفيلم معمول حلو بصراحة بس مش من أفلام كريم عبد العزيز القوية فيلم خفيف زي نادي الرجال السري اللي كانت الكوميديا فيه أحسن”.

واختتم تصريحه بقوله: “ريستارت عمل فوكس أكتر على تيك توك والناس اللي بتبيع نفسها علشان الترند وده كان واضح في معالجة الفكرة فعجبك أو معجبكش ناقش سلبيات وإيجابيات لكن مش تجيب الفيلم الأرض كده لأنه فعلًا واحد من أفضل أعمال تامر في آخر 7 سنين”.