رئيس التحرير
خالد مهران
count
count

«بلوك» فوق ثلاث

صبري عبد الحفيظ
صبري عبد الحفيظ


خد بالك.. اوعى لما تزعل من حد بتحبه، أو فيه بينك وبينه عشرة طيبة، إنك تعمله له "بلوك" أو حظر على السوشيال ميديا أو في حياتك.. أنت كده بتقفل في وشه كل أبواب الود، و تقطع كل طرق العتاب.

خد بالك.. انت كده بتعامله زي ما يكون واحد غريب عنك، ولم تترك أية فرصة لعودة العلاقات بينكم زي ما كانت أو تلطيف الأجواء، انت كده بتحرق كل المراكب، وبتقوله "أشرب من البحر" أو اخبط دماغك في الحيطة.

خد بالك.. ممكن تعمل "البلوك" كأجراء عقابي ضد صاحبك أو أي شخص بتعزه، لكن في الحقيقة أنت بتعاقب نفسك، لأنك حرمت نفسك من العتاب، اللي هو ملح الحب بين الناس المحبين.

ربنا عاتب الرسول في كذا موقف، منها موقف الإعراض عن الأعمى عبد الله ابن مكتوم، وأنزل سورة كاملة نتعبد بتلاوتها هي سورة "عبس"، ومنها موقفه عندما حرم النبي على نفسه أكل العسل عند أم المؤمنين السيدة زينب بنت جحش وقيل السيدة ماريا، عندما غارت السيدتان عائشة وحفصة، واتفقنا على أن يقولا له: "إني أجد منك ريح مغافير"، وأنزل الله سبحانه وتعالى سورة التحريم {يا أيُّها النبيُّ لم تُحَرِّم مَا أَحَلَّ اللهُ لَكَ تَبْتَغِي مَرْضَاةَ أَزْواجِكَ }.

الرسول نفسه صلى الله عليه وسلم عاتب أصحابه، وعاتب زوجاته على مواقف كثيرة، وكان عتاب المحب للمحبين، ورجعت المياه لمجاريها، بل غالبًا ما تعود الأمور أفضل من السابق، لأن عادة ما يكون هناك سوء فهم لموقف معين، أو وشاية من شخص حاقد أو كاره.

خد بالك الرسول حذر من "البلوك" لأصحابك أو حبايبك أكثر من 3 أيام، وقال "لا يحل لمسلمٍ أن يهجر أخاه فوق ثلاثٍ، يلتقيان فيُعرض هذا، ويُعرض هذا، وخيرهما الذي يبدأ بالسلام".

يعني خد 3 أيام تخلص فيها من غضبك من صاحبك، وفكر فيهم مين اللي غلطان أنت ولا هو، وصفي نفسك، وبعدين تتقابلوا أو تتكلموا على الواتس أو الفيس أو أي وسيلة، وتعاتبوا وكل واحد يقول اللي عنده، لكن تذكر أن أفضلكم أو أحسنكم عند الله اللي هو "هيبدأ بالسلام"، مش اللي هيطنش ويستنى لما التاني اللي يتكلم ويتحايل عليه.

خد بالك.. بلاش تطول عن 3 أيام، وبلاش "بلوك" من أساسه، لأن اللي انت ناسيه، إن اللي اخترع الفيس والواتساب ووسائل التواصل الاجتماعي، عمل الـ"بلوك" للمتطفلين والأشكال الرخمة اللي انت مش عارفهم، عشان يريحك منهم، مش عشان الأصدقاء والأحباب.

بلاش "بلوك"، عشان الحياة مش مستحملة "بلوكات"، الحياة مش مستهلة، الحياة قصيرة جدًا، وصناعة الأصدقاء أو كسب الأحباب يحتاج إلى وقت طويل، يصل إلى سنوات، فلا تجعل غضب ساعة ينسيك عشرة سنوات. الحياة لو كانت تساوي عند الله جناح بعوضة ما سقى الكافر منها شربة ماء.

«البلوك» أصبح سلوك مشين خلال هذا العصر، وأصبح سهل جدًا، فبلاش منه، حتى لا ينتقل من العالم الافتراضي إلى الحياة، ووقتها سيكون «بلوك" من القلب، وسوف يخرجك من حياته وقلبه،  يعني يعمل لك "بلوك" من حياته كلها، وساعتها هتكون أنت الخسران.