كندة علوش: "دوري في إخواتي مغامرة حقيقية من المخرج"

أوضحت النجمة كندة علوش أن مشاركتها في مسلسل إخواتي، الذي عُرض في شهر الرمضاني الماضي، من خلال شخصية "ناهد"، كانت مغامرة حقيقية من المخرج محمد شاكر خضير في إختيارها للدور.

كندة علوش

وأضافت كندة علوش، خلال لقائها مع الإعلامية لميس الحديدي في برنامج كلمة أخيرة" على قناة ON: "مش أي مخرج وهو بيقرأ الورق ممكن يختار (كندة) في الدور ده، لأنه مش شبه الأدوار اللي قدمتها قبل كده أو اتعرضت عليّ".

واستكملت: “لما المخرج عرض علي شخصية ناهد، قلت له إيه الزاوية اللي شفتها فيّ خلتك ترشحني للدور ده؟، قال لي أنا عارف إنك تقدري، وإن عندك حتة، ممكن تطلعي منها ناهد، وصحيح هو ماكنش واثق 100%، لكن أعتبرها مغامرة خضناها سوا، وده خلاني أحس بمسؤولية كبيرة”.

وتابعت: “طول الوقت وأنا بشتغل على الدور، كان جوايا صوت داخلي بيقول لي: مش عايزة أخذل المخرج، ولا عايزاه يندم إنه اختارني”، كما أشارت كندة علوش إلى أن هذا الدور كان تحديًا وضعها فيه المخرج، وقالت: "كنت حابة أثبت لنفسي إني قدّ التحدي، خصوصًا إني راجعة بعد فترة غياب عن الشاشة، وكنت حابة تبقى العودة بدور يترك أثر ويحقق صدى كويس".